མཛད་པ་པོ། ཨ་ཀྱཱ་ཡོངས་འཛིན་དབྱངས་ཅན་དགའ་བའི་བློ་གྲོས།
[འོས་སྦྱོར་བ།] ངག་དབང་རྣམ་གྲོལ།
ན་མོ་མཉྫུ་ཤྲི་ཡེ།
བློ་རིག་རྣམ་གཞག་བཤད་པ་ལ།། ཡུལ་ཅན་བློ་དང་ཡུལ་གཉིས་ལས།། སྤྱིར་ན་ཡུལ་ཅན་གྱི་མཚན་ཉིད།། རང་ཡུལ་ཅི་རིགས་ལྡན་པ་ཡི།། དངོས་པོ་དེ་ཡིན་དབྱེ་བ་ནི།། གཟུགས་ཤེས་ལྡན་མིན་འདུ་བྱེད་གསུམ།། རྗོད་བྱེད་སྒྲ་ཀུན་དང་པོ་དང་།། ཤེས་པ་ཐམས་ཅད་གཉིས་པ་དང་།། གང་ཟག་མཐའ་དག་གསུམ་པ་ཡིན།། བློ་ལ་མཚན་ཉིད་རྣམ་གྲངས་དང་།། དབྱེ་བ་གསུམ་ལས་དང་པོ་ནི།། རིག་པ་བློ་ཡི་མཚན་ཉིད་ཡིན།། བློ་དང་ཤེས་པ་རིག་པ་དང་།། གསལ་བ་རྣམས་ནི་དོན་གཅིག་ཡིན།། དབྱེ་ན་རྣམ་པ་མང་ཡོད་དེ།། རྟོགས་པའི་བློ་དང་མ་རྟོགས་བློ།། བློ་རིག་བདུན་དུ་དབྱེ་བ་དང་།། ཚད་མ་དང་ནི་ཚད་མིན་དང་།། རྟོག་བཅས་རྟོག་མེད་བློ་གཉིས་དང་།། མངོན་སུམ་དང་ནི་རྗེས་དཔག་དང་།། སེམས་དང་སེམས་བྱུང་གཉིས་སོགས་མང་།།
རང་ཡུལ་རྟོགས་དང་མ་རྟོགས་ལ།། རྟོགས་དང་མ་རྟོགས་བློ་ཞེས་བྱ།། བློ་རིག་བདུན་ལས་མངོན་རྗེས་དང་།། བཅད་ཤེས་གསུམ་པོ་རྟོགས་པའི་བློ།། གཞན་བཞི་མ་རྟོགས་བློ་ཡིན་ལ།། དེ་ཡང་མཁས་པ་ཁ་ཅིག་གིས།། ཡིད་དཔྱོད་རྟོགས་བློར་གསུངས་པ་ནི།། ཡིད་དཔྱོད་ཙམ་གྱིས་རྟོགས་ལ་དགོངས།། རྟོགས་ལ་དངོས་རྟོགས་ཤུགས་རྟོགས་གཉིས།། རྣམ་པ་ཤར་དང་མ་ཤར་བར།། ཡུལ་དེ་རྟོགས་ལ་རིམ་བཞིན་འདོད།། སྡེ་བདུན་ཡིད་ཀྱི་མུན་སེལ་ལས།། སྤྱིར་བཏང་ཚད་མས་དངོས་ཤུགས་དང་།། མངོན་སུམ་དང་ནི་རྗེས་དཔག་གིས།། དངོས་རྟོགས་ཤུགས་རྟོགས་གསུངས་པ་དེ།། དང་པོ་གོ་ཐོབ་རིགས་པ་དང་།། གཉིས་པ་མདོ་སྡེ་པ་ཡི་ལུགས།། ཡང་ན་ཕྱི་མ་གཉིས་པོ་ནི།། མངོན་རྗེས་བྱེ་བྲག་པ་ལ་དགོངས།། ཚད་མིན་བློ་ཡི་དངོས་ཤུགས་ཀྱིས།། རྟོགས་ཚུལ་གསུངས་པའང་དེས་རིགས་འགྲེ།།
བློ་རིག་བདུན་དུ་དབྱེ་བ་ནི།། ཡིད་དཔྱོད་སྣང་ལ་མ་ངེས་པ།། བཅད་ཤེས་ལོག་ཤེས་ཐེ་ཚོམ་དང་།། མངོན་སུམ་རྗེས་དཔག་དང་བཅས་བདུན།། དེ་ཡང་རང་ཡུལ་བདེན་པ་ལ།། གསར་དུ་ཞེན་པའི་ཚད་མིན་བློ།། ཡིད་དཔྱོད་ཀྱི་ནི་མཚན་ཉིད་ཡིན།། དབྱེ་ན་རྒྱུ་མཚན་མེད་པ་དང་།། དེ་བཞིན་རྒྱུ་མཚན་འགལ་བ་དང་།། མ་ངེས་པ་དང་མ་གྲུབ་དང་།། ཡོད་ཀྱང་གཏན་ལ་མ་ཕབ་པའི།། ཡིད་དཔྱོད་དང་བཅས་རྣམ་པ་ལྔ།། མཚན་གཞི་གོ་རིམ་བཞིན་དུ་སྒྲ།། མི་རྟག་ཅེས་པའི་ངག་ཙམ་ལས།། སྒྲ་མི་རྟག་པར་འཛིན་པའི་བློ།། དེ་བཞིན་དུ་ནི་དེ་སྒྲུབ་ཀྱི།། འགལ་དང་མ་ངེས་མ་གྲུབ་པའི།། རྟགས་ལས་དེ་ལྟར་འཛིན་པ་དང་།། བྱས་པའི་རྟགས་ལ་བརྟེན་ནས་སྒྲ།། མི་རྟག་པ་རུ་འཛིན་པ་ཡི།། ཡིད་དཔྱོད་ལྟ་བུ་ཡིན་ཞེས་གསུངས།། བསྡུས་ན་གཉིས་ཏེ་དང་པོ་ནི།། རྒྱུ་མཚན་མེད་པའི་ཡིད་དཔྱོད་དང་།། ཡིད་དཔྱོད་ཕྱི་མ་བཞི་པོ་ནི།། རྒྱུ་མཚན་ཅན་གྱི་ཡིད་དཔྱོད་དོ།། ཐོས་བྱུང་ཙམ་གྱི་གོ་བ་ནི།། ཕལ་ཆེར་ཡིད་དཔྱོད་ཡིན་པས་ན།། དེ་རྒྱུན་བརྟན་པོ་མིན་ཞེས་གསུངས།།
