འབྲོང་ངུར་ཕོ་ཉ།
རང་གི་མི་ཚེ་ལ་མཚོན་ན་མངར་སྐྱུར་གྱི་འཚོ་བ་དུ་མ་བརྒྱུད་དེ་ཡོང་བ་ཞིག་ཡིན་པས། དགའ་སྡུག་གི་བང་རིམ་བགྲང་དཀའ་བ་ཞིག་ཡོད་པ་སྨོས་མེད་ཅིག་རེད། དེར་བརྟེན་ངའི་འཚོ་བའི་སྣེ་མོ་རེ་ནས་ཁྱོད་ཅག་ལ་སེམས་ཚོར་ཟབ་མོ་ཞིག་འཇོག་ཐུབ་རྒྱུའི་རེ་བ་གཙང་མ་ཡོད། དེ་རིང་གི་ཉིན་མོར་ ༼ཕྱི་ལོ་ ༢༠༡༠ ཟླ ༦ ཚེས ༥ རེས་གཟའ་སྤེན་པ་༽ མཚོན་ན་བརྗོད་དཀའ་བའི་ཚོར་བ་ཟབ་མོ་ཞིག་གིས་བདག་གི་ལུས་སེམས་ཡོངས་རྫོགས་བདེ་ཆེམ་མེར་ཁྱབ། དེ་ནི་སྟབས་ལེགས་ཀྱིས་བྱུང་བ་མིན་པར་ཁོ་བོར་རིང་ནས་འདྲིས་ཤིང་བརྩེ་བའི་སྙིང་མཚུངས་སྤུན་ཟླ་གང་གི་བྱམས་སེམས་འོད་ཟེར་དྲོད་ཁྱིམ་ལས་ཐོབ་པར་སྨྲ་མི་དགོས་པ་ཞིག་རེད། དེའི་ཕྱིར་ང་ནི་སྤུན་གྲོགས་ཁྱོད་རང་ལ་ཧ་ཅང་གི་དགའ་ཞིང་ཁྱོད་ཀྱི་འགྲན་ཟླ་བྲལ་བའི་མི་གཤིས་དང་ཡ་རབས་དྲང་བདེན་གྱི་སྤྱོད་པ་ལ། ངས་ཚད་མཐོན་པོའི་གདེང་འཇོག་དང་ཡིད་ཆེས་བྱེད་བཞིན་ཡོད་པ་ཁྱོད་རང་གིས་ཀྱང་ཤེས་ངེས་རེད། ལར་ཁོ་བོས་ཨ་ནུ་ཁྱོད་ལ་བརྩེ་བ་ནི་རང་གི་ཐོབ་ཤོར་ཆེད་དུ་མིན་པར་དཀོན་མཆོག་གིས་གཟིགས་ཀྱང་དག་འབུད་བྱེད་ངེས་པའི་ཕྱིར། དེ་ནི་རྨ་མེད་པ་དང་རིན་ཐང་བྲལ་བ་ཞིག་ཡིན་པར་མཚོན་ཐུབ། ལན་རེར་ཁོ་བོར་ཡི་ཆད་དང་བག་འཁུམ་གྱི་ཚོར་བ་གྲང་ཤུར་ཤུར་ངང་གཅིག་པུར་གནས་ཚེ་ཁྱོད་ཀྱི་ལྷད་མེད་པའི་བརྩེ་དུང་དང༌། ཟོལ་མེད་ཀྱི་ཁ་བརྡ་རེ་རེས་ངའི་སྙིང་དབུས་སུ་བག་ལ་ཞ་བའི་སྤོབས་སེམས་ཀྱི་གངས་སེང་དཀར་མོ་ཧར་གྱིས་ལང་དུ་བཅུག ཅི་ཞིག་གིས་ཡིན་ནམ། ངའི་དྲན་པའི་རྩིག་ངོས་སུ་གསལ་ལེར་ཤར་བ་ནི་འདས་ཟིན་པའི་སྣང་བརྙན་གསོན་པོ་ཤ་སྟག་རེད། སེམས་ཚོར་ནི་གཟུགས་མེད་ཀྱི་དངོས་པོ་ཡིན་པས་རང་ཁོ་ནས་ཉམས་སུ་མྱོང་བ་ཞིག་ལས་གཞན་གྱིས་མཐོང་དུ་མི་རུང་བའི་ཆོས་ཤིག་ཡིན་པར་བཤད་ག་ལ་དགོས། གལ་ཏེ་འགྲེལ་བརྗོད་དང་བརྡ་སྤྲོད་ཀྱི་ནུས་པ་དང་བྲལ་བ་ཡིན་ན་མིའི་རིགས་ཀྱི་ཡིད་ཆེས་དང་བརྩེ་བ་གཏན་ནས་ཡོང་མི་སྲིད་མོད། དེ་ནི་ཇི་མ་ཇི་བཞིན་བཤད་དུ་མེད་པར་རྒྱུ་མཚན་གཉིས་ཀྱིས་བསམ་བློ་བ་ཞིག་གིས་ནན་བཤད་བགྱིས་འདུག