ཨ་རུ་ར།
གངས་ལྗོངས་གསོ་བ་རིག་པའི་ཕྱི་མོའི་གཞུང༼དཔལ་ལྡན་རྒྱུད་བཞི༽ཡི་བྱུང་ཚུལ་ལ་བཞད་པ་མི་མཐུན་པ་གང་མང་ཞིག་མཆིས་པས། འདིར་བཞད་ཚུལ་མི་འདྲ་བ་བཅུ་ཡི་སྙིང་བོ་མདོར་བསྡུས་ཙམ་བཀོད་ཡོད། བློ་ལྡན་སྐྱེས་བུ་ཀུན་གྱིས་དཔྱད་པར་འཚལ།
གཅིག སངས་རྒྱས་ཀྱིས་ཞལ་ནས་གསུངས་པའི་བཀའ་ཡིན་པར་འདོད་པ།
ལོ་རྒྱུས་སྟེང་སྨན་དཔྱད་ལ་མཁས་པར་གྲགས་པ་ཕལ་མོ་ཆེས་སངས་རྒྱས་ཀྱིས་གསུངས་པའི་བཀའ་ཡིན་པར་ཁས་ལེན་བྱེད།དེའི་རྒྱུ་མཚན་ནི་རྒྱུད་བཞིའི་བསྒྲིགས་ཚུལ་བཀའ་དང་མཐུན་ཞིང་བླ་བརྒྱུད་ཀྱང་སངས་རྒྱས་སྨན་བླའི་བར་དུ་ཐར་ཆགས་སུ་གཏུགས་ཡོད། ཁོག་འབུགས་རྙིང་ཤོས་གྲས་བྲང་ཏི་དཔལ་ལྡན་འཚོ་བྱེད་ཀྱིས་བརྩམས་པའི༼ཤེས་བྱ་རབ་གསལ༽
དང་།བྱང་བ་བཀྲ་ཤིས་དཔལ་བཟང་གི༼རྣམ་ངེས་དཔག་བསམ་ལྗོན་ཤིང༽མཚོ་སྨད་མཁན་ཆེན་སྐ་བ་ཤྰཀྱ་དབང་ཕྱུག་གི་༼ལེགས་བཤད་དངུལ་དཀར་མེ་ལོང༽སོགས་སུ་གསུངས་ཡུལ་ཅུང་མི་མཐུན་ཙམ་ལས།རྒྱུད་བཞི་སྟོན་པས་གསུངས། དྲང་སྲོང་ཡིད་ལས་སྐྱེས་ལ་གཏད། དྲང་སྲོང་རྣམས་ཀྱིས་བསྡུས།བེ་རོ་ཙ་ནས་བོད་སྐད་དུ་བསྒྱུར།ཆོས་རྒྱལ་ཁྲི་སྲོང་གི་དུས་གཏེར་དུ་སྦས་པ་གཏེར་སྟོན་གྲྭ་བ་མངོན་ཤེས་ཀྱིས་བཏོན།གཡུ་ཐོག་པས་དར་རྒྱས་མཛད་པའི་ཚུལ་སོགས་གསལ་ཡོད། ལྷག་པར་བྱང་བ་བཀྲ་ཤིས་དཔལ་བཟང་གིས༼རྒྱུད་བཞི་བཀའ་སྒྲུབ༽མཛད་ཡོད་ཅིང་།སྡེ་སྲིད་ཀྱི་བཻ་དཀར་གཡའ་སེལ༽ལས་ཀྱང་།སངས་རྒྱས་བཅོམ་ལྡན་འདས་དགུང་ལོ་དོན་གཅིག་ལ་རྒྱུད་བཞི་གསུངས་པར་བཞེད་པ་དང་།སོག་པོ་ལུང་རིགས་བསྟན་དར་གྱིས་ཀྱང་དེ་མཚུངས་རྒྱུད་འདི་བཀའ་ཡིན་ཞིང་རྒྱ་གར་ནས་བྱུང་བར་བསྒྲུབས་ཡོད།
གཉིས། བོད་མཁས་པས་བརྩམས་པའི་བསྟན་བཅོས་སུ་འདོད་པ།