སྣང་ལ་མ་ངེས་པ་ཡི་བློ།། རང་གི་འཇུག་ཡུལ་རང་མཚན་ནི།། གསལ་བར་སྣང་ཡང་མ་ངེས་པའོ།། དབྱེ་ན་གསུམ་སྟེ་དེར་གྱུར་པའི།། དབང་མངོན་ཡིད་མངོན་རང་རིག་གསུམ།། དེ་ལ་རྣལ་འབྱོར་མངོན་སུམ་ནི།། གང་སྣང་ཐམས་ཅད་ངེས་པས་ན།། སྣང་ལ་མ་ངེས་པ་མེད་དོ།། དེ་འདྲའི་དབང་མངོན་ལ་ཡང་ལྔ།། ཡིད་ནི་གཞན་དུ་ཕྱོགས་དུས་ཀྱི།། སོ་སྐྱེའི་གཟུགས་འཛིན་དབང་མངོན་ནས།། རེག་འཛིན་དབང་མངོན་བར་ལྔའམ།། སོ་སྐྱེའི་རྒྱུད་ཀྱི་དབང་མངོན་ལྔའི།། སྐད་ཅིག་ཐ་མ་ལྟ་བུའོ།། སོ་སྐྱེའི་དུས་མཐའི་སྐད་ཅིག་མའི།། ཡིད་མངོན་དང་ནི་རང་རིག་ཀུན།། སྣང་ལ་མ་ངེས་པ་ཡིན་ལ།། འཕགས་པའི་འདིར་བསྟན་ཡིད་མངོན་ནི།། ཚད་མར་རིགས་པའི་རྒྱན་ལས་གསུངས།། དེ་འདྲའི་རང་རིག་མངོན་སུམ་ནི།། རྒྱང་འཕེན་པ་དང་གཅེར་བུ་པའི།། རྒྱུད་ཀྱི་རྗེས་དཔག་ཚད་མ་དང་།། ལོག་པའི་ཤེས་པ་ལ་སོགས་པ།། ཉམས་སུ་མྱོང་བའི་རང་རིག་དང་།། རང་སྡེ་བྱེ་བྲག་སྨྲ་བ་ཡི།། རྒྱུད་ཀྱི་རང་རིག་ལྟ་བུ་དང་།། སོ་སྐྱེའི་རྒྱུད་ཀྱི་རང་རིག་གི། སྐད་ཅིག་ཐ་མ་ལྟ་བུ་མང་།།
རྟོགས་ཟིན་རྟོགས་པའི་ཚད་མིན་གྱི།། རིག་པ་བཅད་ཤེས་ཀྱི་མཚན་ཉིད།། དབྱེ་ན་མངོན་སུམ་རྗེས་དཔག་གི། རྒྱུན་དུ་གྱུར་པའི་བཅད་ཤེས་དང་།། དེ་གཉིས་གང་རུང་མ་ཡིན་པའི།། བཅད་ཤེས་དང་བཅས་གསུམ་དུ་ཡོད།། དང་པོ་ལ་ཡང་དབང་ཡིད་དང་།། རང་རིག་རྣལ་འབྱོར་མངོན་སུམ་གྱི།། བཅད་ཤེས་ལ་སོགས་དུ་མ་ཡོད།། རིམ་བཞིན་དབང་མངོན་ལྔ་པོ་དང་།། གཞན་སེམས་ཤེས་པའི་མངོན་ཤེས་དང་།། རྒྱུན་དང་ལྡན་པའི་རང་རིག་དང་།། སློབ་པའི་རྣལ་འབྱོར་མངོན་སུམ་གྱི།། སྐད་ཅིག་གཉིས་པ་ལྟ་བུ་འོ།། མངོན་སུམ་སྐད་ཅིག་གཉིས་པ་ནི།། དེ་བཞི་གང་རུང་མ་ཡིན་པའི།། བཅད་ཤེས་སུ་ནི་འཇོག་ཀྱང་རུང་།། གཉིས་པ་རྗེས་དཔག་ཚད་མ་ཡི།། སྐད་ཅིག་གཉིས་པ་ལྟ་བུ་ཡིན།། གསུམ་པ་མངོན་རྗེས་སོ་སོ་ཡིས།། དྲངས་པའི་ངེས་ཤེས་ལྟ་བུ་དང་།། ཚད་མ་སྐད་ཅིག་གཉིས་པ་བཞིན།། བསྡུ་ན་རྟོག་པ་བཅད་ཤེས་དང་།། རྟོག་མེད་བཅད་ཤེས་གཉིས་སུ་འདུས།།
