ཆུང་ཚེ་རིང་།
སྐུ་ངོ་སྣར་སྐྱིད་ངག་དབང་དོན་གྲུབ་ལགས་ཁ་སང་དགོངས་པ་རྫོགས་པའི་གཏམ་ཐོས། བོད་པ་ཚོས་སྔ་མོ་བོད་རང་གི་མཁས་པ་ལས་རྒྱ་གར་གྱི་ཨ་ཙ་ར་འཁྱམ་པོ་ལ་མཐོང་གཟོས་ཆེ་བ་བྱེད་པ་དང་། དེང་སང་རྒྱ་གར་བར་ཆ་རྒྱུས་བྱུང་རྗེས་མཐོང་ཆེན་བྱེད་ས་དེ་མགོ་སེར་ཚོའི་ཐོག་ཏུ་བབས་ཏེ། གནའ་བཤད་ད་བཤད་གང་དུའང་མགོ་སེར་ལ་ཁུངས་གཏུགས་ཅི་ཐུབ་དང་། བཀུར་བསྟིའི་བཞུགས་གྲལ་དང་། གཏམ་བཤད་བྱེད་མཁན་གྱི་གོ་རིམ་སོགས་གང་ལའང་བོད་རང་གི་མཁས་པའི་གོང་དུ་མགོ་སེར་ཚོ་འཇོག་བཞིན་པའི་དུས་ངན་འདིར། རང་མི་ལ་མཐོང་བྱེད་པ་མཚོན་བྱེད་དུ་ཁོང་གི་སྐོར་གླེང་འོས་པ་འདྲ།
སྐུ་ངོ་སྣར་སྐྱིད་དམ་པ་དེ་ཐོག་མར་མཇལ་བའི་དུས་ནི། ༡༩༩༤ ལོ་རེད། སྐབས་དེར་ང་རིགས་ལམ་སློབ་གཉེར་ཁང་དུ་ཡོད་ཅིང་། སྐུ་ངོ་དམ་པ་དེ་རིགས་ལམ་སློབ་གཉེར་ཁང་གིས་ང་ཚོའི་འཛིན་གྲྭར་སློབ་ཁྲིད་གནང་བར་གདན་འདྲེན་ཞུས་པ་ལྟར། དུས་ཡུན་གང་ཙམ་རིང་གཟའ་འཁོར་རེར་ཐེངས་རེ་སློབ་ཁྲིད་གནང་བར་ཕེབས། སྐབས་དེ་དུས་སྐུ་ངོ་སྣར་སྐྱིད་ཀྱིས་ངེད་ཚོར་མཁས་དབང་དགེ་འདུན་ཆོས་འཕེལ་གྱི་སྐོར་དང་། བོད་གཞུང་གི་སྒྲིག་འཛུགས་སྐོར། བོད་ཀྱི་ལོ་རྒྱུས་ཀྱི་གནད་འགག་འགའ་བཅས་གསུངས་པ་དྲན། སློབ་ཁྲིད་ཀྱི་ཉིན་ཐ་མ་དེར་ཁོང་གིས། ང་ལ་པོ་གསུམ་ཡོད། དེ་ཡང་སྐམ་པོ་དང་། ཐང་པོ། གྲུང་པོ་བཅས་པོ་གསུམ་ཡིན། རྒྱུན་དུ་ལུས་སྦྱོང་དང་ཟས་སྤྱོད་ལ་དོ་སྣང་གིས་ཤ་རྒྱགས་པ་མ་ཆགས་པ་བྱེད་ཀྱི་ཡོད། ཐ་མག་འཐེན་པ་དང་ཆང་རག་འཐུང་བ་སོགས་བྱེད་ཀྱི་མེད། ཐ་ན་ཁ་ལག་ནང་ཚུའུ་དང་ལྗང་ཡུ་སོགས་ཀྱང་མི་དགོས་པ་གཙོ་འདོན་བྱེད་ཀྱི་ཡོད། དེ་འདྲ་བྱས་པ་ལ་བརྟེན་ནས་ང་ཐང་པོ་ཡོད། ཐང་པོ་ཡོད་དུས་གྲུང་རིལ་རིལ་ཐོག་ནས་ལས་ཀ་བྱེད་ཐུབ་ཀྱི་འདུག །ཁྱེད་རང་ཚོས་ཀྱང་སྐམ་པོ་དང་ཐང་པོ། གྲུང་པོ་གསུམ་ཡོང་བ་བྱེད་དགོས་ཞེས་གསུངས་སོང་བ་དེ། ད་དུང་ཡང་གསལ་པོར་དྲན།
