མི་བུ་སྒེར་ཚུགས་ཀྱི་ཅུང་གཞི།

ལྷོ་ཕྱོགས་ཉི་ཟླ།

མི་ནི་རང་བཞིན་ལྷན་སྐྱེས་ཀྱི་སྨྲ་ཤེས་ཤིང་དོན་གོ་བའི་དབྱེ་འབྱེད་ཀྱི་ནུས་བ་དང་མཆོག་ཏུ་གྱུར་བའི་རྣམ་དཔྱོད་ཞིག་གི་དྲང་ཚུགས་སུ་གནས་ཐུབ་པ་ཕལ་ཆེར་རང་ཆས་སུ་གྲུབ་ཡོད།

ཡིན་ཡང་དེང་སང་མི་འགྱུར་ནས་དུས་རབས་འགྱུར་འགྲོ་བའི་ཧ་ཅང་གི་ཚད་ཆེན་པོ་ཞིག་དང་དཀའ་ངལ་དཔག་ཏུ་མེད་པ་ཞིག་མི་ཚང་མ་ལ་རང་བཞིན་གྱི་ཡོང་བསྡད་ཡོད་པ་དངོས་མཐོང་ཡིན།

མི་བུ་ཁ་ཤས་ཞིག་གིས་ཁ་སང་གི་སྐྱོ་གུར་གྱི་གཏམ་རྒྱུད་དང་སང་ཉིན་མུན་ནག་གི་རི་གྲོང་ཡོད་ཚད་ལ་བསམ་བློ་ཅི་ཡང་མི་གཏོང་བ་མ་ཟད་ལོ་རེ་ནས་ལོ་རེར་དོན་མེད་ཀྱི་འུར་སྒྲ་དང་སྨྱོན་གཏམ་བཤད་མཁན་ཇེ་མང་ནས་ཇེ་མང་དུ་འགྲོ་བཞིན་འདི་ཆེས་མཚར་བའི་སྐྱོ་སྡུག་གི་ཉིན་མོར་ཞིག་རེད།

འདི་དག་ནི་འགྲོ་བ་མི་ཞིག་ལ་མཚོན་ན་རང་བཞིན་གྱི་འཚོལ་དགོས་བའི་གྲུབ་ཆ་ཞིག་དང་སྟོང་ཆ་ཁོ་ན་ལས་གཞན་མ་འདས་སོ།
ཡིན་ཡང་། སྤྱི་ཚོགས་དང་དུས་རབས་བསམ་བློ་དང་སློབ་གསོའི་ཁ་ཕྱོགས་སོགས་གཅིག་ཏུ་སྤུངས་མ་ཐུབ་པའི་དཀའ་ངལ་ཞིག་གི་འོག་ནས་ཁྱེད་ཀྱི་རྔ་རྡུང་དང་བདག་གིས་སྤྲོ་འཁྲབ་ཀྱི་ཡིན་ཅེས་དཔེ་ལྟར་དུ་ད་དུང་ཡང་བཙན་འོག་ཏུ་ལྷག་བསྡད་ཡོད་པ་མ་ཟད་མུ་མཐུད་དུ་ཡང་གནས་མི་དགོས་བའི་ངེས་བ་གཏན་ནས་མེད།

གཞི་ནས་བསམ་བློ་ཞིག་བཏང་ན་ཕྱི་སྒྲིབ་ནང་སྒྲིབ་ཀྱི་མི་རིགས་ཤིག་དང་ཕྲག་དོགས་དང་འགྲན་སེམས་ཆེ་བའི་སྤྱི་ཚོགས་མགོ་སྟོང་འདི་དུས་ནས་དུས་སུ་འགྱུར་བ་ཞིག་མ་ཕྱིན་བར་དུ་རྒྱལ་ཐུབ་པ་ཞིག་ག་ལ་སྲིད།

ང་དང་ཁྱོད་ཅེས་བའི་ཐ་སྙད་སྐམ་པོ་ཞིག་བདག་ཏུ་གཉེར་ནས་གཅིག་གི་གདོང་ལ་གཅིག་མཆོངས་ནས་རང་རྒྱལ་དང་གཞན་ཕམ་གྱི་བསམ་བློ་ཁུག་ལྕོགས་ཁོ་ན་འདི་དོན་དུ་གཉེར་བྱ་དང་སྒྲུབ་བྱ་ཡིན་བསམ་པའི་བློ་མིག་སྒེར་གཅོད་ཀྱི་བྱ་ལས་འདི་དུས་ནས་དུས་སུ་སྙིང་ལ་སིག་ཀྱང་སེམས་ལ་བཅིངས་ཡང་རང་རྒྱལ་ཁོ་ན་ཞིག་ཅི་ནས་ཀྱང་ཡོང་ཐབས་མེད།

འདི་དག་ནི་མི་བུ་སྒེར་གྱི་ཅུང་རྒུད་ཞིག་དང་སྤྱི་ཚོགས་འདིར་འདར་སིག་ཞིག་ཐེབས་པ་ལས་མེད་སྟབས་གཞན་ལ་ཕན་པའི་བསམ་བློའི་གྲུབ་ཆ་དུལ་འབྲུ་ཙམ་ཡང་མེད་པ་མ་ཟད་མཐུན་སྒྲིལ་དང་གཅིག་སྒྲིལ་སོགས་ལ་གནོད་ཚབས་ཆེ་བའི་མི་རེ་ངོས་རེ་ནས་བསམ་བློ་གུ་ཡངས་ཀྱི་སྒམ་དཀྱིལ་དུ་གནས་ཐུབ་ན་ཅི་མ་རུང་སྙམ།

་ 2011.6.12