ལོག་ཤེས་མཚན་ཉིད་རང་གི་ཡུལ།། ཕྱིན་ཅི་ལོག་ཏུ་འཛིན་པའི་བློའོ།། དབྱེ་ན་རྟོག་པ་ལོག་ཤེས་དང་།། རྟོག་མེད་ལོག་ཤེས་གཉིས་སུ་ཡོད།། རང་གི་ཞེན་ཡུལ་ལ་འཁྲུལ་བའི།། ཞེན་རིག་དང་པོའི་མཚན་ཉིད་དང་།། རང་གི་འཛིན་སྟངས་ལ་འཁྲུལ་བའི།། གསལ་སྣང་ཅན་གྱི་རིག་པ་དེ།། རྟོག་མེད་ལོག་ཤེས་ཀྱི་མཚན་ཉིད།། དང་པོ་ཆོས་དང་གང་ཟག་གི། བདག་འཛིན་རྣམ་གཉིས་ལྟ་བུ་དང་།། གངས་རི་སྔོན་པོ་སྣང་བ་ཡི།། དབང་ཤེས་ལྟ་བུ་གཉིས་པ་ཡིན།། ཚད་མ་ཡིད་ཀྱི་མུན་སེལ་ལས།། ལོག་རྟོག་རྟོག་པ་ལོག་ཤེས་དང་།། སྒྲོ་འདོགས་གསུམ་པོ་དོན་གཅིག་དང་།། དོན་མི་འགྱུར་གྱི་ཐེ་ཚོམ་ཡང་།། རྟོག་པ་ལོག་ཤེས་ཡིན་པར་གསུངས།།
རང་གི་ཡུལ་ལ་མཐའ་གཉིས་སུ།། དོགས་པའི་སེམས་བྱུང་ཐེ་ཚོམ་སྟེ།། དོན་འགྱུར་མི་འགྱུར་ཆ་མཉམ་པའི།། ཐེ་ཚོམ་གསུམ་ཡོད་རིམ་པ་བཞིན།། སྒྲ་མི་རྟག་གམ་སྙམ་པ་དང་།། དེ་བཞིན་རྟག་གམ་སྙམ་པ་དང་།། རྟག་གམ་མི་རྟག་སྙམ་པའི་བློའོ།། ཐེ་ཚོམ་ལ་ནི་རྩ་ཉོན་གྱིས།། ཁྱབ་པར་བཞེད་དང་ཉོན་མོངས་ཅན།། ཡིན་མིན་གཉིས་སུ་ཕྱེ་བའང་ཡོད།།
རང་མཚན་དང་ནི་སྤྱི་མཚན་གཉིས།། རིམ་བཞིན་སྣང་ཡུལ་བྱེད་པའི་བློ།། མངོན་སུམ་དང་ནི་རྟོག་པའོ།། དེ་ཡང་རྟོག་བྲལ་མ་འཁྲུལ་བའི།། རིག་པ་མངོན་སུམ་གྱི་མཚན་ཉིད།། དབྱེ་ན་དབང་མངོན་ཡིད་མངོན་དང་།། རང་རིག་རྣལ་འབྱོར་མངོན་སུམ་བཞི།། འཁྲུལ་རྒྱུ་བཞི་སྟེ་རྟེན་དང་ཡུལ།། གནས་དང་དེ་མ་ཐག་རྐྱེན་ལའོ།། བདག་རྐྱེན་དབང་པོ་གཟུགས་ཅན་ལས།། བྱུང་བའི་མངོན་སུམ་དབང་མངོན་ཏེ།། དེ་ལ་གཟུགས་འཛིན་དབང་མངོན་ནས།། རེག་བྱ་འཛིན་པའི་དབང་མངོན་བར།། ལྔ་ཡོད་དེ་རྣམས་རེ་རེ་ལའང་།། ཚད་མ་དང་ནི་བཅད་ཤེས་དང་།། སྣང་ལ་མ་ངེས་པ་གསུམ་ཡོད།། བདག་རྐྱེན་ཡིད་དབང་ལ་བརྟེན་ནས།། བྱུང་བའི་མངོན་སུམ་ཡིད་མངོན་ཏེ།། གཟུགས་འཛིན་ཡིད་མངོན་སོགས་ལྔ་ཡོད།། རྟོག་པ་དང་བྲལ་མ་འཁྲུལ་བའི།། འཛིན་རྣམ་རང་རིག་མངོན་སུམ་སྟེ།། དེ་གཉིས་ལ་ཡང་གོང་ལྟར་དུ།། ཚད་མ་ལ་སོགས་གསུམ་གསུམ་བཤད།། དེ་ལ་ལ་འབྱོར་མངོན་སུམ་ནི།། བདག་རྐྱེན་ཞི་ལྷག་ཟུང་འབྲེལ་གྱི།། ཏིང་འཛིན་བསྒོམས་སྟོབས་ལས་བྱུང་བའི།། འཕགས་པའི་རྒྱུད་ཀྱི་མངོན་སུམ་ཡིན།། རྟེན་གྱི་སྒོ་ནས་དབྱེ་ན་ནི།། ཉན་རང་ཐེག་ཆེན་འཕགས་པའི་གསུམ།། ངོ་བོའི་སྒོ་ནས་རེ་རེ་ལའང་།། མཐོང་སྒོམ་མི་སློབ་ལམ་དང་གསུམ།། ཡུལ་གྱི་སྒོ་ནས་གཉིས་ཡིན་ཏེ།། ཇི་ལྟ་ཇི་སྙེད་མཁྱེན་པའོ།། ལྡོག་ཕྱོགས་མངོན་སུམ་ལྟར་སྣང་ནི།། འཁྲུལ་དང་ཀུན་རྫོབ་ཤེས་པ་དང་།། རྗེས་དཔག་རྗེས་སུ་དཔག་ལས་བྱུང་།། དྲན་དང་མངོན་འདོད་ཅེས་བྱའོ།། མངོན་སུམ་ལྟར་སྣང་རབ་རིབ་བཅས།། ཞེས་གསུངས་དང་པོ་དྲུག་པོ་ནི།། རྟོག་པ་མངོན་སུམ་ལྟར་སྣང་དང་།། ཐ་མ་རབ་རིབ་ཅན་གྱི་བློ།། རྟོག་མེད་མངོན་སུམ་ལྟར་སྣང་སྟེ།། གོ་དོན་རིགས་རྒྱན་སོགས་སུ་ལྟོས།། རྟོག་མེད་མངོན་སུམ་ལྟར་སྣང་དང་།། མེད་པ་གསལ་སྣང་ཅན་གྱི་བློ།། རྟོག་མེད་ལོག་ཤེས་དོན་གཅིག་གོ།
