འཆམ་ར་དྲི་མེད་རྒྱལ་མཚན།
ཤ་རྒོད་དཔུང་པས་ནམ་མཁའ་བཏེགས་ཀྱང་ས་ནག་ལེབ་མོས་འགྲེ་སློག་བརྒྱབ།།
དཀར་ནག་ལས་ཀྱི་འདོར་ལེན་བྱས་ཀྱང་གཤིན་རྗེའི་རྩིས་འཁོར་གཏིང་ནས་འཁྲུགས།།
ཆོལ་གསུམ་བོད་མིས་སྙིང་ཁ་ན་ཡང་རང་ས་དྲོན་མོ་དགྲ་རུ་ལངས།།
མེས་པོ་སྟོང་གིས་བརྩེ་བ་ཡོད་ན་རྨུ་ཐག་རིང་མོ་འཕྱང་ལ་ཤོག།།
གྱོང་དང་ཕམ་ཁའི་ན་ཟུག་རེ་རེས་དམར་ཆུང་སྙིང་ལ་སེར་ཁ་བཏོད།།
བྲོས་ཤིང་འཁྱམ་པའི་དཀའ་སྡུག་ངར་མས་རྐང་ཆུང་ལེབ་མོའི་རུས་གོག་ན།།
འཁྱག་ཅིང་ལྟོགས་པའི་གཤེད་མ་རེ་རེས་ནོམ་ཆེན་སྲོག་ལ་གཏོར་སྐྱོན་ཐེབས།
འཇིགས་དངངས་ཁྲོད་ཀྱི་གཉོབ་ཆུང་བོད་མི་ཐོག་སེར་འོག་གི་སྙེ་མ་འདྲ།།