བར་ལམ་ཞིག་ནས་བཙན་བྱོལ་སྤྱི་ཚོགས་ཀྱི་ནང་དུ། གསར་ཤོག་དང་། དྲ་གནས། ཟིན་ཐོ། བརྙན་འཕྲིན། རླུང་འཕྲིན་སོགས་བརྒྱུད་ལམ་དུ་མའི་ནང་དུ་ཡོང་ལ་ཉེ་བའི་བཀའ་བློན་ཁྲི་པ་དང་། སྤྱི་འཐུས་ཀྱི་འོས་བསྡུའི་ཐད་ལ་ཚ་ཚ་འུར་འུར་གྱིས་གླེང་པ་མ་ཟད། ཚོགས་པ་དང་སྒྲིག་འཛུགས་འགའ་རེས་་བཀའ་ཁྲིའི་འོས་གཞིར་བཞེངས་མཁན་འགའ་ཞིག་གི་དབར་ལ་བགྲོ་གླེང་ཁ་ཤས་ཀྱང་གོ་སྒྲིག་གནང་ཡོད། འོན་ཀྱང་ད་ལྟ་བར་དུ་མང་ཆེ་བས་རང་རང་གི་ཁམས་དང་མོས་པར་བསྟུན་ཏེ། བཀའ་ཁྲི་སུར་འོས་མིན་དང་། དེ་དག་གི་འོས་པའི་ཁྱད་ཆོས་དང་། མི་འོས་པའི་སྐྱོན་ཆ། དེ་བཞིན་སྤྱི་འཐུས་ཀྱི་འོས་གཞིའི་སྐོར་ལ་སྐབས་བཅུ་བཞི་པའི་གྲོས་ཚོགས་ཚོགས་དུས་བརྒྱད་པ་མཇུག་བསྒྲིལ་མ་ཐུབ་པའི་དབང་གིས་ད་ཡོད་སྤྱི་འཐུས་འགའ་ཞིག་ལ་སྐྱར་དུ་འོས་བླུགས་མི་འོས་པའི་སྐོར་ཙམ་གླེང་བ་ལས། དེ་མིན་ཡོང་རྒྱུའི་སྤྱི་འཐུས་ཀྱི་འོས་གཞི་དང་། འོས་འཕེན་པའི་སྐོར་ལ་དེ་ཙམ་གྱི་ཐུགས་སྣང་མ་བྱུང་བ་ལྟ་བུར་སྣང་།
སྤྱིར་མང་གཙོའི་ལམ་ལུགས་ལྡན་པའི་རྒྱལ་ཁབ་ཕལ་ཆེ་བའི་ནང་དུ་སྲིད་ཇུས་འདྲ་མིན་འཛིན་པའི་སྲིད་དོན་ཚོགས་པ་གཉིས་གསུམ་མམ། དུ་མ་ཡོད་པར་བརྟེན། འོས་འཕེན་པ་ཕལ་མོ་ཆེས་ཀྱང་རང་ཉིད་ཚོགས་པ་གང་གི་ཚོགས་མི་ཡིན་པ་དང་། སྲིད་ཇུས་གང་ལ་མོས་པ་ཡོད་པ་དེར་འོས་འཕེན་པའི་གྲོས་ཤིག་ཡོད་པ་དང་། ལྷག་པར་དུ་སྲིད་དོན་ཚོགས་པ་དང་། འོས་དམིགས་རང་ངོས་ནས་འགྲོ་གྲོན་ཕོན་ཆེ་བཏང་སྟེ། འོས་འཐོབ་ལ་རེ་བའི་དྲིལ་བསྒྲགས་དངོས་ཤུགས་བརྒྱུད་གསུམ་ནས་ཤུགས་ཆེ་བྱེད་སྲོལ་ཞིག་ཡོད་སྟབས། འོས་འཕེན་པ་ཚོས་འོས་དམིགས་རྣམས་ངོ་ཤེས་པ་མ་ཟད་ད། དེ་དག་ལ་དབྱེ་ཞིབ་དང་དཔྱད་པ་བྱེད་རྒྱུའི་གོ་སྐབས་བཟང་པོ་ཡོད།
འོན་ཀྱང་བོད་བཙན་བྱོལ་སྲིད་གཞུང་ནི། སྲིད་དོན་ཚོགས་པ་བྲལ་བའི་གཞུང་ཞིག་ཡིན་པ་དང་། ཤས་ཆེ་བ་ཆོལ་ཁ་གསུམ་དང་ཆོས་བརྒྱུད་ལྔ་ལས་གྲུབ་པའི་ཁྲིམས་བཟོའི་ལྷན་ཁང་ལྡན་པའི་མང་གཙོའི་སྒྲོམ་གཞི་ཞིག་རེད། བོད་དོན་བདེན་མཐའ་གསལ་ཐབས་ཀྱི་སྲིད་ཇུས་ཀྱི་ཆ་ནས་བལྟས་ཀྱང་། རང་སྲིད་རང་སྐྱོང་དང་། རང་བཙན། རང་ཐག་རང་གཅོད་བཅས་གསུམ་གྱི་ནང་ནས་ད་ལྟའི་ཆར་བོད་གཞུང་གི་སྲིད་ཇུས་ནི། གཉིས་སྨན་དབུ་མའི་ལམ་ལ་བརྟེན་ནས་ཆོལ་གསུམ་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་འཐོབ་ཐབས་བྱ་རྒྱུ་དེ་ཡིན་པས། མང་གཙོའི་རྒྱལ་ཁབ་གཞན་དང་མི་འདྲ་བར་བོད་མིའི་འོས་འཕེན་པ་ཚོ་ལ་ལྟ་གྲུབ་གཞི་ལ་བཞག་པའི་སྲིད་ཇུས་འཛིན་སྟངས་མི་འདྲ་བའི་ཐོག་ཏུ་འོས་འཕེན་རྒྱུའི་གདམ་ག་དེ་མེད།
