ཀིརྟི་སྐྱབས་ཀྱིས།
༄༅།། རྒྱལ་བ་རིན་པོ་ཆེས་བགྲེས་ཡོལ་གནང་རྒྱུ་གསུངས་པར། སྤྱི་འཐུས་ལྷན་ཚོགས་ནས་དེ་ལྟར་མ་གནང་རོགས་ཞུས། སྤྱི་འཐུས་ཀྱི་གནང་སྟངས་འདི་ལ་མི་འགའ་ཤས་ཀྱིས་སྐྱོན་བརྗོད་བྱེད་ཀྱི་འདུག ཆབ་སྲིད་ཀྱི་གཡོ་འཁྲབ་རེད་ཟེར། སྡུག་ཕྱོགས་ནས་བལྟས་ན་དེ་ལྟར་ཡིན་སྲིད། བཟང་ཕྱོགས་ནས་བལྟས་ན། སྤྱི་འཐུས་ཚོས་མི་མང་གི་བསམ་འདུན་གཞི་ལ་བཞག་པ་དང་། མི་མང་གི་ཚབ་བྱས་ཏེ་ཞུས་པ་རེད། མི་མང་གི་འཐུས་མི་ཡིན་པས་མི་མང་གི་མངོན་འདོད་ལྟར་སྒྲུབ་དགོས། འོ་ན། མི་མང་གིས་འདི་ལྟར་ཞུ་དགོས་པའི་འདོད་འདུན་བསྟན་ཡོད་དམ།