༡༩༩༥ ལོ་མཇུག་ནས་ཕྲན་གངས་སྐྱིད་ཀྱི་ལས་བྱེད་ཁོངས་ཞུགས། སྐབས་དེར་གངས་སྐྱིད་ཡོངས་ལ་གློག་ཀླད་གཉིས་ཙམ་ལས་མེད་པས། གཞུང་ཡིག་མང་ཆེ་བ་ལག་བྲིས་མིན་ན་ལྕགས་པར་རྒྱག་དགོས་རེད། ངས་ཐོག་མར་ལག་བྲིས་དང་། རིམ་པས་ལྕགས་པར་རྒྱག་སྟངས་སློབ་སྦྱོང་བྱས། བོད་ཡིག་ལྕགས་པར་གྱི་ཡིག་འབྲུ་དེ་ཚོའི་ཁོངས་སུ་ངས་དེ་སྔོན་རྩ་བ་ནས་མཐོང་མྱོང་མེད་པའི་ཡིག་འབྲུ་ཕ་དང་བ་ལ་ཙ་ཚ་ལྟར་ཕ་ལག་དང་བ་ལག་བསྒར་ཡོད་པ་མཐོང་ཡང་དེའི་རྒྱུ་མཚན་གསལ་པོ་མ་ཤེས། ཕྱིས་སུ་ལྕགས་པར་དེ་ནི་སྐུ་ངོ་སྣར་སྐྱིད་ཀྱི་གསར་གཏོད་ཡིན་པ་དང་། ཕ་དང་བ་ལག་པ་ཅན་དེ་ཡང་། སྐུ་ངོ་སྣར་སྐྱིད་ཀྱིས་དབྱིན་སྐད་ཀྱི་ F དང་ V ཡི་སྒྲ་གདངས་མཚོན་བྱེད་དུ་གསར་བཟོ་བྱས་པ་རེད་འདུག དེའི་སྐོར་ལ་ཁོང་གིས་རྩོམ་ཡིག་ཅིག་ཀྱང་བྲིས་འདུག་པ་བོད་ཀྱི་བརྡ་སྤྲོད་རིག་གནས་སྐོར་གྱི་བགྲོ་གླེང་ཚོགས་འདུའི་དཔེ་དེབ་ནང་བཀོད་འདུག །
ཁོང་གིས་གསར་གཏོད་གནང་བའི་ལྕགས་པར་དེ་ལས་སླ་པོར་བྱུང་བ་ཞིག་ནི་ཡིན་གྱི་མ་རེད། ཐོག་མར་དབྱིན་ཡིག་སོགས་ཀྱི་ལྕགས་པར་གྱི་མཛུབ་མིག་བཀོད་སྒྲིག་བྱེད་སྟངས་དང་། དེ་ལ་མང་མཐའ་མཛུབ་མིག་ག་ཚོད་ཡོད་ཆོག་པ་སོགས་ཞིབ་འཇུག་བྱེད་དགོས། དེ་ནས་བོད་ཡིག་གི་མགོ་ཅན་འདོགས་ཅན་དང་། སྔོན་འཇུག་རྗེས་འཇུག །མིང་གཞི། ལོག་ཡིག