༄༅།། སྦྲ་རིགས་ཡོངས་ལ་གདམས་པའི་སྙིང་གཏམ་མ་ཎི་ཀ།

དཔལ་དགྱེས་པ་རྡོ་རྗེ

 
ན་མོ་གུ་རུ་བུདྡྷ་ཛྙཱ་ན་པདྨ་ཀ་ར་ཡེ།།

སྙིང་དབུས་གཉུག་མའི་དོན་གྱི་དཀྱིལ་འཁོར་གྱི་དབུས་ནས།།
ངེས་དོན་འཇམ་དཔལ་དཔའ་བོའི་ཡེ་ཤེས་ཀྱི་རང་གཟུགས།།
བརྒྱུད་གསུམ་གསང་ཆེན་བསྟན་པའི་ཁྱབ་བདག་རྗེ་མཁྱེན་ནོ།།
སྒོ་གསུམ་མི་ཕྱེད་དད་པས་བླ་མ་ལ་ཕྱག་འཚལ།།

ཤ་རུས་གདུང་རྒྱུད་གཅིག་པའི་དབྲ་རིགས་ཀྱི་ཚོགས་དང་།།
སྦྲ་ཆེན་སྐྱིད་སྡུག་གཅིག་པའི་སྤུན་ཟླ་ཡི་ཕྱོགས་ལ།།
མན་ངག་ཡིད་བཞིན་ནོར་བུའི་ཕྲེང་བ་འདི་འབུལ་བས།།
གཉེན་ཉེའི་དགའ་བདེ་འཕེལ་བའི་སྙིང་གཏམ་ཞིག་ལགས་སོ།།

༡) འཇིགས་རུང་སྲིད་པའི་གྲོང་ཁྱེར་ཆེན་པོ་ཡི་གནས་ན།།
མི་བཟོད་འཁོར་བའི་སྡུག་བསྔལ་ཕ་མཐའ་ཞིག་ཡས་ཀྱང་།།
རྒུད་པ་ཀུན་སྐྱོབ་སྐྱབས་གནས་དཀོན་མཆོག་ལ་བཅོལ་ནས།།
ནམ་ཡང་མི་འདོར་དམ་ཆོས་སྒྲུབ་པ་ལ་རེམ་རེམས།།

༢) ཕྱི་ནང་གསང་བའི་དགེ་སྡིག་ཇི་སྙེད་ཀུན་ཡོད་ཀྱང་།།
བཟང་ངན་སྤྱོད་པའི་རྟེན་འབྲེལ་ཟབ་རྒྱས་ལ་དཔྱོད་དང་།།
བསླུ་མེད་ཡིད་ཆེས་རྙེད་པའི་ངེས་ཤེས་ཞིག་འཁྲུངས་ཕྱིར།།
ངེས་དོན་ལས་འབྲས་ཞིབ་མོའི་རྟུལ་ཞུགས་དེ་མ་བརྗེད།།

༣) དགེ་བཅུའི་སྲོལ་བཟང་འཛིན་པའི་ཆོས་སྡེ་ལ་འབོད་དང་།།
ལུགས་གཉིས་བླང་དོར་ཤེས་པའི་མཁྱེན་རབ་ལ་དབང་བས།།
འདི་ཕྱི་བར་དོར་སྐྱིད་པའི་སྤྲོ་སེམས་ཀྱིས་ཁེངས་ཕྱིར།།
དལ་འབྱོར་མི་ལུས་ཐོབ་པ་དོན་ལྡན་ལ་རེམས་རེམས།།

༤) ངེས་འབྱུང་རྣལ་མས་ཕྱུག་པའི་རབ་བྱུང་གི་སྡེ་དང་།།
ཕ་རོལ་ཕྱིན་དྲུག་སྤྱོད་པའི་རྒྱལ་སྲས་ཀྱི་སེམས་དཔའ།།
གསང་ཆེན་སྔགས་འཆང་རྒྱུད་པའི་རིག་འཛིན་གྱི་སྡེ་ཚོགས།།
མཁས་གྲུབ་དམ་པའི་གདན་ས་སྐྱོང་བ་དེ་སྙིང་གཏམ།།

༥) སྟོང་ཉིད་རྟེན་འབྲེལ་གོ་བའི་དབུ་སེམས་ཀྱི་རྒྱལ་སྲས།།
བདེ་སྟོང་ཕྱག་རྒྱ་མྱོང་བའི་སྒོམ་ཆེན་གྱི་རྣལ་འབྱོར།།
རྫོགས་ཆེན་གནས་ལུགས་རྟོགས་པའི་མཁས་གྲུབ་ཀྱི་རྒྱལ་པོ།།
རང་རིག་ཀུན་བྱེད་རྒྱལ་པོའི་ཐུགས་དམ་དེ་སྤེལ་མཛོད།།

༦) མདོར་ན་ཆོས་མཐུན་སྤྱོད་པ་ཡབ་མེས་ལྟར་བརྟེན་ཅིང་།།
བྱམས་བརྩེ་ཤེས་རབ་ཟབ་མོ་དེང་རབས་དང་འགྲོག་སྟེ།།
གནའ་དེང་ཟུང་གིས་སྒྱུ་རྩལ་འཕྲུལ་ཐབས་ཤེས་ཞིག་ལྡན་ནས།།
སྦྲ་ཆེན་མི་རབས་བསྐལ་བརྒྱར་བརྟན་པ་ཞིག་མཛོད་ཅིག།

ཅེས་པ་འདི་ཡང་རབ་གནས་མེ་སྤྲེལ་ཟླ་ཚེས་དགེ་བར་དབྲ་ཆེན་ཚོགས་པའི་གཉེན་ཉེ་ཡོངས་ལ་གྲོས་འདེབས་སུ་གང་ཤར་དུ་སྦྲ་ཆེན་དཔལ་དགྱེས་པ་རྡོ་རྗེས་ཨེ་ཝྃ་ཀུན་བཟང་ཆོས་གླིང་ནས་བགྱིས་པར་བི་ཛ་ཡནྟུ།། །།ཤི་བྷཾ།།