དེ་ཡང་སྒྲ་དོན་འདྲེས་རུང་དུ།། འཛིན་པའི་ཞེན་རིག་རྟོག་པ་སྟེ།། དབྱེ་བ་རྟོག་པ་དོན་མཐུན་དང་།། རྟོག་པ་དོན་མི་མཐུན་དང་གཉིས།། མིང་སྦྱོར་དོན་སྦྱོར་རྟོག་པ་གཉིས།། བརྡ་རྟེན་ཅན་གྱི་རྟོག་པ་དང་།། དོན་གཞན་ལ་ནི་སྒྲོ་འདོགས་དང་།། ལྐོག་ཏུ་གྱུར་པའི་དོན་ཅན་གྱི།། རྟོག་པ་གསུམ་སོགས་དབྱེ་ཚུལ་མང་།། གཞན་ཡང་ཐོས་བསམ་སྒོམ་གསུམ་གྱི།། རྟོག་པ་གསུམ་ཡོད་དོན་རིམ་བཞིན།། སྒྲ་སྤྱི་ཙམ་གྱིས་འཛིན་པ་དང་།། དོན་ལ་བསམས་ནས་ངེས་རྙེད་དང་།། བསམ་བྱུང་དོན་ལ་ཡང་ཡང་དུ།། འདྲིས་པའི་གོང་སའི་ཞེན་རིག་གོ།
ཚད་མའི་གྲངས་ལ་མང་ཉུང་གི། ལོག་རྟོག་བྱུང་ཚུལ་འདི་ལྟ་སྟེ།། རྒྱང་འཕེན་པ་དང་གཅེར་བུ་པས།། མངོན་སུམ་ཚད་མ་གཅིག་ཙམ་འདོད།། གྲངས་ཅན་པ་ནི་མངོན་རྗེས་དང་།། སྒྲ་བྱུང་ཚད་མ་གསུམ་ཡིན་ཟེར།། རིགས་པ་ཅན་པས་དེ་གསུམ་སྟེང་།། དཔེ་ཉེར་འཇལ་དང་བཞི་རུ་འདོད།། རྒྱལ་དཔོག་པ་ནི་དེ་བཞི་དང་།། དོན་གྱིས་གོ་བའི་ཚད་མ་དང་།། དངོས་པོ་མེད་པའི་ཚད་མ་དང་།། དྲུག་པོ་ཁོ་ནར་གྲངས་ངེས་ཟེར།། ཙ་རི་ཀ་པས་དེ་དྲུག་སྟེང་།། རིགས་པ་དང་ནི་མི་དམིགས་དང་།། ཞེས་གྲགས་པ་དང་སྲིད་པ་དང་།། སྙམ་སེམས་པ་ཡི་ཚད་མ་བཅས།། བཅུ་གཅིག་ཏུ་ནི་གྲངས་ངེས་ཟེར།། རང་ལུགས་མངོན་རྗེས་གཉིས་སུ་ངེས།། དེ་ལ་གསར་དུ་མི་སླུ་བའི།། རིག་པ་ཚད་མའི་མཚན་ཉིད་ཡིན།། དབྱེ་ན་མངོན་རྗེས་ཚད་མ་གཉིས།། གཞན་ཡང་རང་ལས་ངེས་པ་དང་།། གཞན་ལས་ངེས་ཀྱི་ཚད་མ་གཉིས།། སྒྲས་བརྗོད་སྒོ་ནས་སྐྱེས་བུ་དང་།། ངག་དང་ཤེས་པ་ཚད་མ་གསུམ།།
རྟེན་རྟགས་ཡང་དག་ལ་བརྟེན་ནས།། ལྐོག་གྱུར་དོན་འཇལ་རྗེས་དཔག་སྟེ།། དབྱེ་ན་དངོས་སྟོབས་གྲགས་པའི་དང་།། ཡིད་ཆེས་རྗེས་དཔག་གསུམ་དུ་བཤད།། རྗེས་དཔག་རྗེས་དཔག་ཚད་མ་གཉིས།། དོན་གཅིག་ཏུ་ནི་ཤེས་པར་བྱ།། རང་གི་གཞལ་བྱའི་ཡུལ་སྟེང་དོན།། གྲུབ་པ་མེད་ན་མི་འབྱུང་བའི།། ངེས་པ་རང་དང་གཞན་སྟོབས་ཀྱིས།། འདྲེན་པའི་ཚད་མ་རང་ལས་དང་།། གཞན་ལས་ངེས་ཀྱི་ཚད་མ་ཡིན།། རང་རིག་རྣལ་འབྱོར་མངོན་སུམ་གྱི།། ཚད་མ་གཉིས་དང་རྗེས་དཔག་དང་།། དོན་བྱེད་སྣང་ཅན་གོམས་པ་ཅན།། གང་རུང་གྱུར་པའི་ཚད་མ་ལྔ།། རང་ལས་ངེས་ཀྱི་ཚད་མ་ཡིན།། གཞན་ལས་ངེས་ཀྱི་ཚད་མ་ལ།། སྒྲས་བརྗོད་སྒོ་ནས་དབྱེ་བ་ནི།། དང་པོ་བ་དང་ཡིད་མ་གཏད།། མངོན་སུམ་འཁྲུལ་རྒྱུ་ཅན་དང་གསུམ།། སྣང་བ་རང་དང་བདེན་པ་གཞན།། སྤྱི་ནི་རང་དང་ཁྱད་པར་གཞན།། སྣང་བ་ཉིད་ཀྱང་གཞན་ངེས་ཀྱི།། ཚད་མ་གསུམ་སོགས་བཤད་མོད་ཀྱི།། དངོས་བཏགས་ཁྱད་པར་ཕྱེ་བ་གཅེས།། གཞན་ལས་ངེས་ཀྱི་ཚད་མ་ལ།། ཚད་མས་ཁྱབ་ཀྱང་ཆོས་དེ་ལ།། གཞན་ལས་ངེས་ཀྱི་ཚད་མ་ལ།། དེ་ལ་ཚད་མ་མ་ཡིན་པས།། ཁྱབ་པ་ལ་སོགས་ཞིབ་ཆ་དགོས།།