མཐུག་པོ་སོགས་ག་ཚོད་ཡོད་པ་དང་དེ་དག་ཇི་ལྟར་ལྕགས་པར་གྱི་མཛུབ་མིག་ནང་ཚུད་པ་བྱ་དགོས་མིན་བསམས་གཞིགས་དང་འཆར་འགོད་བྱེད་དགོས། འཆར་འགོད་དེ་ཡང་བོད་ཡིག་གི་ནང་ནས་བེད་སྤྱོད་ཆེས་མང་ཤོས་རྣམས་མཛུབ་མོས་སྙོབས་བདེ་སར་འཇོག་དགོས་པ་དང་། བེད་སྤྱོད་ཉུང་བ་རྣམས་ལྕགས་པར་མཛུབ་མིག་གི་མཐའ་ལ་འཇོག་དགོས་པས། དེ་ཚོར་ཡང་ཞིབ་འཇུག་དང་བཀོད་སྒྲིག་ཞིབ་ཚགས་བྱེད་དགོས་པ་ཞིག་རེད། བཀོད་སྒྲིག་དེ་ཚོ་ཡང་རྒྱ་གར་གྱི་ལྕགས་པར་བཟོ་གྲྭར་འབྲེལ་གཏུགས་ཀྱིས་གནང་དགོས་པས་ལས་རྙོག་དང་འགྲོ་སོང་ཆེ་ཙམ་ཞིག་རེད། སྐུ་ངོ་སྣར་སྐྱིད་དམ་པ་དེས། ལས་དོན་དེ་དག་ཇི་ལྟར་སྒྲུབ་མིན་དང་། ཁོང་ལ་ཕྱག་རོགས་ཡོད་མེད་སོགས་མི་ཤེས། ཁོང་གིས་གསུངས་པ་ཡང་མི་དྲན། གང་ལྟར་ཁོང་གིས་གསར་གཏོད་གནང་བའི་ལྕགས་པར་དེ་ནི་གངས་སྐྱིད་དུ་ཕྱི་ལོ་ ༢༠༠༡ ཙམ་བར་བེད་སྤྱོད་བྱེད་ཀྱི་ཡོད། ཕྱིས་སུ་བཙན་བྱོལ་ནང་བཟོས་པའི་གློག་ཀླད་ཀྱི་བོད་ཡིག་མཛུབ་མིག་བཀོད་སྒྲིག་བྱེད་སྟངས་ཐད། སྐུ་ངོ་སྣར་སྐྱིད་ཀྱི་ལྕགས་པར་དེས་རྨང་གཞི་ཡག་པོ་བསྐྲུན་ཡོད།
༡༩༦༠ རེ་གྲངས་ནས་ ༧༠ དོན་གྲངས་བར་གྱི་དུས་ཡུན་ནང་། བཙན་བྱོལ་ནང་རྒྱ་ཡིག་ཤེས་མཁན་དཀོན་པས། སྐུ་ངོ་སྣར་སྐྱིད་དམ་པ་དེས། ཕྱི་སྲིད་དྲུང་ཆེ་གནང་ཞོར་རྒྱ་སྐད་རླུང་འཕྲིན་གྱི་གལ་ཆེའི་གསར་འགྱུར་དང་གནས་ཚུལ་ཁག་ཐད་ཀ་ཐད་ཀར་བོད་ཡིག་ཏུ་ཕབ་ནས། ༸གོང་ས་མཆོག་གིས་དབུས་བོད་གཞུང་གི་མཛད་གཙོ་ཚོར་ཕུལ་བ་སོགས་ཞབས་འདེགས་རྔོ་ཐོགས་པ་ཞུས་ཚུལ་གོ་མྱོང་། ནམ་རྒྱུན་བོད་སྐད་དང་དབྱིན་སྐད། རྒྱ་སྐད་གསུམ་ཀའི་ཐོག་ནས་བཀའ་མོལ་གནང་ཐུབ་མཁན་ཞིག་རེད།
ཕྲན་དང་གྲོགས་པོ་བསོད་རྡོར་གྱིས་མཉམ་དུ་གྲོས་མཐུན་དོན་ཚན་བཅུ་བདུན་སྐོར་ལ་དཔྱད་ཞིབ་ཀྱིས་དེབ་ཅིག་བྲིས་རྗེས། སྐུ་ངོ་ཕྲན་སར་ཤེས་རིག་ལས་ཁུངས་ལ་ཐེངས་གཅིག་ཆེད་དུ་ཕེབས་ནས། ཁྱེད་རང་གཉིས་ཀྱི་དེབ་ནང་། གཞུང་ལ་སྲིད་གཞུང་ཞེས་བྲིས་པ་དེ་ཡག་པོ་མི་འདུག །སྲིད་གཞུང་ཞེས་པ་རྒྱ་མི་སླེབས་རྗེས་ཀྱི་འབྲི་སྟངས་ཤིག་རེད། དེ་སྔོན་གཞུང་རང་འབྲི་གི་རེད་ཅེས་ནན་ཏན་ཆེན་པོས་གསུངས་བྱུང་བར། ཕྲན་གྱིས་མོས་མཐུན་མ་ཞུས་ཀྱང་ཁོང་གི་གནང་སྟངས་ལ་གུས་ཞབས་ཞུས་པ་ཡིན།
