ཟླ་བ་གཅིག་ཏག་ཏག་གི་གོང་དེར། ངས་རང་གི་བུ་ཆུང་བར་དག་ཆའི་སྐོར་ལ་དོ་སྣང་བྱེད་ཐབས་ཤིག་འགྲེལ་བཤད་བརྒྱབ་པ་ཡིན། ཐོག་མར་ངས་དྲི་བ་ཞིག་བཏོན་ནས་ཕྲུ་གུའི་བསམ་བློར་ཉམས་སད་བྱས་པ་ནི། མེ་ཏོག་ཅེས་པའི་ཐ་སྙད་འདིར་འགྲེལ་བཤད་ཅིག་འབྲི་རོགས་ལབ་པ་དེ་ཡིན། དེར་བུ་ཆུང་གིས། མེ་ཏོག་ནི། དཀར་པོ། དམར་པོ། ད་དུང་སེར་པོ་ཡང་ཡོད། མེ་ཏོག་ཁ་ཤས་ཆེན་པོ་དང༌། མེ་ཏོག་ཁ་ཤས་ཆུང་ཆུང་ཡོད་པ་རེད། ཅེས་པའི་འགྲེལ་བཤད་ཐུང་ཐུང་ཞིག་བྲིས་ནས་བསྟན་སོང༌།
དེ་ནས་ངས་དེ་འདྲ་མ་རེད། མེ་ཏོག་གི་འགྲེལ་བཤད་ཤེས་དགོས་ན། ཐོག་མར་མེ་ལྕེ་ཞེས་པའི་འགྲེལ་བཤད་ཤེས་དགོས་པ་དང༌། དེ་ནས་ད་གཟོད་མེ་ཏོག་གི་འགྲེལ་བཤད་རྙེད་དགོས་པ་རེད། མེ་ལྕེ་ལབ་ན། མེ་ཡི་འབར་སྟངས་དེ་དང༌། དེའི་དཀར་སེར་དམར་སྔོ་སོགས་མདོག་མི་འདྲ་བ་དང༌། དེ་བཞིན་ཕྲ་པོ་དང་སྦོམ་པོ། ཟུར་གསུམ་དང་སྒོར་དབྱིབས་སོགས་དབྱིབས་སྣ་ཚོགས་པ་དེ་ནི་འདབ་ཆགས་དང༌། གཅན་གཟན། རི་དྭགས། འབུ་སྲིན་སོགས་སེམས་ཅན་ཆེ་ཆུང་སྣ་ཚོགས་པའི་ཁ་ནང་གི་ལྕེའི་དབྱིབས་སྣ་ཚོགས་དང༌། མདོག་སྣ་ཚོགས་ཀྱི་རྣམ་པ་དང་འདྲ་བར་འབར་གྱི་ཡོད་པའི་ཆ་ནས་མེ་ལྕེ་ཞེས་བཏགས་པ་དང༌། དེ་བཞིན་དུ་མེ་ལྕེའི་མདོག་དང་དབྱིབས་སྣ་ཚོགས་པ་དང་འདྲ་བའི་ཆ་ནས་མེ་ལྕེའི་ཚིག་བསྡུས་ཏེ་མེ་དང༌། ཏོག་ཅེས་རྩྭ་དང་རྩི་ཤིང༌། ལྗོན་པ་སོགས་ཀྱི་གཞུང་རྟའི་རྩེ་དང་ལན་ཡག་ཉིང་ལག་གང་རུང་གིའང་རྩེ་མོའམ་ཏོག་ན་བཞད་འཛུམ་གྲོལ་བའི་ཆ་ནས་མེ་ཏོག་ཅེས་བཏགས་པ་རེད་ཅེས་བཤད་པ་དེར་ནི། དོ་སྣང་ཆེན་པོས་ཉན་སོང་ལ། སེམས་ནང་ཡང་འཇུག་བདེ་པོ་འདྲ་ཞིག་ཆགས་སོང་བའི་ཚོར་བ་ཞིག་མངོན་པར་བྱས། ད་ནི་བྱིས་པ་དག་ཡིག་དེ་འགྲེལ་བཤད་བརྒྱབ་པས་གོ་འོང་བ་འདུག་སྙམ་དགའ་སྣང་ཡང་སྐྱེས་པར་བྱས།
དེ་ལས་མང་བ་། “བུ་ལ་འཁྲིད་པའི་ཐ་སྙད། ཐབས་ཤེས་ཟད་པའི་འགྲེལ་བཤད།” »