ནད་པ།
ཀླུ་སྨྱོན། ནད་པའི་ཉལ་ཁྲིའི་འོག་ཏུ། ། གསེར་སྒོར་ཁྲི་འབུམ་བརྩིགས་འདུག ། ནད་པའི་སྟེང་གི་བར་སྣང་། ། མཁའ་དབུགས་ནག་པོས་ཁྱབ་འདུག ། ནད་པའི་སེམས་ཀྱི་ཟུར་དུ། ། གསོན་འདོད་རེ་བས་ཁེངས་འདུག ། ནད་པའི་རྩ་ལམ་ཐམས་ཅད། ། སྲོག་གཅོད་དུག་ཁུས་ཁྱབ་འདུག ། ནད་པ་གསོན་དང་མི་གསོན། ། འཆི་བདག་གཤིན་རྗེས་ཤེས་ཟེར། ། གཤིན་རྗེའི་རྒྱལ་པོར་འདྲི་བར། ། བར་དོའི་ཁམས་ལ་འགྲོ་དགོས། ། འཇིགས་རུང་བར་དོའི་ཁམས་སུ། ། མུན་པ་ནག་པོ་འཐིབས་ཤིང་། ། རྒྱུས་མེད་སྒྲ་འོད་ཟེར་གསུམ། ། གནམ་ལྕགས་ཐོག་ལས་ཞེད་པ། ། གལ་སྲིད་ནད་པ་དྲགས་ཚེ། ། གསེར་དངུལ་གསོག་ཉར་བྱ་དགོས། ། གསེར་དངུལ་ཡོད་པའི་མི་ལ། ། སྲོག་གི་བར་ཆད་མང་ངོ་། ། གསེར་དངུལ་ཡོད་པས་དགའ་བ། ། འཇིག་རྟེན་འདི་ཡི་རྒྱལ་པོ། ། གསེར་དངུལ་ཡོད་པས་སྡུག་པ། ། གསེར་དང་ཚེ་ཚད་མི་མཉམ། ། དེ་ལྟའི་ཡ་ངའི་གནས་སྟངས། ། ནད་པའི་མདུན་དུ་སྤུངས་པས། ། ནད་པ་གསོན་ཡང་མི་འདོད། །…