ཕྲན་གྱིས་འབའ་པ་ཕུན་ཚོགས་དབང་རྒྱལ་གྱི་ལོ་རྒྱུས་བོད་མི་གསར་བརྗེ་བ་ཞེས་པ་དེ་བོད་ཡིག་ཏུ་བསྒྱུར་རྗེས། སྐུ་ངོ་ཡང་ཆེད་དུ་ངའི་ལས་ཁུངས་སུ་ཕེབས་ནས། དེབ་དེ་བསྒྱུར་བ་འགྲིག་མི་འདུག །ཕུན་དབང་ལ་ཆེ་བརྗོད་བྱས་པ་དེ་ཡང་འགྲིག་མི་འདུག །མི་འདི་རྒྱ་མི་བོད་ལ་འཁྲིད་ཡོང་མཁན་རེད་ཅེས་གསུངས་བྱུང་བར། ཕྲན་གྱིས་ཁོང་ལ་གུས་བརྩི་དང་སྦྲགས་རང་ཉིད་ཀྱི་རྒྱུ་མཚན་ཚང་མ་གསལ་པོ་ཞུས། ཁོང་གིས་ཀྱང་ཞིབ་པར་གསན་རྗེས། ཁྱེད་རང་གིས་གོ་ཤེས་ཉན་ཤེས་བྱེད་སྟངས་དང་སོ་སོའི་ལྟ་བ་གསལ་པོར་བརྗོད་པ་དེ་ལ་ང་རྒད་པོ་དགའ་པོ་བྱུང་ཞེས་གསུངས། ཕྱིས་སུ་ཚོགས་འདུ་ཁ་ཤས་ནང་དུའང་ཕུན་དབང་ཡག་པོ་མིན་པའི་སྐོར་གསུངས་པ་ཐེངས་ཁ་ཤས་ཐོས།
བར་སྐབས་ཤིག་ལ་ཁོང་གིས་གཞུང་ལས་སྲིད་གཞུང་ཞེས་འབྲི་མི་འོས་པ་དང་། བོད་ཀྱི་རྒྱལ་དར་དང་རྒྱལ་རྟགས་ཀྱི་ཆ་ཚད་གཅིག་གྱུར་དགོས་པ་སོགས་ཀྱི་ཞུ་འབོད་གནང་སོང་ཞིང་། ཞུ་འབོད་དེ་ཚོ་ཡང་ཁོང་ངོ་མ་འབྲེལ་ཡོད་ལས་ཁུངས་དང་ལས་བྱེད་སར་ཆེད་ཕེབས་ཀྱིས་གནང་སོང་། ཞུ་འབོད་དེ་ཚོར་རྒྱུ་མཚན་བརྟན་པོ་ཇི་ཙམ་ཡོད་མ་ཤེས་ཀྱང་། མྱོང་ཅན་མཁས་པ་ཞིག་གི་ཚད་ནས་དོ་སྣང་དང་ཁུར་བཞེས་སྟངས་དེ་སྣང་བར་འགྲོ་བ་ཞིག་རེད།
སྐུ་ངོ་སྣར་སྐྱིད་ཀྱི་མི་ཚེའི་ཆ་ཤས་གལ་ཆེ་ཤོས་ཤིག་ནི། ༸གོང་ས་མཆོག་གི་མཛད་རྣམ་རྩོམ་སྒྲིག་ཐད་བཏང་སོང་སྙམ་ཡང་། དེའི་ཐད་ཡང་སྙིང་གང་དང་གང་གནང་ཡོད་མེད་ཕྲན་ལ་ཆ་རྒྱུས་མེད། མཛད་རྣམ་དེབ་དེའི་ཆ་ཤས་༸གོང་ས་བཅུ་གསུམ་པ་ཆེན་པོ་མཆོག་གི་རྣམ་ཐར་ཐད་ལ་ཁོང་གིས་ཞིབ་དཔྱད་ཡག་པོ་གནང་མེད་དམ་སྙམ་སྟེ། ཕྱིས་སུ་བོད་ཀྱི་དཔེ་མཛོད་ཁང་གིས་སྐུ་ངོ་སྣར་སྐྱིད་ཀྱི་མཚན་ཐོག་ནས་༸གོང་ས་བཅུ་གསུམ་པ་ཆེན་པོའི་རྣམ་ཐར་དེབ་ཆེན་ཞིག་བཏོན་སོང་དྲན། དེ་མིན་དབྱིན་བོད་ཀྱི་ཚིག་མཛོད་ཅིག་ཀྱང་བརྩམས་འདུག་པ་དེ་ཡང་བོད་ཀྱི་དཔེ་མཛོད་ཁང་ནས་སྤར་འདུག་དྲན།
ངས་སྐུ་ངོ་སྣར་སྐྱིད་དམ་པ་དེ་མཁས་པ་ཆེན་པོ་དང་། མཛད་འཕྲིན་ཧ་ཅང་རྒྱས་པོ་དེ་འདྲ་རེད་དྲན་གྱི་མེད། ཡིན་ན་ཡང་ངས་ཁོང་ལ་གུས་བརྩི་དང་རྗེས་དྲན་ཞུ་གི་ཡོད། གང་ཡིན་ཟེར་ན། ཁོང་གིས་འཇོན་རུང་མ་འཇོན་རུང་། མི་ཚེ་ཧྲིལ་པོ་བོད་དོན་ཆེད་བཏང་བ་རེད། དགྲ་གཉེན་ངོ་ཤེས་པ་རེད། ཐོས་པ་རྒྱ་ཆེན་བསགས་པ་རེད། རང་གི་ལྟ་ཚུལ་གསལ་འདོན་གནང་བ་རེད། རྩོམ་ཡིག་མང་པོ་བྲིས་པ་རེད། ཐབས་ཤེས་མང་པོ་གནང་བ་རེད། རྒྱུ་མཚན་དེ་དག་ལ་བརྟེན་ནས་གུས་འདུད་དང་རྗེས་དྲན་ཞུ། གུས་ཆུང་ཚེ་རིང་གིས་ ༢༠༡༧ ཟླ་ ༢ ཚེས་ ༡༥ ཉིན་ཤར་མར་སྤེལ།།
རྒྱ་གར་ནས་ཁོང་ལ་ཐུག་མ་མྱོང་། ཧོར་འཇིགས་དང་པ་བའི་སྐོར་རྩོམ་ཡིག་འབྲི་རེས་བྱས་པ་ཡིན་ནམ་བརྗེད་ཟིན། ཉིས་སྟོང་བཅུ་ལོར་ཁེ་ན་སྒྲའི་གྲོང་ཁྱེར་ཝེན་ཁོ་ཝེར་དུ་འཚོགས་པའི་རྒྱལ་སྤྱིའི་བོད་རིག་པའི་ཚོགས་འདུའི་སྟེང་འཕྲད་སོང་། ཁོང་གིས་གོང་ས་ཏྰ་ལའི་བླ་མ་སྐུ་ཕྲེང་བཅུ་གསུམ་པའི་སྐབས་ཀྱི་སྲིད་དོན་ལོ་རྒྱུས་ཤོག་ལྷེ་ཁ་ཤས་ཡར་མར་ལ་སྤྲད་ནས་བོད་ནས་ཚོགས་འདུར་བསླེབས་པའི་མི་སེམས་ཆུང་འགའ་རེ་ཅུང་མི་བདེ་བ་བཟོས་སོང་། དེ་ཙམ་མ་གཏོགས་འཆར་སྣང་ཅི་ཡང་མེད།