ཡིན་ནའང་བོད་མི་འོས་འཕེན་པའི་ནང་དུ་རིགས་མི་འདྲ་བ་འགའ་ཞིག་ཡོད། དང་པོའི་ནང་དུ། འོས་དམིགས་རྒན་གཞོན་དང་སེར་སྐྱ་ཕོ་མོ་སུ་འདྲ་ཞིག་ཡིན་ཀྱང་། དེས་བོད་དོན་གྱི་ཐད་ལ་སྲིད་ཇུས་འཛིན་སྟངས་དང་། སྲིད་ཇུས་དེ་ཇི་ལྟར་ལག་བསྟར་བྱེད་པའི་འཐབ་བྱུས་གང་ཞིག་བེད་སྤྱོད་བྱེད་མིན། དེ་བཞིན་འབྱུང་འགྱུར་ལོ་ལྔའི་རིང་ལ་བོད་མིའི་ཤེས་ཡོན་དང་། དཔལ་འབྱོར། འཕྲོད་བསྟེན། རིག་གཞུང་འཛིན་སྐྱོང་སོགས་ཡར་རྒྱས་གོང་འཕེལ་གྱི་ཐད་ལ་གསར་གཏོད་དང་། རྒྱུན་འཁྱོངས། བསྒྱུར་བཅོས། ཕྱིར་བསྡུ་བཅས་ཇི་ལྟར་དགོས་མིན་གྱི་ལས་གཞི་ལས་འཆར་དང་། འཆར་སྣང་། ཐབས་བྱུས་བཅས་བཟང་ཤོས་སུ་ལ་ལྡན་པ་དེར་འོས་འཕེན་གྱི་ཡིན་ཟེར་མཁན་གྱི་རིགས་གཅིག་དང་། གཉིས་པའི་ནང་དུ། ངོ་ཤེས་འབྲེལ་འདྲིས་དང་། གཉེན་ཉེ་མཛའ་ཤེས། ལུང་ཚན་དང་ཚོགས་སྐྱིད་གཅིག་པ། སྡོད་གནས་གཅིག་པ་སོགས་ཡིན་པ་ཁོ་ན་རྒྱུ་མཚན་དུ་བྱས་ཏེ་འོས་དམིགས་བྱེ་བྲག་པ་ཞིག་ལ་འོས་འཕེན་མཁན་གྱི་གྲས་གཅིག གསུམ་པའི་ནང་དུ། ཁོང་རང་སློབ་སྦྱོང་ཡག་པོ་འདུག་ཟེར་བ་དང་། ཁོང་རང་ཉམས་མྱོང་ཆེན་པོ་འདུག་ཟེར་བ། ཁོང་རང་སྐད་ཆ་ཤོད་མཁས་པོ་འདུག་ཟེར་བ། ཁོང་རང་ལྟ་བཟོ་དོད་པོ་དང་མཐོང་བདེ་པོ་འདུག་ཟེར་བ། ཁོང་རང་བོད་གཞུང་གི་ལས་བྱེད་སྙིང་པ་རེད་ཟེར་བ། ཁོང་རང་མི་བཟང་པོ་དང་བློས་འཁེལ་པོ་ཡོད་རེད་ཟེར་བ་སོགས་རྒྱུ་མཚན་གཅིག་ཁོ་ན་ལ་བརྟེན་ནས་འོས་དམིགས་བྱེ་བྲག་པ་ཞིག་ལ་འོས་འཕེན་མཁན་རིགས་གཅིག བཞི་པའི་ནང་དུ། ཁོང་རང་གིས་བཀའ་ཤག་སྔོན་མའི་སྲིད་ཇུས་མུ་མཐུད་ཀྱི་རེད་ཟེར་བ། ཁོང་རང་དབུ་མའི་ལམ་ལ་ཡིད་ཆེས་བྱེད་མཁན་རེད་ཟེར་བ། ཁོང་རང་རང་བཙན་བརྩོད་མཁན་རེད་ཟེར་བ་བཅས་ལངས་ཕྱོགས་ལ་བརྟེན་ནས་འོས་འཕེན་པ་རིགས་གཅིག ལྔ་པའི་ནང་དུ། ངས་ནི་འོས་དམིགས་སུ་ཡང་ཡག་པོ་ངོ་ཤེས་ཀྱི་མེད་ལ། སྲིད་དོན་གྱི་སྐོར་ལའང་རྒྱུས་མངའ་གང་ཡང་མེད་པས་ཁྱེད་རང་གིས་སུ་ལ་འོས་བླུགས་དགོས་རེད་ཟེར་བ་དེར་བླུགས་ཀྱི་ཡིན་ཟེར་མཁན་རིགས་གཅིག ༼འདིའི་ནང་དུ་ད་ཡོད་ཀྱི་བཀའ་བློན་ཁྲི་པ་དང་། སྤྱི་འཐུས་ཚོགས་གཙོ་སུ་ཡིན་མི་ཤེས་མཁན་གྱི་གྲས་ཀྱང་ཡོད།༽ དྲུག་པའི་ནང་དུ། ང་རང་འོས་བླུགས་འདོད་འདུག་ཀྱང་། དཔྱ་ཁྲལ་ལག་དེབ་མེད་ཟེར་མཁན་དང་། ཡང་ང་རང་གི་ལངས་ཕྱོགས་དང་མཐུན་པའི་སྲིད་ཇུས་འཛིན་མཁན་གྱི་འོས་དམིགས་སུ་ཡང་མི་འདུག། བྱས་ཙང་ང་འོས་ཤོག་བླུགས་ཀྱི་མིན་ཟེར་མཁན་གྱི་རིགས་གཅིག་བཅས་ཡོད། དེས་ན། བཀའ་ཁྲི་དང་སྤྱི་འཐུས་ཀྱི་གོ་གནས་ལ་རེ་བའི་འོས་དམིགས་ཚང་མའི་དགོངས་པར་འཇགས་དགོས་པ་ཞིག་ལ། གོང་གསལ་འོས་འཕེན་པའི་རིགས་གཉིས་པ་དང་། དྲུག་པ་ཕུད་པའི་གཞན་རྣམས་ཀྱི་འོས་ཤོག་གི་གྲངས་འབོར་ཆེན་པོ་ཡིན་སྟབས། གནད་དོན་དེ་དག་གི་ཐོག་ལ་དགོངས་པ་བཞེས་ཏེ་འཆར་གཞི་འགོད་གལ་ཆེ་བར་སྙམ།།