རྒྱུད་འདི་བསྟན་བཅོས་སུ་འདོད་མཁན་གཙོ་བོ་ནི།ཟུར་མཁར་བློ་གྲོས་རྒྱལ་པོ་དང་། པན་ཆེན་ཤྰཀྱ་མཆོག་ལྡན། བོ་དོང་ཕྱོགས་ལས་རྣམ་རྒྱལ།སྟག་ཚང་ལོ་ཙཱ་བ། ཀོང་སྤྲུལ་ཡོན་ཏན་རྒྱ་མཚོ། སི་ཏུ་པན་ཆེན། སྐྱེམས་པ་ཚེ་དབང་།འཚོ་བྱེད་ཆོས་སྐྱོང་དཔལ་བཟང་སོགས་ཡིན་ལ། དེ་ཡང་ཟུར་མཁར་བློ་གྲོས་རྒྱལ་པོས་མཛད་པའི༼རྒྱུད་བཞི་བཀའ་བསྟན་གྱི་རྣམ་བཞག་མུན་སེལ་སྒྲོན་མེ༽ལས།རྒྱུད་བཞི་རྩོམ་མཁན་ནི་གཡུ་ཐོག་པ་ཆེས་ཡོངས་སུ་གྲགས་པའི་མཁས་གྲུབ་ཆེན་པོ་དེ་ཉིད་ཡིན་ནོ།། ཞེས་གཡུ་ཐོག་ཡོན་ཏན་མགོན་པོ་ཡིན་པར་གསུངས་པ་དང་།ཡང་མངའ་རིས་འཚོ་བྱེད་ཆོས་སྐྱོང་དཔལ་བཟང་གིས་མཛད་པའི༼གསོ་བ་རིག་པའི་ཁོག་འབུགས་བདུད་རྩི་ཆུ་རྒྱུན༽ཞེས་པ་ལས་རྒྱུད་འདི་ཡང་དགོས་པའི་དབང་གིས་ཁ་འཕངས་པ་ཡིན་ཏེ་དོན་ལ་གཡུ་ཐོག་ཡོན་ཏན་མགོན་པོས་མཛད་དོ།། སོགས་བོད་རང་གི་བསྟན་བཅོས་སུ་བསྒྲུབས་ཡོད།
གསུམ། བཀའ་བསྟན་དབྱེར་མེད་དུ་འདོད་པ།
དེ་ཡང་སྐྱེམས་འགྲེལ་ལེགས་བཤད་སྨྲ་བའི་མཆོག་ཐོབ་ལས། རྒྱུད་ཆེན་འདི་ཉིད་ནི།རྩོམ་གཞི་ལུང་གི་བརྒྱུད་པ། རྣམ་དཔྱད་འཆད་ཉན་གྱི་བརྒྱུད་པ།སྤྲུལ་བ་དོན་གྱི་བརྒྱུད་པ་གསུམ་གྱི་དང་པོ་ལྟར་ན་སངས་རྒྱས་སྨན་གྱི་བླ་འོད་ཀྱི་རྒྱལ་པོའི་བཀའ་དང་།གཉིས་པ་ལྟར་ན་པཎྜིཏའི་བསྟན་བཅོས།གསུམ་པ་ལྟར་ན་རྗེ་བཙུན་མཧྰ་གུཎས་གསོ་དཔྱད་གཞུང་ལུགས་བཏུས་ཏེ་མར་གྱི་སྙིང་པོ་ལྟར་གཅིག་ཏུ་དྲིལ་བ་ཡིན་ཞེས་བཀའ་དང་བསྟན་བཅོས་གང་དུའང་ངོས་འཛིན་ཆོག་པར་གསུངས་ཡོད།
བཞི། བོན་སྟོན་གཤེན་རབ་ཀྱིས་གསུངས་པར་འདོད་པ།
