མང་བཟའ་པད་དཀར།
རྒྱ་ཡིག་ནས་པད་མ་འབུམ་གྱིས་བསྒྱུར།
སྒྱུ་རྩལ་ནི་སྔ་དཔུང་སྟེ། དེ་ནི་འདུ་ཤེས་ཀྱི་སྔོན་དུ་སྐྱོད་པ་ཞིག་ཡིན་འོས་པ་ལས་མི་དཀྱུས་མ་རྣམས་ཀྱི་མཛེས་འཛིན་གྱི་བློ་དང་བསྟུན་མི་འོས། དེ་མིན་ན་སྒྱུ་རྩལ་སྔོན་དུ་སྐྱོད་ཐབས་མེད། སྒྱུ་རྩལ་གྱིས་མི་དཀྱུས་མ་རྣམས་ཀྱི་མཛེས་འཛིན་གྱི་བློ་ལ་སྣེ་འཁྲིད་བྱེད་དགོས་ཏེ། དེ་ནི་འདུ་ཤེས་འཛིན་སྟངས་ལས་འཕགས་པ་ཞིག་དང་བརྒལ་བ་ཞིག་ཡིན། ཡིན་ན་ཡང་ངའི་བརྩམས་ཆོས་ལས་མཐོང་བ་ནི་དེ་ལས་ལྡོག་པ་ཡིན། ངའི་བརྩམས་ཆོས་རྣམས་སྐབས་འགར་ཡུ་རོབ་དུས་རབས་དཀྱིལ་མའི་དུས་ཀྱི་དུངས་ཞེན་དང་རེངས་པོའི་དུས་ལ་སྐྱར་ལོག་བྱས་པ་དང་མཚུངས་ལ། སྐབས་འགར་རེམ་འབེ་རེན་ཌིའི་(Rembrandt) སྐུ་ལ་འཁྲིལ་ནས་བསྡད་ཡོད་པ་དང་ཡང་མཚུངས། འདི་ནི་སྐྱར་ལོག་གམ་ཕྱིན་དྲན་ནམ།