༄།། ཁ་བ་སླར་ཡང་བབ་བྱུང་། ཟུར་བཀོད་གཅིག

རྔ་བ་རྒྱལ་ཁམས་པ།

ཁ་བའི་འདབ་མ་སྟུག་པོ་ཡིས།།
གསེར་ལྡན་གདོང་བ་ཀུན་ནས་གཡོགས།།
འཁྱག་རོམ་ཞུ་བའི་ཤེལ་རྡོ་དག།
ཆུ་སྲིན་ཁྲོས་པའི་མཆེ་བ་འདྲ།།

ས་བདག་འདོད་པའི་སྤར་ཤད་ཀྱིས།།
བག་མེད་འབྲད་པའི་གོ་ལ་འདིས།།
སྡུག་ཡས་ཕྲག་པས་མ་ཐེག་པར།།
དངུལ་ཁྲག་ཁ་བའི་ཟོལ་དུ་བབ།།

བྱུ་རུ་དཀར་པོའི་སྡོང་རྩེ་ན།།
བྱ་ཁྲ་ཧོར་པས་ངུ་ཟུག་བྱེད།།
སྲོག་ལྡན་སྲོག་མེད་སྐྱེ་དངོས་དག།
རེ་ཞིག་ཁུ་སིམ་གཉིད་དུ་ཡུར།།

ད་ལོའི་ཁ་བ་ན་ནིང་ལས།།
ལྷག་པར་མང་ལ་ལྗིད་ཀྱང་ཆེ།།
མ་འོང་དབྱར་ཁ་དེ་རིང་ལས།།
ཆར་རླུང་ཆུང་བར་སེམས་ནས་སྨོན།།

མདང་དགོང་ཉལ་སྐྱིད་གཉིད་བདེ་བས།།
ཁ་ཆེན་བབ་པར་མྱོང་བས་ཤེས།།
ད་ནིང་ཁ་བར་འཐབ་པས་ལུས།།
ད་ལྟ་ལྷག་པར་བདེ་ཞིང་རྐྱེན།།

རེ་འགར་ཆར་བ་ཟིམ་ཟིམ་འབབ།།
དགུན་དཀྱིལ་དབྱར་ཁའི་སྤྲོ་སྣང་མྱོང་།།
སྐབས་རེར་ཁ་ཆར་བུ་ཡུག་ཁྲོད།།
རང་ལམ་རྡོག་པས་ནོན་པར་དཀའ།།

ཆོས་ཉིད་གནམ་གྱི་རྒྱལ་མོ་ཡིས།།
ཆ་སྙོམས་དུས་བཞི་ཕབ་གྱུར་ཀྱང་།།
ས་བདག་སྨྱོན་པས་འཕྲུལ་འཁོར་གྱིས།།
གནམ་གྱི་འཁོར་ལོ་འདི་ལྟར་དཀྲུགས།།

ཁ་བ་བབ་བྱུང་།།
མཐིང་མདོག་ནམ་མཁའི་ཕོ་བྲང་ན།།
ཚོམ་པུར་ཆགས་པའི་ཆུ་ཤེལ་ཕྲེང་།།
གྲང་རེག་རལ་གྲིའི་འཕྲུལ་འཁོར་གྱིས།།
འཐག་པའི་ཁ་བ་དེ་རིང་བབ།།

ཁ་བའི་འདབ་མ་རེ་རེ་ནི།།
ཚེ་སྲོག་རེ་རེའི་བསྟི་གནས་ཏེ།།
ང་ཚོས་འདབ་མའི་གྲུ་ཆུང་རེ།།
ཞོན་ནས་མཁའ་ལ་ལྡིང་སྐོར་བྱེད།།

ཡབ་ཆེན་གནམ་གྱི་སྲས་པོ་དང་།།
ཡུམ་ཆེན་ས་ཡི་ལྷ་མོ་གཉིས།།
དགའ་བས་འཕྲད་པ་ཁ་བའི་ཟོལ།།
རླུང་ཞགས་ནག་པོས་ཕྱི་ཕྱིར་འཐེན།།

ཁ་བ་དཀར་བོའི་མཛེས་སྡུག་གིས།།
མ་བརྒྱན་སྲིད་པའི་འཇིག་རྟེན་ནི།།
དགུན་གྱི་ལྷ་མོའི་བརྩེ་དུང་གི།
འོ་མ་འཐུང་ལ་དབང་བ་མིན།།

ཁ་བའི་འདབ་རེ་ཡང་མོད་ཀྱི།།
ཁྲི་འབུམ་རྩེག་པ་ཤིན་ཏུ་ལྕི།།
ཤིན་ཏུ་ལྕི་བའི་ཁ་བའི་ཁྲོད།།
མི་དག་ངལ་བས་དབུགས་ཐུང་འཐེན།།

ཐག་ཐག་རྒྱུ་བའི་ཆུ་ཚོད་ལགས།།
ང་ལ་སུན་པོ་མ་བཟོ་ཞིག།
དོ་ནུབ་ང་ཡང་ཁ་བའི་འོག།
རི་ཀླུང་མཉམ་དུ་གཉིད་ན་འདོད།།