གཡུང་དྲུང་བོན་གྱི་བསྟན་འཛིན་མཁས་དབང་རྣམས་དང་།དེང་དུས་ལོ་རྒྱུས་སྨྲ་བའི་མཁས་དབང་ནམ་མཁའི་ནོར་བུ།མཁར་རྨེའུ་བསམ་གཏན་སོགས་ཀྱིས་རྒྱུད་བཞི་ནི་འབུམ་བཞི་ལས་བྱུང་བར་འདོད་པ་སྟེ།བོད་འདིར་ཆོས་མ་དར་གོང་ནས་བོན་དར་བ་དང་།འབུམ་བཞི་མཚོན་པའི་བོན་ལ་བསྟེན་པའི་སྨན་དཔྱད་ཀྱི་གཞུང་ལུགས་ཕུན་སུམ་ཚོགས་པ་ཡོད་ཚུལ་བསྒྲུབས་དང་སྒྲུབ་བཞིན་པ་མ་ཟད།ཐང་ཡིག་ཤེལ་བྲག་མའི་ནང་། བེ་རོ་ཙ་ནས་བོན་ཆོས་འདྲེས་མར་བསྒྱུརཿ གསུངས་པ་དེ་དང་།ལོ་རྒྱུས་སྟེང་ཡོངས་སུ་གྲགས་པའི་སློབ་དཔོན་པདྨ་འབྱུང་གནས་ཀྱིས་བོན་རྣམས་དཀར་པོའི་ཆོས་ལ་བསྒྱུར་ཞེས་པའི་ཚིག་དེ་དག་སྒྲུབ་བྱེད་དུ་བཀོད་དེ་བོན་གྱི་མདོས་ཆོག་རྣམས་ངོ་བོ་སངས་རྒྱས་ཆོས་ལུགས་སུ་བསྒྱུར་ཅིང་།རྣམ་པ་རང་གཞུང་ལྟར་བཞག་ཡོད་པའི་དཔང་རྟགས་གཏོ་ཡས་གླུད་ཀྱི་རིགས་དང་། རི་གསོལ་ལྷ་མཆོད་ཀྱི་ལུགས།ལྷག་པར་དུ༼བེ་དཀར༽དང༼ཉེར་བུམ༽སོགས་རྩིས་གཞུང་དག་ལས་གཏོ་བཅོས་དང་རིམ་གྲོའི་རྣམ་བཞག་རིགས་གསུངས་སྐབས་རང་ལུགས་རེ་དང་བོན་ལུགས་རེ་བཞག་ཡོད་པ་འདིས་བོན་ཆོས་དེ་ནང་ཆོས་དང་འདྲེས་པའམ་ཤན་ཤུགས་ཐེབས་པ་ལྟར།རྒྱུད་བཞི་ཡང་སྐབས་དེ་ཙམ་ཞིག་ནས་འབུམ་བཞི་ལས་ཟུར་དུ་ཕྱུངས་ཚུལ་བཤད་དོ།།
ལྔ། རྒྱ་ནག་ནས་བསྒྱུར་པར་འདོད་པ།
ཡང་གནའ་དེང་གི་ལོ་རྒྱུས་སྨྲ་བ་པོ་ཁག་ཅིག་གིས།ཐང་ཡིག་ལེའུ་བརྒྱད་ཅུ་གྱ་ལྔ་བ་ལས་འབྱུང་བའི་རྒྱ་ནག་སྨན་པ་ཧ་ཤང་དེ་བ་དང་།བླ་སྨན་ཉང་བཙན་ཤི་ལ་ལ་སོགས་པས། ཡན་ལག་བརྒྱད་པ་བདུད་རྩི་སྙིང་པོ་དང་།སྨན་གྱི་བཅུད་ལེན་བྱེད་ཐབས་མང་པོ་བསྒྱུར།ཞེས་པའི་ཚིག་འདི་ལུངས་དྲངས་ཏེ་རྒྱལ་པོ་མེས་ཨག་ཚོམ་གྱི་སྲས་འཇང་ཚ་ལྷ་དབོན་གྱི་བཙུན་མོར་རྒྱ་ནག་ནས་གྱིམ་ཤིང་ཀོང་ཇོ་བསུས་སྐབས་སྨན་དཔྱད་ཀྱི་གཞུང་མང་བསྣམས་པ་ལས་རྒྱུད་འདི་ཡང་དེའི་ཁོངས་སུ་ཡོད་པ་ཧ་ཤང་དེ་བ་དང་བཙན་པ་ཤི་ལ་ཧ་སོགས་ཀྱིས་བསྒྱུར་བར་འདོད།