དེ་རིང་ངོ་དེབ་སྟེང་དུ་སྐུ་ཞབས་དོན་གྲུབ་རྒྱལ་གྱིས་བརྩམས་པའི་༼འདི་ནའང་དྲག་ཏུ་མཆོངས་ལྡིང་བྱེད་བཞིན་པའི་སྙིང་གསོན་པོ་ཞིག་འདུག༽ཅེས་པའི་སྙན་རྩོམ་འདི་གྱེར་འདོན་ཞིག་ལ་ཉན་རྗེས་སེམས་སུ་དགའ་སྐྱོ་འདྲེས་མའི་ཚོར་བ་ཞིག་སྐྱེས།

འདི་ནི་སྐུ་ཞབས་དོན་གྲུབ་རྒྱལ་གྱི་རང་མོས་སྙན་རྩོམ་ལེགས་ཤོས་ཞིག་ཡིན་ལ། ༡༩༨༠ དཀྱིལ་ཙམ་ལ་ཁོང་གི་སྙན་རྩོམ་འདི་པར་སྐྲུན་མ་བྱས་གོང་། ངའི་སློབ་གཉེར་བྱེད་སའི་མཚོ་སྔོན་མི་རིགས་སློབ་གྲ་ཆེན་མོའི་བོད་རིགས་སློབ་མ་ཁག་ཅིག་གི་ལག་ཏུ་སྙན་རྩོམ་འདིའི་མ་ཡིག་ལག་བྲིས་ཞིག་རག་ཡོད་པ་དེ། ང་ཚོས་ཕར་བཤུ་ཚུར་བཤུ་བྱས་ནས་སློབ་མ་མང་པོ་ཞིག་གིས་སྙན་རྩོམ་འདི་བློ་ངོར་ཀློག་ཐུབ་ཀྱིན་ཡོད། སྙན་རྩོམ་གྱེར་འདོན་འདིར་ཉན་སྐབས། སྐུ་ཞབས་དོན་གྲུབ་རྒྱལ་དགོངས་པ་མ་རྫོགས་པའི་ཟླ་ཁ་ཤས་སྔོན་༡༩༨༥ ལོའི་དབྱར་ཁར། ཁོང་མཚོ་སྔོན་མི་རིགས་སློབ་གྲ་ཆེན་མོའི་ནང་ཕེབས་ནས ང་ཚོའི་འཛིན་གྲའི་དེང་རབས་རྩོམ་རིག་དགེ་རྒན་སངས་རྒྱས་རིན་ཆེན་གྱི་ཚབ་བྱས་ནས་དོན་གྲུབ་རྒྱལ་གྱིས་ལག་གཡས་བར་ས་སྨྱུག་བསྐོར་ཅིང་།ལག་གཡོན་པའི་མཛུབ་གུ་གཉིས་ཀྱི་བར་ཐ་མ་ཞིག་བཟུང་ནས་སློབ་ཁྲིད་ཐེངས་གཅིག་བྱས་བའི་རྣམ་པ་དེ་ཡང་མིག་ལམ་དུ་འཁོར་ལ། ༼ང་ཚོ་བོད་མི་རིགས་ནི་གངས་སེང་གངས་དུ་འགྲེང་དང་འདྲ་ལ། བོད་ཀྱི་རྩོམ་རིག་ནི་ཁྱུང་ཆེན་མཁའ་ལ་འཕུར་བ་མཚུངས།༽ཞེས་སློབ་ཁྲིད་འགོ་འཛུགས་པའི་སྐད་གདངས་དེའང་རྣ་ལམ་དུ་འཁོར། སྐུ་ཞབས་དོན་གྲུབ་རྒྱལ་དགུང་ལོ་སོ་གཉིས་སྟེང་གྲོངས་པ་རེད་ཡ།