ཡུལ་ལ་སྣང་གཟུང་ཞེན་འཇུག་བཞི།། སྣང་ཡུལ་གཟུང་ཡུལ་དོན་གཅིག་ཅིང་།། ཕྱི་རོལ་ཡུལ་ལ་མི་ལྟོས་པའི།། སྐྲ་ཤད་འཛག་སྣང་སོགས་མ་གཏོགས།། ཤེས་པ་ཀུན་ལ་སྣང་ཡུལ་ཡོད།། ཞེན་ཡུལ་རྟོག་པའི་སྒོས་ཆོས་ཏེ།། རྟོག་པ་དོན་མཐུན་ཀུན་ལ་ཡོད།། འཇུག་ཡུལ་ཚད་མས་བཅད་དོན་ཏེ།། ཚད་མ་དང་ནི་དེ་ལྡན་གྱི།། སྐྱེས་བུ་ཀུན་ལ་ཡོད་པ་ཡིན།། རྟོག་པའི་ཞེན་ཡུལ་རྟོག་པ་ལ།། སྣང་ཡང་དེ་ཡི་སྣང་ཡུལ་མིན།། དེ་བཞིན་དེ་ཡི་སྣང་ཡུལ་ནི།། ཞེན་ས་ཡིན་ཡང་ཞེན་ཡུལ་མིན།།
དབང་མངོན་རྣམས་ལ་དམིགས་རྐྱེན་དང་།། བདག་རྐྱེན་དེ་མ་ཐག་རྐྱེན་གསུམ།། གཟུགས་འཛིན་དབང་པོའི་མངོན་སུམ་ལ།། རང་གི་རྣམ་པ་གཏོད་བྱེད་ཀྱི།། རྐྱེན་དེ་དེ་ཡི་དམིགས་རྐྱེན་ཡིན།། མཚན་གཞི་དཔེར་ན་གཟུགས་ལྟ་བུ།། དེ་འདྲའི་དབང་མངོན་རང་དབང་དུ།། སྐྱེད་བྱེད་རྐྱེན་དེ་བདག་རྐྱེན་ཏེ།། ཐུན་མོང་ཐུན་མོང་མ་ཡིན་པའི།། བདག་རྐྱེན་གཉིས་ཡོད་དང་པོ་ནི།། དེ་ཡི་བདག་རྐྱེན་ཡིད་དང་ནི།། གཉིས་པ་མིག་དབང་ལྟ་བུ་འོ།། དེ་འདྲའི་དབང་མངོན་གསལ་རིག་ཏུ།། སྐྱེད་པའི་རྐྱེན་ནི་གསུམ་པ་སྟེ།། དེ་ཡི་སྔ་ལོགས་དེ་མ་ཐག། བྱུང་བའི་ཡིད་ཤེས་ལྟ་བུའོ།། དེ་ཡིས་སྒྲ་འཛིན་སོགས་ལའང་འདྲ།། སེམས་ཙམ་ལུགས་ལ་བདག་རྐྱེན་དང་།། དེ་མ་ཐག་རྐྱེན་ཕལ་ཆེར་འདྲ།། དམིགས་རྐྱེན་ལ་ནི་དངོས་བཏགས་ཀྱི།། འཇོག་ཚུལ་མི་འདྲའི་ཁྱད་པར་ཡོད།།
འདིར་བསྟན་ཡིད་མངོན་སྐྱེ་ཚུལ་ལ།། དབང་མངོན་སྐད་ཅིག་གཉིས་པ་ཕན།། ཡིད་མངོན་དང་ནི་དབང་ཡིད་གཉིས།། སྤེལ་མར་སྐྱེ་དང་འགྲོས་གསུམ་དང་།། རྒྱན་གྱི་ཡིད་མངོན་འདོད་ཚུལ་རྣམས།། མི་འདོད་རང་ལུགས་དབང་མངོན་གྱི།། རྒྱུན་མཐའ་ཁོ་ནར་སྐྱེ་བར་བཞེད།།
རྟོག་བཅས་རྟོག་མེད་ཁྱད་པར་ཡང་།། ཕལ་ཆེར་གོང་སྨོས་ཤེས་པར་ནུས།། དབང་ཤེས་དང་ནི་མངོན་སུམ་གཉིས།། རྟོག་མེད་ཤེས་པ་ཁོ་ན་ཡིན།། ཡིད་ཤེས་ལ་ནི་རྟོག་བཅས་དང་།། རྟོག་མེད་ཤེས་པ་གཉིས་སུ་ཡོད།།
སེམས་དང་སེམས་ལས་བྱུང་བ་ནི།། སེམས་དང་ཡིད་དང་རྣམ་ཤེས་རྣམས།། དོན་གཅིག་མིང་གི་རྣམ་གྲངས་ཡིན།། དབྱེ་ན་མིག་གི་རྣམ་ཤེས་ནས།། ཡིད་ཀྱི་རྣམ་ཤེས་བར་དྲུག་ཡོད།། སེམས་བྱུང་ལྔ་བཅུ་རྩ་གཅིག་སྟེ།། ཀུན་འགྲོ་ལྔ་དང་ཡུལ་ངེས་ལྔ།། དགེ་བ་བཅུ་གཅིག་རྩ་ཉོན་དྲུག། ཉེ་ཉོན་ཉི་ཤུ་གཞན་འགྱུར་བཞིའོ།། ཚོར་བ་འདུ་ཤེས་སེམས་པ་དང་།། ཡིད་ལ་བྱེད་དང་རེག་པ་ལྔ།། གཙོ་སེམས་ཀུན་གྱི་འཁོར་དུ་ནི།། འགྲོ་ཕྱིར་ཀུན་འགྲོ་ཞེས་བྱའོ།། འདུན་པ་མོས་པ་དྲན་པ་དང་།། ཏིང་འཛིན་ཤེས་རབ་ལྔ་པོ་ཡུལ།། བྱེ་བྲག་པ་ལ་འཇུག་ངེས་ཕྱིར།། ཡུལ་ངེས་ཞེས་པར་བཤད་པ་ཡིན།།