དྲུག བྲམ་ཟེའི་ལུགས་ཀྱི་རིག་བྱེད་བསྟན་བཅོས་སུ་འདོད་པ།
རྒྱུད་བཞིའི་ནང་།སྔོན་གྱི་དུས་སུ་ལྷ་དང་ལྷ་མིན་གྱིས། །བདུད་རྩི་འདོད་པས་རྒྱ་མཚོ་བསྲུབས་པ་ལས།།ཞེས་སོགས་རིག་བྱེད་ཀྱི་གཏམ་རྒྱུད་མང་པོ་འདྲེས་ཡོད་པས་རིག་བྱེད་ཀྱི་བསྟན་བཅོས་སུ་འདོད་པ།
བདུན། བེེ་རོས་པཎ་ཆེན་ཙནྡྲ་དེཝ་ལས་ཞུས་པར་འདོད་པ།
ཡང་འགའ་རེས།ལོ་ཙཱ་བ་བེེ་རོ་རྒྱ་གར་དུ་ཕེབས་ནས་པཎ་ཆེན་ཙནྡྲ་དེཝ་ལ་རྒྱུད་བཞི་ཞུས་ཏེ་ཕྱིར་ཕེབས་དུས་གཡུ་ཐོག་རྒྱ་གར་དུ་ཕེབས་པ་དང་མཇལ་ནས་གཡུ་ཐོག་གིས་བདག་རྒྱ་གར་ནས་མ་འཁོར་བར་རྒྱུད་བཞི་གཏེར་རུ་སྦོས་ཞེས་གསུངས་བ་ལུང་དྲངས་ཏེ།བེེ་རོས་པཎ་ཆེན་ཙནྡྲ་དེཝ་ལས་ཞུས་པར་བསྒྲུབས་བཞིན་ཡོད།
བརྒྱད། གཡུ་ཐོག་སྐུ་ངོ་མས་སློབ་དཔོན་ཙནྡྲ་དེཝའི་དྲུང་ནས་ཞུས་པར་འདོད་པ། ཡང་གཡུ་ཐོག་རྣམ་ཐར་ལས་འབྱུང་བ་བཞིན།གཡུ་ཐོག་རྒྱ་གར་དུ་ཕེབས་ཏེ་སྐུ་ངོ་མས་སློབ་དཔོན་ཙནྡྲ་དེཝའི་དྲུང་ནས་རྒྱུད་བཞིའི་ཆ་ལག་ཁ་སྐོང་དང་བཅས་ཞུས་ཚུལ།
དགུ། སློབ་དཔོན་པདྨ་འབྱུང་གནས་དང་། ཁ་ཆེ་ཟླ་དགའ། བེེ་རོ་གསུམ་གྱིས་མཛད་པར་འདོད་པ། ད་དུང་རེས་འགས་སློབ་དཔོན་པདྨ་འབྱུང་གནས་དང་། ཁ་ཆེ་པན་ཆེན་ཟླ་བ་མངོན་པར་དགའ་བ།ལོ་ཆེན་བེ་རོ་ཙ་ན་གསུམ་གྱིས་མཛད་པར་གསུངས།
བཅུ། གྲྭ་བ་མངོན་ཤེས་དང་། དབུས་པ་དར་གྲགས། རོག་སྟོན་དཀོན་མཆོག་སྐྱབས་གསུམ་གྱིས་མཛད་པར་འདོད་པ། ཡང་མཁས་པ་རིགས་ཅིག་གིས་གཏེར་སྟོན་གྲྭ་བ་མངོན་ཤེས་དང་།དབུས་པ་དར་གྲགས། རོག་སྟོན་དཀོན་མཆོག་སྐྱབས་གསུམ་གྱིས་སྐྱིད་སྨད་ཚར་པ་སྣའི་རི་གདོང་དུ་མཛད་པར་གསུངས་བ་སོགས་རྒྱུད་བཞིའི་བྱུང་ཚུལ་ལ་ལོ་རྒྱུས་སྟེང་དུས་ད་ལྟའི་བར་བཞེད་པ་མི་མཐུན་པ་བཅུ་ཙམ་བྱུང་ཡོད།