འབྲེལ་ཡོད་གནས་ཚུལ།
སྐུ་ཞབས་དོན་འགྲུབ་རྒྱལ་དང་ཁོང་གི་བརྩམས་ཆོས།

ན་མོ་གུ་རུ་པདྨ་ཏྰ་ར་ཡེ། །

༡ ཨེ་མ་སྟོང་ཉིད་ལྷ་མོ། །
ཝྃ་ཆེན་ཚོགས་ལ་ཕེབས་ནས། །
ཟུང་འཇུག་སྒྱུ་འཕྲུལ་ལོངས་སྤྱོད། །
མཉམ་རོལ་ཕྱག་རྒྱ་ངོམ་ཤོག །

༢ སྐལ་བཟང་པདྨ་གེ་སར། །
ཆོས་དཔལ་ཡིད་ཀྱི་དགའ་སྟོན། །
བཀྲ་ཤིས་བདེ་ལེགས་རོལ་དབྱངས། །
གཡུ་སྦྲང་གཤོག་པར་རང་གྲུབ། །

༣ ཤར་ནུབ་རྒྱ་མཚོ་ཆེན་པོས། །
ཐག་རིང་ཡུལ་གྱིས་བསྐལ་ཡང་། །
བརྩེ་གདུང་དམ་ཚིག་མདུད་པ། །
ནམ་ཡང་འབྲལ་བ་མི་འདུག །

