བེ་རི་རིག་རྡོར
———-
འཇམ་དཔལ་ངག་ལ་དབང་འབྱོར་མཁྱེན་པའི་བློ།།
བཟང་བོའི་འོད་དཀར་ཡེ་ཤེས་དྲ་བ་ཅན།།
བསྟན་འཛིན་རྒྱུ་སར་བྱེ་བའི་འདུན་ས་ཆེར།།
བསྟོད་སྨོན་རྒྱ་མཚོའི་རླབས་ཕྲེང་གདངས་སུ་འགུག།
མ་རྨད་ཚོགས་གཉིས་འོ་མཚོ་འཕྱུར་བའི་རྩེར།།
སྤངས་རྟོགས་བཅུ་དྲུག་ལང་ཚོའི་འཇོ་སྒེག་གིས།།
ནག་ཕྱོགས་མུན་པའི་གཡུལ་ལས་རྒྱལ་བྱེད་པའི།།
དགེ་མཚན་སྣང་བའི་རྩེ་དགའ་ཅི་ཡང་ངོམ།།
འཛམ་གླིང་ཤེས་བྱའི་མཁའ་ལ་རབ་རྩེན་བའི།།
ཞི་བདེའི་རྩིབ་སྟོང་འབར་བའི་མུ་ཁྱུད་ཀྱིས།།
སྲིད་གསུམ་བརྟན་གཡོའི་དངོས་པོ་ཟླུམ་མཛད་པ།།
ལྷར་བཅས་སྐྱེ་དགུའི་གཙུག་ན་རྟག་ཏུ་བརྗིད།།
འཛམ་གླིང་ཞི་བདེའི་ཕོ་ཉའི་མཚན་གྱི་རྔ།།
འཇིག་རྟེན་གླིང་བཞིའི་ཁྱོན་ལ་རབ་བསྒྲགས་ནས།།
བགྲང་བྱ་ཐིག་ལེ་ཟུང་གི་སྨིན་ལེགས་མའི།།
དཀྱུས་རིང་ཟུར་མིག་གཡོ་བའི་དུས་སྟོན་དར།།
སྡོམ་གསུམ་ཚུལ་ཁྲིམས་གཙང་མའི་གསེར་ཡུའི་རྩེར།།
འཆད་རྩོད་རྩོམ་པའི་གོས་བཟང་ལྷབ་ལྷུབ་གཡོ།།
བྱམས་བརྩེ་འདོད་འབྱུང་ནོར་བུའི་ཏོག་མཛེས་པའི།།
རྒྱལ་མཚན་སྲིད་པའི་རྩེ་མོར་བསྒྲེང་གྱུར་ཅིག།
ཁྲག་འཐུང་དུག་གི་ལྗོན་པ་རྨང་ནས་འགྱེལ།།
འཇིགས་སྐྲག་བཟོད་དཀའི་མེ་ལྕེ་ངང་གིས་ཞི།།
མི་མཐུན་གདུག་པའི་དཔུང་ཚོགས་ལས་རྒྱལ་ཏེ།།
ཆོས་ཀྱི་རྒྱལ་སྲིད་ཡུན་དུ་སྐྱོང་གྱུར་ཅིག།
ཞི་བདེའི་པད་དཀར་འདབ་སྟོང་ཕྱོགས་བརྒྱར་བཞད།།
ཡིད་འོང་བྱམས་བརྩེའི་དྲི་བསུང་ཀུན་ཏུ་ལྡིང་།།
རང་བྱུང་འཚེ༌བྲལ་རོ་མཆོག་བཅུད་དུ་འཁྱིལ།།
ཆོས་སྲིད་ཀུན་ད་གཞོན་ནུ་འཛུམ་གྱུར་ཅིག།
ཞི་བདེའི་ཁྲིམས་བཟང་དར་དཀར་ཡུག་གཅིག་གིས།།
འཛམ་གླིང་ཡངས་བའི་ཁྱོན་ལ་དབང་བསྒྱུར་ནས།།
རང་དབང་རིན་ཆེན་མཛོད་ཀྱི་སྒོ་ཕྱེས་ཏེ།།
འཇིག་རྟེན་ཞི་བདེའི་དཔལ་ལ་དབང་ཐོབ་ཤོག།
ཅེས་༧གོང་ས་༧སྐྱབས་མགོན་ཆེན་པོ་མཆོག་གིས་འཛམ་གླིང་ཞི་བདེའི་གསེར་རྟགས་དགྱེས་བཞེས་མཛད་ནས་བགྲང་བྱ་ཧྲིལ་བོ་ཉི་ཤུ་འཁོར་བའི་རྗེས་དྲན་ཙམ་དུ་བེ་རི་རིག་རྡོར་གྱིས། ཕྱི་ལོ་ ༢༠༠༩ ཟླ་ ༡༢ ཚེས་ ༩ ཉིན་གུས་པ་ཆེན་པོས་ཕུལ།