འདི་འདྲའི་མི་མཐུན་པ་མང་པོ་ཞིག་ཡོད་དུས། ད་ཞིབ་འཇུག་མ་བྱེད་པར་ཁུ་སིམ་མེར་སྡོད་ན་མི་བཟང་ངམ། ཞིབ་འཇུག་མང་པོ་བྱེད་ན་ཐམས་ཅད་ཀྱི་ཁུངས་བོན་ལ་ཐུག་སྲིད་པ་རེད། རང་རེའི་བཀའ་འགྱུར་ནང་ན་ཀླུ་འབུམ་དཀར་ནག་ཁྲ་གསུམ་བོན་རང་དུ་བཞག་འདུག་ཟེར་བ་ཞིག་ཐོས། གལ་ཏེ་བདེན་ན་རང་རེའི་བཀའ་འགྱུར་ཕལ་མོ་ཆེ་བྱུང་ཁུངས་བོན་པོ་ཡིན་སྲིད་པ་རེད། །
འབུམ་བཞི་བཀླགས་མྱོང་མཁན་ཞིག་ཡིན་ན། རྒྱུད་བཞི་གང་ནས་ཇི་ལྟར་བྱུང་བའི་བརྒྱུད་རིམ་ཅིག་ངོ་འཕྲོད་ཐུབ། ཡིན་ནའང་། ང་ཚོའི་སྤྱི་ཚོགས་ནང་ལ་གཏམ་བདེན་པ་དེ་རྒྱུག་ཆུང་།
བྱང་བ་བཀྲ་ཤིས་དཔལ་བཟང་གི༼རྣམ་ངེས་དཔག་བསམ་ལྗོན་ཤིང༽ཞེས་འདུག
བྱང་བ་བཀྲ་ཤིས་དཔལ་བཟང་གི་ལོ་རྒྱུས་ཤེས་མཁན་ཡོད་ན་འདིར་མདོར་བསྡུས་ཤིག་གནང་རོགས།
རྩོམ་ཡིག་འདི་སྨན་རྩིས་ཁང་གི་འབུམ་རམས་པ་ཆོས་ལོ་མཐར་ལགས་ནས་ལོ་ཤས་གོང་བལ་ཡུལ་གྱི་རྒྱལ་སྤྱིའི་ཚོགས་ཆེན་ཞིག་གི་སྟེང་སྒྲོག་སྦྱངས་དང་། དྲི་བ་དྲིས་ལན་འདེབས་གནང་སོང་། དེ་དུས་གུས་པ་རང་ཉིད་སློབ་ཕྲུག་ཅིག་གི་ངོས་ནས་ཚོགས་བཅར་ཞུ་རྒྱུ་བྱུང་འདིའི་ངོ་བཤུས་ང་ལ་ཡང་ཡོད།
གཟུ་བོའི་བློས་དཔྱད་ན་འཕགས་ཡུལ་གྱི་གསོ་དཔྱད་ཡན་ལག་བརྒྱད་པ་སོགས་ཚེའི་རིག་བྱེད་ཀྱི་གཞུང་ལ་ཁུངས་མ་གཏུགས་པར་གཡོལ་ས་མེད་པ་ཡིན། བཻ་རོ་ཙ་ན་དང་གཡུ་ཐོག་གསར་རྙིང་། ལོ་ཆེན་རིན་ཆེན་བཟང་པོ་སོགས་ཀྱིས་འཕགས་ཡུལ་དུ་བསྐྱོད་ནས་སྨན་དཔྱད་ཀྱི་གཞུང་བོད་དུ་དྲངས་པ་མ་གཏོགས་འཕགས་ཡུལ་གྱི་མི་བོད་དུ་ཡོང་ནས་སྨན་དཔྱད་ཀྱི་གཞུང་རྒྱ་གར་གྱི་སྐད་དུ་བསྒྱུར་བ་གཅིག་ཀྱང་མེད་པ་ཡིན། མདོར་ན་སྒྲ་ཚད་བཟོ་གསོ་ནང་དོན་རིག་པའི་ཁུངས་འཕགས་ཡུལ་ཡིན་པ་གཟི་བརྗིད་དོ།
