བསྟན་འཛིན་ཚེ་དཔག
གཅིག ༼གནམ་ས་གོ་འབྱེད་༽དང་འཕྲད་པ།
ཟླ་གཅིག་ཙམ་གྱི་གོང་ལ། དྲ་ངོས་འདིའི་ཟིན་བྲིས་པ་གཉན་པོ་ལགས་ཀྱི་ཟིན་བྲིས་ནང་དང༌། ཁ་བརྡ་དྲ་དེབ་ནས་༼གནམ་ས་གོ་འབྱེད་༽དེབ་ཀྱི་རྒྱབ་མདུན་ཤོག་ངོས་ཀྱི་བཟོ་ལྟ་དང་དཀར་ཆག་ཅིག་བཀླགས་རྒྱུ་བྱུང༌། དེ་རྗེས་ཀྱི་ཉིན་ཤས་མཚམས་ནས་ངོ་སྤྲོད་དེ་གཉིས་ཀ་མཐོང་མེད་དུ་གྱུར། གང་ལྟར་ནའང༌། ༼གནམ་ས་གོ་འབྱེད༽ཀློག་འདོད་ཀྱི་ཡི་ག་དེ་ཉིན་རེ་ཞིང་འཕར་ཞིང་འགྲན་པའི་ཚུལ་དུ་གྱུར། བདུན་ཕྲག་སྔ་མའི་རེས་གཟའ་སྤེན་པའི་ཉིན་གྱི་དགོང་མོར། ཁ་པར་བརྒྱུད་གཞིས་བཞུགས་པ་ཞིག་དང་ལྷན་གླེང་མོལ་བྱས། གླེང་མོལ་དེ་ཡང་༼གནམ་ས་གོ་འབྱེད་༽ཀྱི་སྟེང་དུ་བབས། ཁོང་གིས་གསུང་སྟངས་བྱས་ན། ༼གནམ་ས་གོ་འབྱེད༽བཀྲམས་སོང་ལ། དེ་བཞིན་གོང་རིམ་ནས་བཀག་སོང༌། བཀྲམས་པ་དང་བཀག་པ་གཉིས་དུས་མཚུངས་ལྟ་བུ་ཆགས་སོང་ཟེར། ད་ནི་ཀློག་པའི་གོ་སྐབས་དང་རྨི་ལམ་དེ་ཡང་རེ་བ་མེད་པ་ཆགས་སོང་སྙམ་དུ་སེམས་པ་ཕངས་པ་ཞིག་བྱུང༌།