༸རྒྱལ་མཆོག་ཐམས་ཅད་མཁྱེན་པ་ཆེན་པོ་སྐུ་ཕྲེང་བཅུ་བཞི་པར་
ཞབས་བརྟན་དུ་གསོལ་བ་འཆི་མེད་བདུད་རྩིའི་དབྱངས་
སྙན་ཞེས་བྱ་བ་བཞུགས་སོ།།
༄༅། །ༀ་སྭ་སྟི། རྒྱལ་བ་ཀུན་གྱི་བརྩེ་ཆེན་ཡེ་ཤེས་སྐུ། །གཅིག་ཏུ་བསྡུས་པ་གངས་རི་ལྟར་དཀར་བ། །
འཕགས་མཆོག་འཇིག་རྟེན་དབང་ཕྱུག་སྤྲུལ་པའི་སྐུ། །ཁམས་གསུམ་འགྲོ་བའི་བླ་མ་རྒྱལ་གྱུར་ཅིག །
སྲིད་པ་གསུམ་ན་ངོ་མཚར་ཟླ་མེད་པ། །ཨུ་དུམ་ཝཱ་ར་ལྟར་འཕགས་ཐམས་ཅད་མཁྱེན། །
འཛམ་གླིང་བསྟན་འགྲོ་ཡོངས་ཀྱི་གཙུག་ནོར་ཆེ། །རྒྱལ་མཆོག་ཕྱག་ན་པདྨོར་ཞབས་བརྟན་གསོལ། །
གདོད་ནས་མངོན་སངས་རྒྱས་ཀྱང་རྩོད་པའི་དུས། །འགྲོ་རྣམས་ཕྱག་གི་ཡལ་གས་ཉེར་འཛིན་པའི། །
ཐུགས་བསྐྱེད་དམ་བཅའ་རྡོ་རྗེ་ལྟ་བུར་བརྟན། །ས་བཅུའི་དབང་ཕྱུག་ཆེན་པོར་ཞབས་བརྟན་གསོལ། །
བྱང་ཆུབ་ལམ་གྱི་རིམ་པའི་མངོན་རྟོགས་ཀུན། །གསང་བ་གསུམ་དང་དབྱེར་མེད་འདྲེས་པ་ལས། །
མཁྱེན་དང་བརྩེ་བའི་ཡོན་ཏན་བསམ་མི་ཁྱབ། །བྱང་ཕྱོགས་ཐུབ་དབང་གཉིས་པར་ཞབས་བརྟན་གསོལ། །
འཆད་རྩོད་རྩོམ་ལ་ཆགས་ཐོགས་མི་མངའ་ཞིང༌། །སྤོབས་པའི་གཏེར་ཆེན་བརྒྱད་པོ་ཡོངས་སུ་གྲོལ། །
སོ་སོ་ཡང་དག་རིག་པས་ཆོས་སྟོན་པ། །ཕྱོགས་ལས་རྣམ་རྒྱལ་ཆེན་པོར་ཞབས་བརྟན་གསོལ། །
བློ་བཟང་རྒྱལ་བའི་བསྟན་པ་རིན་པོ་ཆེ། །བཤད་སྒྲུབ་ལས་ཀྱི་འཁོར་ལོས་ཕྱོགས་བརྒྱར་སྤེལ། །
རྒོལ་ངན་བདུད་ཀྱི་གླང་པོའི་ཀླད་པ་འགེམས། །འཇིགས་བྲལ་སྨྲ་བའི་སེངྒེར་ཞབས་བརྟན་གསོལ། །
སྣང་གསུམ་རྒྱུད་གསུམ་གསང་སྔགས་ལམ་གྱི་རིམ། །དབང་བཞིའི་རྣལ་འབྱོར་ཟབ་མོས་འགྲོས་བཞི་ཐིམ། །
སྐུ་བཞིའི་ཡེ་ཤེས་མངོན་སུམ་བརྙེས་མཛད་པ། །ཁྱབ་བདག་རྡོ་རྗེ་འཆང་དབང་ཞབས་བརྟན་གསོལ། །
དངོས་པོ་ཀུན་གྱི་གནས་ལུགས་ཕྱག་རྒྱ་ཆེ། །ཟབ་གསལ་གཉིས་སུ་མེད་པའི་ལྷན་སྐྱེས་ཀྱི། །
ཡེ་ཤེས་ཉི་མས་སྲིད་ཞིའི་མུན་སེལ་བ། །རྣལ་འབྱོར་དབང་ཕྱུག་ཆེན་པོར་ཞབས་བརྟན་གསོལ། །