༤ ཐུགས་དམ་ཤེལ་གྱི་མཆོད་རྟེན། །
ཕྱི་གསལ་ནང་གསལ་དག་པ། །
ཡིད་མཐུན་པདྨ་གེ་སར། །
སྙིང་གི་དཀྱིལ་ནས་དྲན་སོང་། །

༥ ལས་ཉོན་བག་ཆགས་རྒྱུ་བ། །
རླུང་ནག་དྲག་ཏུ་གཡོས་ཀྱང་། །
མི་འགྱུར་རྡོ་རྗེའི་སྙིང་གཏམ། །
ནམ་ཡང་འགྱུར་རྒྱུ་མི་འདུག །

༦ ལྷོ་ཁའི་ཞིང་གི་འབྲུ་སྔོན། །
བྱང་ཐང་དགེ་བའི་བསོད་ནམས། །
རང་བྱུང་རྟེན་འབྲེལ་འགྲིག་ན། །
ནུབ་མེད་འོད་གསལ་འཆར་ཡོང་། །

༧ ཉིན་སྣང་སེམས་ཀྱི་དྲན་པ། །
མཚན་སྣང་རྨི་ལམ་བག་ཆགས། །
སད་རྨིས་བར་དོའི་ཕྲེང་ནས། །
སྙིང་གྲོགས་བརྗེད་རྒྱུ་མི་འདུག །

༨ ཡ་ཀིའི་ཐང་དཀར་རྒོད་པོས། །
གནམ་ཐང་བགྲོད་པ་མཐོང་ཚེ། །
མཇལ་འདོད་བྱམས་པའི་ཕྱོགས་ལ། །
ཡིད་ཀྱི་བྱ་རྒོད་འཕུར་སོང་། །

༩ མ་ཀིའི་གསེར་ཉ་བདེ་མོས། །
གཙང་ཆབ་འཁྱུག་འགྲོས་མཐོང་ཚེ། །
བརྩེ་དུང་འགྱུར་མེད་དམ་པ། །
ཞི་བདེ་ནང་ནས་འཆར་འདུག །

༡༠ ཐུགས་རྒྱུད་ཤིན་དུ་བཟང་མོས། ། །
བརྩེ་གདུང་རྒྱུན་ཆད་མ་བྱུང་། །
ལྷ་དང་བླ་མའི་བྱིན་རླབས། །
སྙིང་གི་དཀྱིལ་དུ་སྨིན་སོང་། །

༡༡ གོ་ལའི་འབྱུང་འགྱུར་དབང་གིས། །
དཀར་གསལ་ཟླ་བའི་འཕེལ་འགྲིབ། །
ལྟར་སྣང་ཡར་མར་མཐོང་ཡང། །
དོན་ལ་འགྱུར་བ་མི་འདུག །

༡༢ ཆུང་ནས་འདོད་པའི་ནོར་བུ། །
ཆེ་ནས་ལག་ཏུ་ལོན་པ། །
རྨི་ལམ་ནང་གི་མཇལ་འཛོམས། །
རེ་འདོད་གྲུབ་པས་བདེ་སོང་། །

༡༣ རང་སེམས་མཐུན་པའི་སྙིང་གྲོགས། །
གཏན་བདེའི་འདུན་མ་བྱུང་བས། །
དགོས་འདོད་འབྱུང་བའི་ནོར་བུ། །
རྙེད་པ་དེ་དང་འདྲ་བྱུང་། །
༡༤ གཞན་གྱི་སྡུག་བསྔལ་བསལ་ཕྱིར། །
རྟག་ཏུ་ཕན་གྲོགས་བྱེད་པ། །
བྱམས་ལྡན་པདྨ་ཏཱ་ར། །
བརྩེ་ལྡན་མ་དང་འདྲ་སོང་། །

༡༥ ཐབས་ཤེས་ཟུང་འཇུག་ཡེ་ཤེས། །
བདེ་སྟོང་ལྷན་སྐྱེས་འདྲེན་པའི། །
མཚན་ལྡན་པདྨ་གེ་སར། །
ཕྱག་རྒྱའི་ཁབ་ཏུ་སོན་འདུག །

༡༦ བཅུ་དྲུག་ལང་ཚོ་སོན་པས། །
བདེ་ཆེན་མི་འགྱུར་རྡོ་རྗེའི། །
རིག་རྩལ་གློག་ཞགས་དམར་པོས། །
བརྟན་གཡོ་གཅིག་ཏུ་བཟླུམ་སོང་། །

༡༧ འཛུམ་དཀར་མུ་ཏིག་ཕྲེང་བ། །
མཛེས་ཞལ་ཟླ་བ་དཀར་པོ། །
པདྨའི་ཕྱག་རྒྱ་ཆེན་པོ། །
ཡང་ཡང་ཡིད་ལ་འཁོར་སོང་། །

༡༨ སྟོད་ན་གངས་དཀར་རི་བོ། །
གཟི་མདངས་སྔར་ལས་ལྷག་པ། །
སྙིང་གི་བརྩེ་གདུང་རྒྱ་མཚོ། །
དམ་ཚིག་དེ་ལས་ཟབ་པ། །

༡༩ ཀུན་རྟོག་དྲན་པའི་མེ་ལོང་། །
ཡང་ཡང་བྱི་དོར་བྱས་ཀྱང་། །
བརྗེད་མེད་ཡིད་ཀྱི་མེ་ཏོག །
ནམ་ཡང་དོར་རྒྱུ་མི་འདུག །

༢༠ པདྨ་གེ་སར་སྡོང་པོ། །
དབྱར་དགུན་ཁྱད་པར་ཡོད་ཀྱང་། །
སྙིང་གི་པདྨ་གེ་སར་། །
ནམ་ཡང་རྙིང་རྒྱུ་མི་འདུག །

༢༡ བོད་ཡུལ་དབུས་ཀྱི་པདྨ། །
རང་ཡིད་འཕྲོག་པའི་ལས་དབང་། །
རྒྱུ་རྐྱེན་རྟེན་འབྲེལ་འགྲིག་ན། །
འཆི་ཡང་འགྱོད་པ་མི་འདུག །

༢༢ སློབ་ཆེན་མཐར་ཕྱིན་ཁྱེད་དང་། །
སློབ་ཕྲུག་དྭ་ལི་ངེད་གཉིས། །
སྡོད་ས་ཤར་ནུབ་ཁ་ཁར། །
འཛོམས་ས་སྒྱུ་འཕྲུལ་དྲྭ་མིག །

༢༣ སྐྱིད་སྡུག་བཤད་སའི་སྙིང་གྲོགས། །
ས་ཐག་རིང་ཐུང་མི་འདུག །
སེམས་ཁུང་དུང་ཟླ་དཀར་པོ། །
ནམ་ཡང་འཕེལ་གྲིབ་མི་འདུག །

༢༤ སེམས་པ་ཁྱེད་ལ་ཤོར་ནས། །
མཚན་མོའི་རྨི་ལམ་རྨིས་ནས། །
ཉིན་མོ་མཇལ་དུ་མེད་ཀྱང་། །
ཡིད་ཐང་ཆད་རྒྱུ་མི་འདུག །

༢༥ བརྩེ་གདུང་དུང་སེམས་དཀར་པོ། །
སྙིང་གི་དཀྱིལ་ནས་ཤར་བྱུང་། །
མ་སྒོམ་པདྨའི་ཞལ་རས། །
ཡིད་ལ་འཁོར་འཁོར་བྱས་བྱུང་། །

༢༦ ན་ནིང་འཕྲད་པའི་སྙིང་གྲོགས། །
ད་ལོ་འབྲལ་དགོས་བྱུང་ན། །
རང་ལུས་སྐྱ་མོ་གྲུ་བཞི། །
མི་འདོད་གཡུག་དགོས་བསམ་ཡོད། །

༢༧ བདེན་གཉིས་མཁྱེན་པའི་ཤེས་རབ་། །
ངེས་ཤེས་རིན་ཆེན་སྒྲོན་མེ། །
མི་ཕྱེད་དད་པའི་འོད་ཟེར། །
ནམ་ཡང་ཉམས་པ་མི་འདུག །

༢༨ དཔྱིད་དུས་ལུ་གུའི་མེ་ཏོག །
ནམ་ཟླ་འཕོ་འགྱུར་སྣང་ཡང་། །
སྙིང་སྲོག་རྡོ་རྗེ་དཀར་པོ། །
གྱོང་རྒུད་འགྱུར་བ་མི་འདུག །

༢༩ དབྱར་ཐང་རྩི་ཤིང་སྣ་ཚོགས། །
སྐྱེ་འཆི་དར་རྒུད་སྣང་ཡང་། །
ལྷག་བསམ་རིན་ཆེན་ནོར་བུ། །
གང་བསམ་འགྲུབ་པ་ངོ་མཚར། །