འོ་སྐྱེལ་བ་དང༌། འཐམ་འཁྱུད་བྱེད་པ། འཛུམ་སྟོན་པ་སོགས་ཕྱིའི་རྣམ་འགྱུར་རགས་པ་དག་ལས་ནང་གི་བརྩེ་སེམས་མཚོན་ཐབས་བྱེད་པ་ནི་མིའི་རིགས་ཀྱི་བླ་ན་མེད་པའི་རྣམ་དཔྱོད་ཅིག་ལས་བྱུང་བ་ཁས་མི་ལེན་ཀ་མེད་རེད། འུ་ཚོས་གནས་ལུགས་ལ་ཡིད་ཆེས་དང་བདེན་དོན་བརྩི་མཐོང་བྱེད་དགོས། དེ་ནི་འཚོ་གནས་དང་འབྲེལ་བ་ཡོད། “འཕྲིན་ཡིག་ནི་ད་གཟོད་ནང་སེམས་དམར་རྗེན་མཚོན་བྱེད་དང༌། བརྩེ་བ་ལྷོག་ལྷོག་ཏུ་འཕྱུར་ས་ཡིན་པ་རེད་ཨང༌།” ཞེས་ཀྱང་སྨྲས་སོ། འོ་ན་སྨྱུག་རྩེ་ནས་ལྷོག་ལྷོག་ཏུ་བཞུར་བའི་ཉིན་ཐོ་འབྲི་བའང་དེ་ལས་མ་འདས་པ་ཞིག་རེད་ཅེ་ན་རྫུན་དུ་མི་འགྲོ་བར་ཡིད་ཆེས་བྱེད་ཆོག གལ་ཏེ་འུ་ཚོ་རྩོམ་པ་པོ་ཞིག་ཡིན་ན་དཀར་ནག་ཤན་དུ་གཅོད་པའི་རང་གཤིས་དང་དྲང་བདེན་གླུ་རུ་ལེན་པའི་མགྲིན་ངག་ཡོད་དགོས། མདོར་ན་རྫུན་ཚིག་དང་མ་འདྲེས་པར་སྐད་ཆ་བཤད་རྒྱུ་གནད་འགག་ཅིག་བརྩི་ཆོག ཉམས་འུར་བའི་ལུས་ཀྱི་རྣམ་འགྱུར་བཅས་པའི་ཀུ་རེ་དང་དགོད་སྒྲ་ལྷན་དུ་ཁྱེད་ཀྱི་སྐད་ངག་ཚུན་ཆད་མ་འདྲེས་པར་ད་ལྟ་འང་ཚོགས་དྲུག་གི་སྒོ་མོར་ལམ་ལམ་འཆར་བཞིན་པ་འདིས། ངའི་སེམས་དབུས་སུ་བག་ཆགས་ངེས་ཅན་ཞིག་བཞག་ཡོད་པའི་དཔང་རྟགས་གསལ་ཤོས་ཤིག་ཡིན། དེ་ནི་ངེད་སྤུན་གཉིས་འགྲོགས་པའི་ཐོག་མའི་དུས་མིན་ལ་མཐའ་མ་ཡང་ག་ལ་ཡིན། ཨ་གསར་རྟ་ལས་མགྱོགས་ཤིང་རྔ་མ་ལུག་ལས་ཐུང་ཞེས་པའི་སྤྱོད་ངན་དེ་འདྲ་ཞིག་མ་ཡིན་པར་དོན་དམ་པའི་ལྷད་མེད་ཀྱི་བརྩེ་དུང་དང་ཟོལ་མེད་ཀྱི་རང་གཤིས་མངའ་བས་ཆུ་ཚོད་དང་སྐར་ཆ་ཙམ་ཡང་ང་ཁྱོད་རང་དང་མི་འབྲལ་བར་མཉམ་དུ་འདུག་འདོད་ཡོད་ཀྱང་དེ་ནི་མི་སྲིད་པ་ཞིག་རེད་མོད། མང་དུ་འགྲོགས་རྒྱུར་རེ་བ་དང་ཡིད་ཆེས་ཡོད་པས་དེ་ལྟར་ཡིད་ལའང་འཛིན་པར་ཞུ། སྤུན་ཟླ་ལགས། འདིར་སྣང་ནི། རྨི་ལམ་དང་རྫུན་མ་ཞིག་ཡིན་པ་དང༌། རྨི་ལམ་ནི་དེ་ལས་རྫུན་ནག་ཅིག་ཡིན་པར་བཤད་མི་དགོས་ཀྱང༌། ང་ལ་རབ་རིབ་ཀྱི་རྨི་ལམ་མང་པོ་འཆད་དུ་ཡོད་པ་དེས་འུ་གཉིས་ཚེ་རབས་ཀྱང་སྤུན་ཟླ་ཡིན་པར་ཡིད་ཆེས་བྱེད། དེ་ནི་རྨོངས་དད་ཀྱི་ལྟ་ཚུལ་ཞིག་ཏུ་བགྲངས་ངེས་པར་སྔ་མོ་ནས་ཤེས་ཀྱང་བྱ་ཐབས་ཟད། མིའི་སེམས་ཚོར་ལ་མཐའ་མེད་པ་བཞིན་དགའ་ཕྱོགས་དང་སྡང་ཕྱོགས་ལ་ཚད་མེད་པ་ཞིག་ཡིན་ཀྱང་སྙན་ངག་ལ་དགའ་བ། དཔེ་ཆ་ལ་དགའ་བ། ཕྱི་ཐག་ཅན་གྱི་གྲོགས་པོ་ལ་དགའ་བ། ཞི་བདེ་ལ་དགའ་བ་བཅས་ནི་ངས་ཧ་ཅང་གི་དགའ་ཤོས་བཞི་ཡིན་པར་མ་ཟད། ཁྱོད་རང་ལ་འཚམས་སྦྱོར་ལྟར་དོན་སྔོན་དུ་གྱུར་པའི་རེ་སྨོན་དང་ཡིད་ཆེས་འཛིན། གནའ་མི་རྒན་པོའི་འབེལ་གཏམ། གཞུང་ལུགས་མཁས་པའི་དཀྱུས་བཤད། ལོ་རྒྱུས་མི་སྣའི་སྣང་བརྙན་སོགས་མ་ངེས་པའི་དྲི་བ་དང་བགྲོ་གླེང་སྣ་ཚོགས་པའི་མོལ་མཆིད་ཀྱིས་བཟི་ནས་ཅི་ཡང་མ་ཚོར་བར་དུས་ཚོད་འཁོར་ལོས་ཉི་མ་གཞོན་ནུ་ས་མཐར་བསྐྲད་དེ་ནག་རོང་ངེར་ས་སྲོད་མུན་པ་མདུན་དུ་བསུས། ཨེ་མ་ད་ནི་མི་འདོད་བཞིན་དུ་རང་གནས་སུ་སོ་སོར་འགྲོ་དགོས་སྙམ་ཞིང༌། ཞེ་སྨྲེང་བ་དང༌། ངུ་བྲོ་བའི་ཚོར་བ་ཟབ་མོ་ཞིག་གིས་དགའ་སྐྱིད་ཀྱི་དུས་ཚོད་བཟང་པོ་རེ་ཞིག་མཇུག་བསྡུས་པ་འདྲ། སྐབས་དེར་བྱམས་བརྩེ་ལྡན་པའི་ནུ་བོས་སྤྱང་གྲུང་དོད་པའི་མིག་ཟུང་སྐྱོ་ཉམས་བཅས་ཁོ་བོའི་གདོང་ལ་ཅེར་ཞིང་ལག་གཉིས་དམ་པོར་འཇུས་ཏེ། ཡ་བདེ་མོ་བཞུགས། རྗེས་མ་མཇལ་ཡོང་ཞེས་སེམས་འཁྲེང་བའི་རྣམ་འགྱུར་དེ་མཐོང་མ་ཐག ད་གཟོད་གནམ་ས་བླ་འོག་ཏུ་འགྱུར་བ་ལྟར་ནག་ཐུམ་མེར་ཁོ་བོ་དལ་ཞིག་ཧད་པར་གྱུར། ཏིར་ཏིར་ཞེས་སྙིང་ལ་གཟན་པའི་སྒྲ་དལ་མོ་དེས་གཉིད་ལས་བླངས་པ་ལྟ་བུའི་སྲོག་དབུགས་གསར་པ་ཞིག་བསྩལ། Z འདི་འདྲའི་ཡིག་འབྲུ་གཅིག་མིག་ལམ་དུ་ཤར་བས་ད་གཟོད་ཁྱོད་ཀྱི་ཞལ་པར་ཡིན་པ་གཞི་ནས་ཤེས། བྱམས་བརྩེ་ཡི་རིན་ཐང༌། ལྷག་བསམ་གྱི་བསླབ་བྱ། འབྱུང་འགྱུར་གྱི་འཚོལ་སྙེག་སོགས་གློག་འཁྱུགས་པ་ལྟ་བུའི་སེམས་ཚོར་དྲག་པོའི་རྦ་ཀློང་འཐབ་ཀྱིན་པར་ཁོ་བོ་གཉིད་ལམ་གྲོང་ཁྱེར་དུ་ཕྱིན་སོང་ ་ ་ ་ ་ ་ ༌།། །།
འབྲོང་ལགས་ཀྱིས་བྲིས་རྩལ་དེར་དངོས་གནས་རང་ཡིན་ཕྲན་རང་ཡིད་སྨོན་སྐྱེས་སོང་། ད་དུང་དེ་བཞིན་མང་ཙམ་སྤེལ་བའི་རེ་བ་ཡོད།