རྒྱུད་སྡེ་རྒྱ་མཚོའི་གསང་བ་ཀུན་གྱི་མཛོད། །སྨིན་གྲོལ་ཁ་འབབ་རྣམ་བཞིའི་རྒྱན་བཟང་པོ། །
སྐལ་བཟང་གདུལ་བྱའི་ཞིང་སར་འདྲེན་མཛད་པ། །གསང་བ་འཛིན་པའི་བདག་པོར་ཞབས་བརྟན་གསོལ། །
འཁོར་འདས་ཆོས་ཀུན་རྟེན་འབྲེལ་རོལ་པར་ཤར། །ཤར་ཡང་གདོད་ནས་སྐྱེ་མེད་རབ་ཞི་བ། །
སྤྲོས་པ་ཀུན་བྲལ་ཟབ་མོ་དབུ་མའི་ལམ། །སྟོན་མཁས་ཀླུ་ཡི་དབང་པོར་ཞབས་བརྟན་གསོལ། །
ཕྱི་ནང་གཞན་གསུམ་དབྱེར་མེད་དུས་འཁོར་ལོ། །ལེགས་པར་འདོམས་མཁས་རིགས་ལྡན་པདྨ་དཀར། །
བྷོ་ཊའི་ལྗོངས་སུ་དགེ་བའི་བཤེས་སུ་སྟོན། །དང་པོའི་སངས་རྒྱས་ངོ་བོར་ཞབས་བརྟན་གསོལ། །
འཁོར་འདས་ཆོས་ཀུན་འོད་གསལ་ཐིག་ལེའི་ཀློང༌། །བྲི་གང་མེད་པ་ལྷུན་གྱིས་རྫོགས་པ་ཆེ། །
བྱར་མེད་རང་གྲོལ་འབྲས་བུའི་རྒྱལ་ས་སྙོགས། །ཀུན་བཟང་གདོད་མའི་མགོན་པོར་ཞབས་བརྟན་གསོལ། །
མདོར་ན་ཐུབ་བསྟན་ཡོངས་རྫོགས་ཤིང་རྟ་ཆེ། །མ་འདྲེས་ཕྱག་གིས་འདྲེན་ལ་བསྙེངས་པ་བྲལ། །
བསྟན་དང་འགྲོ་བ་ཀུན་གྱི་སྐྱབས་གཅིག་པུ། །བསྟན་འཛིན་རྒྱ་མཚོའི་དབང་པོར་ཞབས་བརྟན་གསོལ།།
སྲིད་པ་གསུམ་གྱི་ཆེ་རྒུའི་གཙུག་ནོར་གྱིས། །གང་གི་ཞབས་པད་བཀྲ་ཤིས་འཁོར་ལོ་ལ། །
གུས་ཤིང་འདར་བཅས་ལན་བརྒྱར་བཏུད་པ་ཡིས། །ཆོས་ཀྱི་རྒྱལ་པོ་ཆེན་པོར་ཞབས་བརྟན་གསོལ། །
ལྷ་མིན་བདུད་སྡེ་ཚར་གཅོད་ལྷ་ཡི་དབང༌། །མཐུ་སྟོབས་ནུས་པའི་རྡོ་རྗེ་རྩེ་བརྒྱ་པས། །
ལྟ་ངན་ལོག་ལྟའི་བྲག་རི་འཇོམས་མཛད་པ། །འཇིགས་མཛད་ཧེ་རུ་ཀ་དཔལ་ཞབས་བརྟན་གསོལ། །
ས་དང་ལྷུན་པོ་ཉི་ཟླ་གནས་ཀྱི་བར། །གསང་གསུམ་གཞན་དུ་འགྱུར་བ་མེད་པ་ཡི། །
གྲུ་འཛིན་འཕགས་མཆོག་དགྱེས་པའི་གཞལ་མེད་ཁང༌། །རྡོ་རྗེའི་ཁྲི་ལ་གཞོམ་བྲལ་བརྟན་བཞུགས་གསོལ། །
འཆི་མེད་ལྷ་མཆོག་གསུམ་གྱི་བྱིན་རླབས་དང༌། །བླ་མ་ཡི་དམ་སངས་རྒྱས་བྱང་སེམས་ཀྱི། །
བདེན་པའི་སྟོབས་ཀྱིས་ཇི་ལྟར་གསོལ་བའི་དོན། །གེགས་མེད་འགྲུབ་པར་བྱིན་གྱིས་བརླབ་ཏུ་གསོལ།། །།