༣༠ སྟོན་ཀའི་གསེར་སྦྲང་སེར་པོ། །
བསམ་པའི་ལས་འཕྲོ་མ་ཟད། །
གཡུ་སྦྲང་སེམས་པ་མ་སྐྱོ། །
བདེ་ཆེན་ཞིང་ནས་མཇལ་ཡོང་། །

༣༡ དགུན་དུས་གྲང་ངར་རྒྱས་ནས། །
རི་ལུང་ཁ་བས་བཟུང་ཡང་། །
གཏུམ་མོའི་བདེ་དྲོད་ཉི་མས། །
སྒོ་གསུམ་དགའ་བདེས་ཁེངས་སོང་། །

༣༢ ཆར་ཆུ་དཀོན་པའི་དུས་སུ། །
རྩི་ཐོག་སྨིན་གྲོལ་མེད་ཀྱང་། །
ཉམས་ལེན་བདུད་རྩིའི་ཐིག་པ། །
ནམ་ཡང་འབྲལ་བ་མི་འདུག །

༣༣ ང་དང་པདྨ་གཞོན་ནུ། །
མཇལ་འདོད་སྨོན་ལམ་ཚིག་གསུམ། །
དོན་གྲུབ་བསམ་པ་དཀར་པོ། །
ནམ་ཡང་བརྗེད་ས་མ་རེད། །

༣༤ གངས་དཀར་སེམས་པ་མེད་ཀྱང་། །
ལས་རླུང་ཁྲག་གི་འཁོར་ལོ། །
གདོང་དམར་དུར་ཁང་ཁྲ་མོ། །
གཤིན་རྗེའི་ཁྲིམས་ལས་བཙན་སོང་། །

༣༥ བྱ་རྒྱལ་ཁྱུང་ཆེན་དམ་པ། །
རི་རྒྱལ་རྩེ་རུ་འཕུར་སོང། །
ཁྭ་ཏ་ནག་ཆུང་ངེད་གཉིས། །
གྲོང་མཐའ་འདི་རུ་ལྷག་འདུག །

༣༦ གངས་སེང་གཡུ་རལ་ཅན་པོ། །
གངས་རིའི་ཕྱོགས་སུ་མ་ཉེ། །
རྒྱང་རིང་ནགས་སུ་བསྐྱོད་པས། །
ལས་ངན་སེང་ཕྲུག་སྐྱོ་བ། །

༣༧ རྒྱ་སྟག་དཔའ་ངར་ཇེ་ཆེ། །
འབྲོང་གཡག་ནུས་པ་ཇེ་ཆུང་། །
དགྲ་གཉེན་བསམ་པ་ཁ་ཁ། །
ནམ་ཡང་མཐུན་ས་མ་རེད། །

༣༨ གཡུ་འབྲུག་སྙན་གྲགས་ཅན་པོ། །
རྨ་བྱ་ཁབ་ཏུ་མ་བཞེས། །
སེངྒེའི་མགོ་བོ་གནོན་འདོད། །
དུག་སྦྲུལ་རྐན་སྒྲ་གནང་འདུག །

༣༩ རྟ་མཆོག་རླུང་གི་འཁོར་ལོ། །
འཛམ་གླིང་སུམ་གཉིས་དབང་བའི། །
བསོད་ནམས་རླུང་རྟ་དཀར་པོ། །
རྔོ་དང་འགྲུམ་འབིས་མནར་འདུག །

༤༠ སྐལ་བཟང་ནམ་ཟླ་དྲོན་པོ། །
རེ་ཞིག་མྱོང་དགོས་བསམ་ཡང། །
བཟང་ངན་གོ་ལོག་མོད་པས། །
རང་སེམས་ཁོ་ཐག་ཆོད་ཐལ། །

༤༡ ཕ་མེས་ཤེས་རབ་ཅན་པོ། །
མ་མེས་སྙིང་རྗེ་ཆེན་པོ། །
ཡང་མེས་བྱང་སེམས་ཅན་པོ། །
བསམ་ན་སེམས་པ་སྤྲོ་སོང་། །

༤༢ དུར་ཁང་གཤིན་ཐང་སྐྱ་མོར། །
ཞེན་པས་ཕྱི་མིག་བལྟས་ཀྱང་། །
སྙིང་རླུང་མུན་པ་ནག་པོ། །
ནམ་ཡང་སངས་ཐབས་མི་འདུག །