སྐུ་ངོ་སྣར་སྐྱིད་ངག་དབང་དོན་གྲུབ་ལེགས་སྐུ་གཤེགས་པ་ཐོས། ཁོང་ལན་འགའ་ཤས་མཇལ་མྱོང་། ལན་ཅིག་ཁོང་དང་མཉམ་དུ་རླངས་འཁོར་ཞིག་གི་རྐུབ་སྟེགས་གྲལ་མཚེས་སུ་ཡོད་པ་ན། བོད་ཚིག་ག་ཁ་ཤས་སྐོར་ལ་བགྲོ་གླེང་བྱུང་། སླར་གཞོན་ནུ་བློ་གྲོས་དང་ལྡན་པ་ཞིག་ཏུ་གྱུར་ནས། བོད་སྐད་ཉམས་པ་དེ་སླར་ཡར་སླང་ཐུབ་པའི་མཁས་པ་འགྲན་ཟླ་མེད་པ་ཞིག་གྱུར་ཅིག སྨོན་ནོ།
ཧཧཧཧཧ་་་་སྐུ་ངོ་ལྟ་ཞེན་ཅན་ཞིག་རེད་འདུག་ཨང་། ཕུན་དབང་མེད་ན་གུང་བྲན་བོད་ལ་ཡོང་མི་ཐུབ་པ་དེ་འདྲ་བསམ་མཁན་་་་་་་ཧིན་་་་་
མི་ཀླད་པ་ཅན་ཚོར་སྐད་ཆ་དགོད་བྲོ་པོ་དེ་འདྲ་ཡོད། ཕུན་དབང་སྐྱེས་ཀྱང་རུང་མ་སྐྱེས་རུང་། རྒྱ་མི་བོད་པ་ཡོང་གི་རེད། ཐར་གྱི་རེད། དེས་ཕུན་དབང་དྲུད་ནས་ཕན་མི་ཐོགས།
འདས་པ་རྗེས་འདེད་བྱེད་པ་བྱིས་པའི་བློ་།
མ་འོངས་མདུན་བསུ་བྱེད་པ་རྒན་ཁོག་བློ་།
ད་ལྟ་ལག་ལེན་ལྟར་བ་མཁས་པའི་བློ་།
དུས་གསུམ་མཉམ་སྲེས་བྱེད་པ་རྩིས་མཁན་བློ་།
ཨ་ཙ་ར་མ་རེད། ཨཱ་ཅརྱ་རེད། གོ་དོན་ནི། སློབ་དཔོན་ཞུ་བ་རེད།
ཨ་ཙ་ར་དང་ཨཱ་ཅརྱ་ངོ་མི་ཤེསཔའི་མཁས་པ་ཧ་ཧ་
སྔོན་ཆད་རྒྱ་གར་ལ་ཨཱཅྱ་ཟེར་བ་སློབ་དཔོན་ལ་སྦྱོར་བ་ཡིན་ཤག ཡིན་ནའང་། རང་རེ་བོད་ལ་ཝ་ན་མཐོ་སློབ་ནས་ཨཱཅྱ་ཟེར་བ་དེ་འདྲ་ཁ་ཤས་བྱུང་བ་དེ་ཚོའི་ནང་ན། སློབ་དཔོན་དང་མཁས་པ་ཡིན་པ་མི་འདུག དེའི་་རྒྱུ་མཚན་གྱིས་ཨཱཅྱ་ལབ་ན། ག་རེ་ཡིན་པ་ཤེས་མཁན་ཡང་དཀོན་པོ་ཆགས་པ་མིན་འགྲོ། སྐུ་རྩེད་ཡིན་ད།
ཨཱ་ཅརྱ་་་་རེད།
༅༅། བགྲེས་པ་རྣམ་པ་རིམ་བཞིན་སྐུ་གཤེགས་ཕེབས།
གཞོན་པ་རྣམས་ནི་ནུབ་ཕྱོགས་ལུང་པར་བསྐྱོད།
བོད་ཀྱི་སྐད་ཡིག་རིག་གནས་རྩ་ཆེན་རྣམས།
རིམ་བཞིན་ཡལ་བར་འདྲོ་བ་སེམས་རེ་སྐྱོ།
ཆུང་ཚེ་རིང་གིས་བྲིས་པ་འདི་དྲང་བོ་དྲང་རྐྱང་རེད་བསམ་སོང་།
ཨ་ཙ་ར་ཟེར་ན་རྒྱ་གར་གྱི་གཅེར་བུའི་ཆོས་བྱེད་མཁན་ (ས་ཏུ་སྦ་ཝ་ལ་གོ་དགོས་པ་དང་)
(ཨཱ་ཅརྱ་)ཟེར་ན་སློབ་དཔོན་ལ་གོ་དགོས་པ་མ་རེད་དམ་?