དད་དང་ངོ་ཚ་ཤེས་ཁྲེལ་ཡོད།། འདོད་ཆགས་དང་ནི་ཞེ་སྡང་དང་།། གཏི་མུག་མེད་པའི་དགེ་རྩ་གསུམ།། བརྩོན་འགྲུས་ཤིན་སྦྱངས་བག་ཡོད་དང་།། བཏང་སྙོམས་རྣམ་པར་མི་འཚེ་རྣམས།། གཉེན་པོ་ངོ་བོ་མཚུངས་ལྡན་སོགས།། ཅི་རིགས་སྒོ་ནས་དགེ་བའོ།། འདོད་ཆགས་ཁོང་ཁྲོ་ང་རྒྱལ་དང་།། མ་རིག་ཐེ་ཚོམ་ལྟ་བ་དྲུག། རྩ་ཉོན་ཡིན་ཏེ་སེམས་རྒྱུད་ནི།། ཉོན་མོངས་བྱེད་པའི་གཙོ་བོ་འོ།། ཁྲོ་དང་ཁོན་འཛིན་འཆབ་དང་འཚིག། ཕྲག་དོག་སེར་སྣ་སྒྱུ་དང་གཡོ།། རྒྱགས་དང་རྣམ་འཚེ་ངོ་ཚ་མེད།། ཁྲེལ་མེད་རྨུགས་རྒོད་མ་དད་དང་།། ལེ་ལོ་བག་མེད་བརྗེད་ངས་དང་།། ཤེས་བཞིན་མ་ཡིན་རྣམ་གཡེང་བཅས།། ཉི་ཤུ་རྩ་ཉོན་འཕེལ་སྐྱེ་དང་།། ཉེ་ཕྱིར་ཉེ་བའི་ཉོན་མོངས་སོ།། གཉིད་འགྱོད་རྟོག་དཔྱོད་གཞན་འགྱུར་ཏེ།། ཀུན་སློང་མཚུངས་ལྡན་ཅི་རིགས་ཀྱིས།། དགེ་དང་མི་དགེ་ལུང་མ་བསྟན།། གཞན་དང་གཞན་དུ་འགྱུར་བའོ།།
མདོ་སྡེ་སྤྱོད་པའི་དབུ་མ་པ།། ཐལ་གྱུར་བ་དང་བྱེ་སྨྲ་གསུམ།། མངོན་སུམ་ལ་ནི་དབང་ཡིད་དང་།། རྣལ་འབྱོར་མངོན་སུམ་གསུམ་འདོད་དེ།། རང་རིག་མངོན་སུམ་ཁས་མི་ལེན།། མདོ་སྡེ་པ་དང་སེམས་ཙམ་པ།། རྣལ་འབྱོར་སྤྱོད་པའི་དབུ་མ་བས།། དབང་མངོན་ཡིད་མངོན་རང་རིག་དང་།། རྣལ་འབྱོར་མངོན་སུམ་བཞིར་བཞེད་དོ།། འདིར་ནི་མང་དུ་དོགས་པའི་ཕྱིར།། ཕལ་ཆེར་རྐང་གྲངས་ཙམ་ཞིག་བསྟན།། སོ་སོའི་མཚན་གཞི་གོ་དོན་སོགས།། སྤྱི་དོན་རིགས་རྒྱན་སོགས་ལ་ལྟོས།།
སྨྲས་པ། བློ་གྲོས་ཞིབ་མོས་བླང་དོར་གྱི།། བློ་ཡི་སྤུ་རིས་འབྱེད་པའི་ཕྱིར།། བློ་རིག་སྡོམ་ཚིག་མདོར་བསྡུས་འདི།། བློ་བཟང་མིང་ཅན་ཞིག་གིས་བཀོད།། འདིར་འབད་དགེ་བས་འགྲོ་བ་ཀུན།། ལེགས་ཉེས་ལྟ་བའི་མིག་ཕྱེ་ནས།། མ་ནོར་ལམ་བཟང་མཐར་ཕྱིན་ཏེ།། ཀུན་མཁྱེན་གོ་འཕང་མྱུར་ཐོབ་ཤོག། ཚུལ་འདི་ལྷག་བསམ་དགེ་བ་ཅན།། དགེ་སློང་ངག་དབང་བཟོད་པ་ཡིས།། མཐུན་རྐྱེན་སྦྱར་ཏེ་པར་དུ་བསྒྲུབས།། འདིས་མཚོན་དུས་གསུམ་དགེ་བའི་མཐུས།། ཚེ་འདིའི་ཕ་མས་ཐོག་དྲངས་པའི།། མཁའ་མཉམ་འགྲོ་བ་མ་ལུས་པ།། དལ་འབྱོར་རྟེན་བཟང་རིམ་བརྒྱུད་ནས།། སྐུ་གསུམ་གོ་འཕང་མྱུར་ཐོབ་ཤོག།
[འོས་སྦྱོར་བའི་ཟུར་ཞུ།] དེང་སང་ཕྱི་ནང་གང་ས་ནས་བོད་བརྒྱུད་ནང་པའི་བློ་རིག་གམ་སེམས་ཀྱི་རྣམ་གཞག་ལ་Science of mind དོ་སྣང་བྱེད་མུས་ཡིན་པའི་དུས་སྐབས་སུ་རང་ཅག་སྐྱ་སེར་གཞོན་སྐྱེས་ཀུན་གྱིས་རང་ཉིད་ཀྱི་ནོར་བུའི་གོང་ཐང་རང་ཉིད་ཀྱིས་ཤེས་པའི་ཐོག་ནས་གཞུང་འདིར་ཐོས་བསམ་བྱེད་རྒྱུ་ནི་འདོར་དུ་མེད་པའི་འོས་འགན་རླབས་པོ་ཆེ་ཞིག་ཏུ་སོང་།
