རྡོ་གྲུབ་ཆེན་གྱི་མ་འོངས་ལུང་བསྟན།
ངས་ཉིན་འགའི་སྔོན་བོད་ཀྱི་དྲ་མཛོད་ཐོག་རྡོ་གྲུབ་ཆེན་གྱི་མ་འོངས་ལུང་བསྟན་ཞིག་མཐོང་བ་འདིར་དྲ་གྲོགས་རྣམས་ཀྱི་དཔྱད་གཞིར་ཕུལ་བ་ཡིན། བཾ༈ གཞི་ཀ་དག་སྟོང་ཆེན་དྭངས་མའི་མཁར༈ རྩལ་ཤར་གྲོལ་བདེ་སྟོང་ཊཀྐིའི་གླུ༈ སྔོནལེགས་བྱས་ནོར་བུའི་རང་འོད་ཀྱིས༈ རྟེན་འདོད་འཇོའི་གདུལ་བྱའི་ཞིང་ས་རླན༈ ངུར་སྨིག་ཁྲིམས་ལྡན་གྱི་གཟི་བྱིན་འབར༈ ཐབས་མཁའ་ཀྱིས་བོད་འབངས་རྗེས་སི་སྐྱོངས༈ སྤྱན་གཟིགས་སྤྲུལ་པ་བསྟན་མིང་པ་ཡི༈ ལོ་འབྱུང་ཤིང་ཕག་སྨེ་བ་གཉིས་ནག༈ བསྟན་པ་སླར་གསོ་ལྷ་ལྡན་ཡུལ་འཁྲུངས༈ སྨོན་ལམ་དང་གནས་དུས་ཕུན་ཚོགས་ལྔའི༈ རྟེན་འབྲེལ་གྱི་སྒོ་བརྒྱ་དུས་གཅིག་འབྱེད༈ དུས་ས་བྱི་སྨེ་བ་གཅིག་དཀར་དུས༈ གངས་ལྗོངས་བདེ་སྐྱིད་ཀྱི་ཉི་མ་ཤར༈ དད་ལྡན་ལས་འཕྲོ་ཅན་གྱི་མི་རྣམས་ཀྱིས༈ མི་དགེ་བཅུ་སྤོང་ཁྱད་པར་སྲོག་གཅོད་སྤོང༈ སྨན་བླ་སྤྱན་གཟིགས་སིངྡྷི་དུང་ཕྱུར་བརྒྱ༈ གནས་ཆེན་གནས་ཆུང་ཀུན་ལ་མཐོང་གྲོལ་བཞག༈ མ་འགྲོ་བའི་བསོད་ནམས་མཁའ་དབྱིངས་སུ༈ དོན་དགེ་ལེགས་ཉི་ཟླའི་འོད་སྣང་མཛེས༈ ཁོང་དགུང་གྲངས་བརྒྱ་དང་བཅུ་གསུམ་བཞུགས༈ འབྲེལ་བཅས་ཀྱིས་འགྲོ་བ་མིག་འཕྲུལ་བཞིན༈ ཞིང་གང་འདོད་གནས་ལ་ཁྱུ་དེད་བྱེད༈ སྙན་ཆོས་དུང་དཀར་པོའི་རང་སྐད་ཀྱིས༈ འདབ་དྲུག་གི་ལྷ་འབངས་མགྲོན་དུ་བསུ༈ ཁམས་གདུལ་བྱའི་ཡིད་ཀྱི་མུན་པ་སེལ༈ དོན་ལེགས་ཚོགས་འབྲས་བུ་ཀུན་གྱིས་བརྒྱུད༈ ཆུ་སྐྱེས་ཀྱི་བསུང་ལྡན་དོ་རའི་ཁྲོད༈ རྐང་དྲུག་གི་གཞོན་ནུ་གར་ལ་བྲེལ༈ ལས་དག་པའི་གདུལ་བྱའི་སྲི་ཞུ་སྒྲུབས༈ ཡར་ལྡན་གྱི་སྤྱོད་པ་ཡར་ཟླའི་སྤུན༈ དགེ་ལེགས་ཀྱི་དབྱར་རྔ་ཕྱོགས་སུ་སྙན༈ ཞེས་སོགས་སྣང་ཆ་མི་དམིགས་ཆོས་དབྱིངས་ཨ༈ འདི་དགེ་བསྐུལ་གྱི་ཆེད་ཡིན་པས་ཀུན་གྱིས་ཁས་ལེན་ཡང་དག་རེ་བྱེད་པར་ཞུ། དེ་ཡང་སྐལ་བ་ལྡན་པའི་དད་ལྡན་རྣམས་ཀྱིས་གོང་དུ་གསུངས་གནང་ཡོད་པ་བཞིན་དགེ་སྒྲུབ་སྨོན་ལམ་བསོག་རྒྱུ་དེ་ཆེས་དགོས་གལ་དུ་མཐོང་བས་ཀུན་གྱི་སྤྱན་སྔར་ཕུལ་ལོ། ཞེས་པ་ལས་རྡོ་གྲུབ་ཆེན་སྐུ་ཕྲེང་གང་གི་ལུང་བསྟན་ཡིན་མིན་དང་གསུང་འབུམ་དང་པར་མ་གང་གི་ནང་ཡོད་མེད་ཀྱི་ཁུངས་བྲིས་མི་འདུག་པས་དཔྱོད་ལྡན་རྣམས་ཀྱིས་འཚོལ་བར་རིགས། འདི་གསལ་བོ་བཟོ་རོགས་གནང་། འདིའི་ནང་། སྤྱན་རས་གཟིགས་མིང་བསྟན་མིང་པ་ཡི༈ ཞེས་སྤྱན་རས་གཟིགས་ཀྱི་སྤྲུལ་པ་བསྟན་འཛིན་རྒྱ་མཚོ་བསྟན་ཡོད་པ་འདྲ། ལོ་འབྱུང་ཤིང་ཕག་ཅེས་འཁྲུངས་ལོ་ ༡༩༣༥ ཤིང་ཕག་ལོ་ཡིན་པ་གསལ་འདུག གཞན། དུས་ས་བྱི་སྨེ་བ་གཅིག་དཀར་དུས༈ གངས་ལྗོངས་བདེ་སྐྱིད་ཀྱི་ཉི་མ་ཤར༈ ཞེས་ས་བྱི་ལོ་སྟེ་ ༢༠༠༨ ལོར་བོད་ལ་བདེ་སྐྱིད་ཀྱི་ཉི་མ་འཆར་རྒྱུ་ཡིན་པ་བསྟན་ཡོད་པ་འདྲ། ད་དུང་ ཁོང་དགུང་ལོ་བརྒྱ་དང་བཅུ་གསུམ་བཞུགས་ཞེས་ཀྱང་བྲིས་འདུག