ཐེ་བོ་དཀོན་མཆོག་ཤེས་རབ་ཀྱིས།
མཁྱེན་རབ་རྣམ་སད་རོལ་བའི་མཁར།།
ལུགས་ཟུང་ཤེས་བྱའི་རྒྱུ་སྐར་བཀྲ།།
ཆོས་སྲིད་ཟུང་གི་ཉི་ཟླའི་འོད།།
ཀུན་ནས་སྤྲོ་མཛད་གང་དེས་སྐྱོངས།།
བོད་དུ་ཆོས་སྲིད་ཟུང་འབྲེལ་ལམ་ལུགས་ནི་ཐོག་མར་ཆོས་རྒྱལ་སྲོང་བཙན་སྒམ་པོས་སྲོལ་བཏོད་པར་གྲགས།སྐབས་དེའི་ཆོས་སྲིད་ཟུང་འབྲེལ་གྱི་ངོ་བོ་ནི་ལྷ་ཆོས་དགེ་བ་བཅུ་དང་མི་ཆོས་གཙང་མ་དྲུག་གི་ཁྲིམས་བཅས་པ་དེར་གོ་དགོས་པ་རེད།དེ་ལྟར་ཁྲིམས་བཅས་པའི་ཁུངས་ཀྱང་སངས་རྒྱས་ཀྱིས་ལྷ་མིའི་ཐེག་པའི་རྣམ་གཞག་མང་དུ་གསུངས་པ་དག་དང་།མགོན་པོ་ཀླུ་སྒྲུབ་ཀྱི་གསུང་ལས། མི་ཡིས་
ཆོས་ལུགས་ལེགས་སྤྱད་ན།།ལྷ་ཡུལ་བགྲོད་པ་ཐག་མི་རིང་།།ལྷ་དང་མི་ཡི་ཐེམ་སྐས་ལ།།འཛེགས་ན་ཐར་བ་གམ་ན་འདུག།ཅེས་སོགས་གསུངས་པ་ལ་བརྟེན་པ་ཞིག་རེད།