རྩོམ་པ་པོ། ཚེ་ལོ་ཐར། ༼བསྟན་འཇམ་གྱིས་འོས་སྦྱོར་བྱས།༽
དང་པོ།
དབྱར་ཟླ་དྲུག་པའི་ཚེས་ཆེན་བཅོ་ལྔའི་ཟླ་བ་ནི་དུང་ལྟར་དཀར་ཞིང་ཉ་ཡོངས་སུ་གང་བས། མི་རྣམས་ཀྱིས་དུང་ཟླ་དཀར་པོ་དང་ཉ་གང་ཟླ་བ་ཞེས་ཆེས་ལེགས་པའི་ཚད་གཞི་རུ་བཤད། ཡིན་ཡང་། དོ་དགོང་གི་ཨ་སྔོན་དབྱིངས་ཀྱི་ཟླ་བ་ནི་སྤྲིན་ནག་ཕོན་པོ་སྤྱང་ཁུ་ལྟ་བུ་ཞིག་གི་མཆེ་བ་གཙིགས་པའི་བར་དུ་ཚུད་འདུག་ལ། མདོག་དང་དབྱིབས་གང་ལ་བལྟས་ཀྱང་སྐྱོ་སྣང་གིས་ཁེངས་པའི་རྒན་པོ་ཞིག་གི་ངོ་གདོང་དང་ཡོངས་སུ་མཚུངས།
མག་མོག་གི་ཟླ་འོད་དང་འདར་སིག་སིག་བྱེད་པའི་སྐར་ཚོགས་ཀྱི་འོག་ཏུ། མཚོ་སྔོན་ཁྲི་ཤོར་རྒྱལ་མོའི་ཆིལ་ཆིལ་དུ་སྒྲོག་པའི་རླབས་སྒྲ་དང་རླངས་འཁོར་ཆེ་ཆུང་གི་ལྷང་ལྷང་དུ་སྒྲོག་པའི་དུང་བརྡ།