གཤམ་དུ་རྗེ་དབྱངས་ཅན་དགའ་བའི་བློ་གྲོས་ཀྱིས་མཛད་པའི་བློ་སྡོམ་གསལ་བའི་མེ་ལོང་ཞེས་པ་དེ་ཚངས་དབྱངས་དྲ་ཚིགས་ནས་དྲངས་ཏེ་དག་ནོར་ཤོར་བ་རྣམས་བློ་གསལ་གླིང་དཔེ་མཛོད་ཀྱིས་བཏོན་པའི་རིགས་ལམ་སྒོ་བརྒྱ་འབྱེད་པའི་འཕྲུལ་གྱི་ལྡེ་མིག་དེབ་ཕྲེང་དང་པོ་ཞེས་པའི་ནང་དུ་འཁོད་པར་ཚད་བཟུང་ནས་དག་བཅོས་ཞུས་ཁུལ་ལགས།
[འོས་སྦྱོར་བ།] ངག་དབང་རྣམ་གྲོལ གྱིས་ཨཀྱཱཡོངས་ཟཛིན་གྱིས་མཛད་པའི་་བསྡུས་གྲྭ་བཀོད་པར་ཐུགས་ཆེ།་ཤད་རྒྱབ་སྟངས་ལ་ཞུ་དགོས་པར་མཐོང་ངོ་།
རྣམ་རྒྱུན་ཁ་བརྡ་དྲ་ལམ་དུ་རྣམ་དཔྱོད་ཀྱི་རྩལ་འདོན་བཞིན་པའི་མཆན་འདེབས་མཁན་རྣམས་ལ་བཀའ་འདྲི་ཞུ་སྙིང་།
ད་ལོ་བོད་ཁྱིམ་སློབ་གྲྭ་ཁག་ཅིག་ནས་ཆོས་དགེ་ཚོས་སློབ་གྲྭའི་དགུན་ཁའི་གུང་གསེང་སྐབས་སློབ་ཕྲུག་འཛིན་གྲྭ་གསུམ་པ་ནས་བཞི་པར་འགྲོ་མཁན་ཚོར་གོང་དུ་འོས་སྦྱོར་བྱས་པའི་”བློ་རིག་གི་སྡོམ་ཚིག་བླང་དོར་གསལ་བའི་མེ་ལོང་ཞེས་བྱ་བ་བཞུགས་སོ།།” ཞེས་པ་དེ་པར་ལོག་བརྒྱབ་ཏེ་བློར་འཛིན་པར་ནང་ལས་ཀྱི་ཆེད་དུ་བསྐུར་འདུག དེ་ཧ་ཅང་ཡག་པོ་རེད། ཡིན་ནའང་། སློབ་ཕྲུག་རྣམས་ལོ་དགུ་མ་ཟིན་ཙམ་དང་། ལོ་དགུ ལོ་བཅུ་ལས་ཕལ་ཆེར་བརྒལ་མེད། ཁོ་ཚོའི་བོད་སྐད་ཀྱི་རྨང་གཞི་དང་། སྐད་ཡིག་གི་རྨང་གཞི་གཉིས་ལ་གཞིགས་ན་འདི་ཧ་ཅང་ཏོག་ཅིག་ཁག་དྲག་མེད་དམ་སྙམ་པའི་བསམ་ཚུལ་ཞིག་འདུག ང་ཚོའི་སློབ་གྲྭ་ཁག་ལ་རིག་ལམ་ཁྲིད་དགོས་པ་གལ་ཆེན་རེད། སྔོན་འགྲོ་ཁ་དོག་དཀར་དམར་ནས་འགོ་རྩམ་དེ་སྐས་ཐེམ་རིམ་འཛེགས་བྱས་ན་ལེགས་པར་སྙམ། གཅིག་བྱས་ན་ང་རང་ཉིད་རྣམ་དཔྱོད་སྐྱོ་བས་ཡིན་རྒྱུ་རེད།
དཔེར་ན། “སེམས་དང་སེམས་ལས་བྱུང་བ་ནི།། སེམས་དང་ཡིད་དང་རྣམ་ཤེས་རྣམས།། དོན་གཅིག་མིང་གི་རྣམ་གྲངས་ཡིན།། དབྱེ་ན་མིག་གི་རྣམ་ཤེས་ནས།། ཡིད་ཀྱི་རྣམ་ཤེས་བར་དྲུག་ཡོད།། སེམས་བྱུང་ལྔ་བཅུ་རྩ་གཅིག་སྟེ།། ཀུན་འགྲོ་ལྔ་དང་ཡུལ་ངེས་ལྔ།། དགེ་བ་བཅུ་གཅིག་རྩ་ཉོན་དྲུག། ཉེ་ཉོན་ཉི་ཤུ་གཞན་འགྱུར་བཞིའོ།། ཚོར་བ་འདུ་ཤེས་སེམས་པ་དང་།། ཡིད་ལ་བྱེད་དང་རེག་པ་ལྔ།། གཙོ་སེམས་ཀུན་གྱི་འཁོར་དུ་ནི།། འགྲོ་ཕྱིར་ཀུན་འགྲོ་ཞེས་བྱའོ།། འདུན་པ་མོས་པ་དྲན་པ་དང་།། ཏིང་འཛིན་ཤེས་རབ་ལྔ་པོ་ཡུལ།། བྱེ་བྲག་པ་ལ་འཇུག་ངེས་ཕྱིར།། ཡུལ་ངེས་ཞེས་པར་བཤད་པ་ཡིན།།” ཅེས་པའི་ཚིག་འདི་ལྟ་བུ་ཞིག་ཡིན་ན། བྱིས་པ་ལོ་བརྒྱད་ནས་བཅུ་བར་ཕར་བཞག རྣམ་དཔྱོད་ཡོད་མཁན་ཞིག་མིན་ན། ལོ་བཅོ་ལྔ་ནས་བཅོ་བརྒྱད་པར་ཡིན་ནའང་ཏོག་ཅིག་དཀའ་ལས་ཁག་པོ་རེད་སྙམ། འདིའི་ཐད་ལ་རྣམ་པ་ཚོའི་བཀའ་མོལ་རེ་གསུང་རོགས།
གོང་དུ་གསལ་བའི་ཤད་རྒྱབ་སྟངས་བཞིན་བྱས་ན། ཚིགས་སུ་བཅད་པ་ཞིག་ཏུ་འཐོན་པར་མ་མཐོང་། ཤད་ནི་སོ་མངས་ཀྱི་སོའི་དོན་ཡིན། འདྲ་བ་རྒྱུ་མཚན་དུ་བྱས་ཏེ། ཤད། ཅེས་མིང་ཐོགས། སྔར་གྱི་བོད་དཔེ་སྣེ་རིང་དག་ན་གསལ་བ་བཞིན་དུ། སྙིགས་དུས་ཀྱི་མཁས་པ་དབྱངས་ཅན་གྲུབ་པའི་རྡོ་རྗེས། ཚིགས་བཅད་རྐང་མཐར་གཉིས་ཤད་བྱ། ཞེས་གསུངས། དེས་ན་ཤད་རྒྱབ་སྟངས་འདི་ལྟར་དགོས་ཏེ
བློ་རིག་རྣམ་གཞག་བཤད་པ་ལ། །ཡུལ་ཅན་བློ་དང་ཡུལ་གཉིས་ལས། །སྤྱིར་ན་ཡུལ་ཅན་གྱི་མཚན་ཉིད། །རང་ཡུལ་ཅི་རིགས་ལྡན་པ་ཡི། །དངོས་པོ་དེ་ཡིན་དབྱེ་བ་ནི། །གཟུགས་ཤེས་ལྡན་མིན་འདུ་བྱེད་གསུམ། །རྗོད་བྱེད་སྒྲ་ཀུན་དང་པོ་དང་། །ཤེས་པ་ཐམས་ཅད་གཉིས་པ་དང་། ། གང་ཟག་མཐའ་དག་གསུམ་པ་ཡིན། །བློ་ལ་མཚན་ཉིད་རྣམ་གྲངས་དང་། །དབྱེ་བ་གསུམ་ལས་དང་པོ་ནི། །རིག་པ་བློ་ཡི་མཚན་ཉིད་ཡིན། །བློ་དང་ཤེས་པ་རིག་པ་དང་། །གསལ་བ་རྣམས་ནི་དོན་གཅིག་ཡིན། །དབྱེ་ན་རྣམ་པ་མང་ཡོད་དེ། །རྟོགས་པའི་བློ་དང་མ་རྟོགས་བློ། །
དེ་ཡང་དིང་སང་ཡིག་འཕྲེང་གཅིག་ཏུ་ཚིག་རྐང་གཅིག་བཞག་སྟེ། གཉིས་ཤད་རྒྱབ་པ་ཡོད་ཀྱང་། སོར་མོའི་ཚིགས་བཅད་ནས་མུ་མཐུད་པའི་ཚིགས་སུ་བཅད་པ་འཐོན་མེད་པ་གོང་གི་ཤད་རྒྱབ་སྟངས་ཀྱིས་མངོན་གསལ་དོད་པོ་ལགས། དེས་ན། ནུབ་ཕྱོགས་པ་ཐོག་མ་བོད་ཡིག་སྦྱོང་མཁན། ཧང་གི་སློབ་དཔོན་ཨ་ལེགས་སནྡར་དེ་ཆོ་མ་ཀོ་རོས་དང་། རྒྱ་གར་པའི་བོད་ཡིག་སྦྱངས་པ་རྣམས་ཀྱིས་ཡིག་འཕྲེང་གཅིག་ཏུ་ཚིག་རྐང་གཅིག་བཞག་ན། ཤད་གཅིག་གིས་འཐུས་པར་བྱས་པ་ལེགས་པར་མངོན་ཏེ། དེ་ཡང་མཛེས་བྱའི་ཕྱིར་དུ། ཚིག་རྐང་བཞི་པའི་མཐར་ཚིགས་བཅད་ཀྱི་ཨང་གྲངས་བཀོད་ཏེ་ཤད་བཞི་རྒྱབ་པར་ལེགས་པར་སྣང་སྟེ། དཔེར་ན།
བློ་རིག་རྣམ་གཞག་བཤད་པ་ལ།
ཡུལ་ཅན་བློ་དང་ཡུལ་གཉིས་ལས།
སྤྱིར་ན་ཡུལ་ཅན་གྱི་མཚན་ཉིད།
རང་ཡུལ་ཅི་རིགས་ལྡན་པ་ཡི།། ༡ །།
དངོས་པོ་དེ་ཡིན་དབྱེ་བ་ནི།
གཟུགས་ཤེས་ལྡན་མིན་འདུ་བྱེད་གསུམ།
རྗོད་བྱེད་སྒྲ་ཀུན་དང་པོ་དང་།
ཤེས་པ་ཐམས་ཅད་གཉིས་པ་དང་།། ༢ །།
གང་ཟག་མཐའ་དག་གསུམ་པ་ཡིན།
བློ་ལ་མཚན་ཉིད་རྣམ་གྲངས་དང་།
དབྱེ་བ་གསུམ་ལས་དང་པོ་ནི།
རིག་པ་བློ་ཡི་མཚན་ཉིད་ཡིན།། ༣ །།
བློ་དང་ཤེས་པ་རིག་པ་དང་།
གསལ་བ་རྣམས་ནི་དོན་གཅིག་ཡིན།
དབྱེ་ན་རྣམ་པ་མང་ཡོད་དེ།
རྟོགས་པའི་བློ་དང་མ་རྟོགས་བློ།། ༤ །།
ལེགས་སྦྱར་དུ་རྙེད་པའི་མདོ་རྒྱ་ཆེར་རོལ་པ་དང་། དམ་པའི་ཆོས་པདྨ་དཀར་པོ་སོགས་ན་དེ་ལྟར་ཡོད་འདུག་གོ །ཡིག་ནོར་དག་ལ་ཞུས་དག་མཛད་ན། རང་དང་གཞན་གྱི་བློ་གོང་འཕེལ་ལ་ཕན་པར་འགྱུར། ལོ་གསར་དང་ལོ་ངོ་གྱ་ལྔ་སོན་པས་བྲིས་སོ།