རྒྱུད་བཞིའི་འགྲེལ་པ་མེས་པོའི་ཞལ་ལུང་དང་། བཻཌཱུརྱ་སྔོན་པོ། སྐྱེམས་འགྲེལ་སོགས་ཚང་མའི་ནང་ཡན་ལག་བརྒྱད་པ་ལུང་འདྲེན་གནང་ཡོད། དངུལ་ཆུ་གྲུབ་པའི་བསྟན་བཅོས་ཀྱང་གྲུབ་ཆེན་ཨོ་རྒྱན་པ་རིན་ཆེན་དཔལ་གྱིས་འཕགས་ཡུལ་ནས་གདན་དྲངས་པའོ།
ངས་བསམ་ན་རྒྱུད་བཞི་བྱུང་ཁུངས་གང་ཡིན་ལས་སླ་བོ་རེད་སྙམ། རྒྱ་གར་གྱི་ནང་ཆོས་ཉམས་ཀྱང་སྨན་གཞུང་ཉམས་མི་སྲིད་པ་རེད། དྲི་བ་ལ། རྒྱ་གར་སྐད་ཀྱི་རྒྱུད་བཞི་ཨེ་འདུག་བལྟ་རྒྱུ་དེ་རེད། གལ་ཏེ་མེད་ན་ཨུ་ཚུགས་བྱེད་ཡ་ཡོད་པ་མ་རེད། གལ་ཏེ་རྒྱ་གར་སྐད་ཀྱི་རྒྱུད་བཞི་ཡོད་ན་ནི། ཁུངས་བསྐྱལ་ས་དེ་རང་རེད། །
བྱང་ཆུབ་ལོ་མ་ལགས་ནས་ལྷ་བཙུན་བཀྲ་ཤིས་དཔལ་བཟང་གི་ལོ་རྒྱུས་རེ་སྐུལ་ཞུས་དོན་ལྟར།
ལྷ་བཙུན་བཀྲ་ཤིས་དཔལ་བཟང་ནི། མིའི་ཉི་མ་མཐོང་བ་དོན་ལྡན་གྱི་རིགས་སྲས་ཡིན་ལ། སྐུ་ཆུང་དུས་མེས་པོ་བསོད་ནམས་རྡོ་རྗེས་གཅེས་པར་བསྐྱངས་ཤིང་། ཡི་གེ་འབྲི་ཀློག་གིས་མཚོན་པའི་ཐོས་བསམ་རྒྱ་ཆེར་མཛད། ཕྱིས་མེས་དང་ཡབ་གཉིས་ཀར་གསོ་བ་རིག་པའི་གཞུང་ལུགས་རབ་འབྱམས་རྒྱ་མཚོ་མཐའ་དག་དང་། ལྷག་པར་རྒྱུད་བཀའ་གཏད་རྒྱའི་དབང་དང་། ཆུའི་ལྷ་མོ། སྙན་བརྒྱུད་འགྲེལ་ཆེན་ཕྱི་ནང་གསང་གསུམ། རྒྱས་བཏབ་ཉེར་ལྔའི་བཤད་སྲོལ་དང་བཅས་པ་གསན་ཞིང་། སྐལ་བ་དང་ལྡན་པའི་རྗེས་འཇུག་རྣམས་ལས་གསོ་དཔྱད་ཀྱི་འཆད་ཉན་ལེགས་པར་བསྐྱངས། པཎྜི་ཏ་ནགས་ཀྱི་རིན་ཆེན། ལོ་ཆེན་བསོད་ནམས་རྒྱ་མཚོ། སེམས་དཔའ་ཆེན་པོ་གཞོན་ནུ་རྒྱལ་མཆོག མུས་ཆེན་དཀོན་མཆོག་རྒྱལ་མཚན། གྲུབ་དབང་ཐང་སྟོང་། མཁས་གྲུབ་དོན་ཡོད་དཔལ་བ། ལེགས་བཤད་བཟང་པོ། ཆག་ལོ་ཐམས་ཅད་མཁྱེན་པ་སོགས་འཁྲུལ་ཟད་ཀྱི་ཡོང་འཛིན་དུ་མའི་ཞབས་པད་བསྟེན་ཏེ་མདོ་སྔགས་རིག་གནས་ཀྱི་བདུན་རྩི་ངོམས་མེད་དུ་བཞེས། བཀའ་རྩོམ་ཡང་བཤད་རྒྱུད་འགྲེལ་པ་ལེགས་བཤད་ནོར་བུ་དང་། ཕྱི་རྒྱུད་འགྲེལ་པ་དགོས་འདོད་འབྱུང་བ་རིན་པོ་ཆེའི་བང་མཛོད་དམ་བཀླགས་པ་ཀུན་ཤེས། ཁོག་འབུགས་འཛུམ་དཀར་བཞད་པའི་ཉི་མ། རྒྱུད་བཞིའི་རྣམ་ངེས་དཔག་བསམ་ལྗོན་ཤིང་ལ་སོགས་པ་མཛད། འཁྲུངས་ལོ་དང་གཤེགས་ལོ་ཞིབ་པ་མ་རྙེད་དོ། །
ཡོང་ཁུངས་ ༼གངས་ལྗོངས་གསོ་རིག་བསྟན་པའི་ཉིན་བྱེད་རིམ་བྱོན་གྱི་རྣམ་ཐར་ཕྱོགས་བསྒྲིགས་༽
བྱམས་པ་འཕྲིན་ལས་ཀྱིས་བརྩམས།
འཚོ་བྱེད་བུ་ལགས། བྱང་བ་རྣམ་རྒྱལ་གྲགས་བཟང་གི་ཐུགས་སྲས་མི་ཡི་ཉི་མ་མཐོང་བ་དོན་ལྡན་གྱི་སྲས་ཡིན་འདུག་ག བྱང་བ་རྣམ་རྒྱལ་གྲགས་བཟང་ལའང་་ཕྱི་རྒྱུད་འགྲེལ་པ་དགོས་འདོད་ཀུན་འབྱུང་ཟེར་བ་ཞིག་ཡོད་སྟབས། ཁོང་གཉིས་མི་གཅིག་ཡིན་ནམ་སྙམ་པ་ཡོད་དེ། དེ་ལྟར་ན། ད་ནི་དོགས་པ་སེལ་བྱུང་ལགས། ཐུགས་རྗེ་ཆེ།
རྒྱུད་བཞི་ནི། བོད་ཀྱི་རྒྱ་མཚོ་ཆེན་པོ་ཞིག་ཏེ། སྔར་བོན་ཆོས་སྐབས་ཀྱི་བོད་རང་གི་སྨན་དཔྱད་གཏོ་བཅོས་ཕུན་སུམ་ཚོགས་ཡོད་པ་གཞིར་བཞག་པའི་ཐོག་ལ། ཏག་ཟིགཔར་ཤི་ཡ་དང་། རྒྱ་ནག་སོག་པོ་དང་། དེའི་སྟེང་དུ་རྒྱ་གར་ནས་ཕྱི་རོལ་པའི་གཏམ་བརྒྱུད་ནས་དང་། དེའི་ཐོག་ལ་སངས་རྒྱས་ཐུབ་པ་དགུང་གྲངས་བདུན་ཅུའི་ཙམ་ལ་སངས་རྒྱས་སྨན་ལའི་ངོ་བོར་བསྟན་ནས་གསོ་རིག་མང་དག་གཅིག་དང་།
ད་དུང་དེའི་མི་ཚད་སྨན་བླའི་གཟུངས་དང་། བཅུད་ལེན་ཚེ་སྒྲུབ་སོགས་ཀྱི་ཆུ་བོ་སྣ་མང་གཅིག་ཏུ་བབས་པའི་རྒྱ་མཚོ་ཆེན་པོ་གཅིག་ཏུ་འཁྱིལ་བ་དང་འདྲ་བ་ལས། བོན་ཆོས་གཅིག་ཉིད་དམ། ནང་ཆོས་གཉིག་ཉིད་ལས་གྲུབ་བོ་ཞེས་པ་ནི་ཧ་ཅང་ཧམ་པ་ཆེ་བར་འགྱུར་རོ།།
བཞེད་ལུགས་སྣ་མང་རིག་པའི་འཕེལ་ལམ་ཡིན། །རང་ལུགས་བཞག་པ་ལྟ་བ་མཆོག་འཛིན་ཡིན། །