ཧ་ཧ། ཝར་ཎ་མཐོ་སློབ་ནས་ཐོན་མཁན་ཚང་མ་ལ་སློབ་དཔོན་གྱི་ཤེས་ཚད་ཡོད་པའི་ཁྱབ་པ་གང་ཡང་མེད། དཔེར་ན། དུས་རབས་དྲུག་པ་དང་བདུན་པ་ཙམ་ནང་སྙན་གྲགས་ལྡན་པའི་དཔལ་ན་ལནྜ་མཐོ་སློབ་ནས་ཐོན་མཁན་རྣམས་ལ་གཟིགས་ན་ཤེས་ནུས། ད་ལྟ་ང་ཚོ་བོད་ཀྱི་ཆོས་བརྒྱུད་ཁག་གིས་བཞེད་སྲོལ་ནང་རྒྱན་དྲུག་མཆོག་གཉིས་ཞུ་བ་དང་། ལ་ལས་པཎ་གྲུབ་བཅུ་བདུན་ཞུ་བ་རྣམས་ཆེས་སྙན་ལྡན་པའི་མཐོ་སློབ་དེ་ལྟ་བུའི་ནང་མི་དེ་ཙམ་ཞིག་མ་བྱུང་བ་གང་ཡིན་པ་དེས་རྟོགས་སླ།
ཆུང་ཚེ་རིང་གིས་སྐུ་ངོ་སྣང་སྐྱིད་ཡར་བཏེགས་ཞོར་རང་ཉིད་མཁས་པར་སྒྲུབ་སོང་། ཧཧཧཧ སྐུ་ངོ་མཆོག་གི་ལོ་མང་མཁས་པའི་ཉམས་མྱོང་རྣམས་ལ་ཁས་མི་ལེན་ཟེར།
དྲང་པོ་བྲིས་འདུག
སྣར་སྐྱིད་མཁས་པ་ཞིག་རེད་མི་འདུག་སྟེ། ལོ་རྒྱུས་མི་སྣ་གལ་ཆེན་ཞིག་ཆགས་པ་རེད།
དམར་ཤོག་བོད་ལ་འཁྲིད་ནས་རམས་འདེགས་ཞུ་མཁན། འབའ་བ་ཕུན་ཚོགས་ལ་སོགས་པ་རེད།
མི་ཕོ་ཁོང་གི་མཛད་བརྗེས་ལ་ཡིད་རང་དང་ཞུ།
མི་ཕོ་ཁོང་གི་གསར་གཏོད་གནང་བའི་ལྕགས་པར་དེ་ཁོ་ནས་མཁས་པ་ཡིན་པ་མཚོན་ཐུབ།
ལོ་ངོ་གཅིག་སྟོང་ཡས་མས་སུ་རྒྱ་གར་ན་ནང་པ་དང་ཕྱི་རོལ་པའི་པཎྚི་ཏ་ཚོས་སྒྲ་དང་ཚད་མ་སོགས་རྩོད་པ་བྱེད་སྲོལ་ཡོད་ས་རེད། ནཱ་ལན་ཊ་སོགས་དགོན་པོ་ཆེན་པོ་དེ་ཚོར་པཎྚི་ཏའི་སྒོ་སྲུང་ཡོད་པ་ལོ་རྒྱུས་ནང་དུ་གསལ། དེང་དུས་རྒྱ་གར་ན་ཕྱི་རོལ་པའི་རྟོག་གེ་རིགས་པར་མཁས་པ་ཆེན་པོ་སྔོན་ཆད་བཞིན་ཨེ་ཡོད་ན། ད་དུང་སྔགས་པ་མང་པོ་ཡོད་ས་རེད་མ་གཏོགས་མཁས་པ་ཆེན་པོ་ཡོད་དམ། །