༤༣ འཁོར་བའི་འདམ་ལ་ཆགས་ནས། །
རེ་ཞིག་སྡོད་དགོས་བསམས་ཀྱང༌། །
ཕུ་ནུས་བྱེད་སྟངས་མཐོང་ཚེ། །
ཞེན་ཆགས་མ་གྲོལ་རང་གྲོལ། །

༤༤ ཁྲེལ་གཞུང་མེད་པའི་གྲོགས་པོས། །
གཡོ་སྒྱུས་འཁོར་ལོ་བསྐོར་ནས། །
དྲང་བདེན་རྒྱབ་ཏུ་གཡུག་པའི། །
རྫུན་གྱི་ནད་རྐྱལ་གཉེར་འདུག །

༤༥ བྱམས་བརྩེའི་པད་སྡོང་དཀར་པོ། །
སྐྱེད་ཚལ་དཀྱིལ་དུ་བཙུགས་ཡོད། །
ང་དང་པདྨ་གེ་སར། །
མཇལ་བའི་རྟེན་འབྲེལ་བསྒྲིག་ཡོད། །

༤༦ རྩ་བ་ཡན་ལག་སྟོང་ལྡན། །
བདུད་རྩི་སྨན་གྱི་མཆོད་པ། །
དཀོན་མཆོག་གསུམ་ལ་འབུལ་ནས། །
བསྟན་འགྲོར་ཕན་བདེ་སྨོན་ཡོད། །

༤༧ ས་ཆུ་མེ་རླུང་འཇིགས་པས། །
གོ་ལའི་ས་ཞིང་འཇིག་ཀྱང་། །
བརྩེ་གདུང་དགའ་བའི་སེམས་པ། །
ནམ་ཡང་འཇིག་རྒྱུ་མི་འདུག །

༤༨ སྔོན་འགྲོ་དཔག་བསམ་སྡོང་པོ། །
སྲུང་སྐྱོབ་ལེགས་པར་གྱིས། །
རང་ལུས་དལ་འབྱོར་རིན་ཆེན། །
སྙིང་པོ་ལོན་པར་འདུག་གོ །

༤༩ ངེས་འབྱུང་ཞིང་ས་གཤིན་པོ། །
བཅོས་མིན་སེམས་ལ་འཁྲུངས་ན། །
ཡོན་ཏན་འབྲུ་དྲུག་སྙིང་པོ། །
འབྲས་བུ་སྨིན་པ་འདུག་ལགས། །

༥༠ བྱང་ཆུབ་སེམས་མཆོག་རིན་ཆེན། །
ནོར་བུ་རང་ལག་ཡོད་དུས། །
བྱི་དོར་ཡང་ཡང་གྱིས་དང་། །
དགོས་འདོད་འབྱུང་གནས་ཡིན་འདུག །

༥༡ སྣང་སྲིད་རྣམ་དག་བདུད་རྩི། །
དམ་ཚིག་རྡོ་རྗེས་མཆོད་ན། །
ལྷ་ལྕམ་པདྨ་གེ་སར། །
སྐྱེ་འཆི་མེད་པར་བརྙེས་འགྲོ། །

༥༢ དུང་སེམས་གཞོན་ནུ་བུམ་སྐུར། །
འཁོར་འདས་ཁྱད་པར་མི་འདུག །
རྣམ་དག་མཉམ་ཉིད་བཀོད་པ། །
རང་གི་རིག་པའི་ཆོ་འཕྲུལ། །

༥༣ རང་སེམས་ངོ་བོ་སྟོང་པ། །
ཆོས་སྐུ་སྣང་བ་མཐའ་ཡས། །
རང་ངོ་རང་གིས་ཤེས་ན། །
ཆོས་དབྱིངས་གཞན་དུ་མི་འདུག །

༥༤ སེམས་ཉིད་རང་བཞིན་འོད་གསལ། །
ལོངས་སྐུ་ཐུགས་རྗེ་ཆེན་པོ། །
སྣང་སྲིད་རྣམ་དག་ཞིང་ཁམས། །
རང་སེམས་དག་པའི་སྣང་བ། །

༥༥ རིག་རྩལ་ཐུགས་རྗེ་ཀུན་ཁྱབ། །
སྤྲུལ་སྐུ་པདྨ་རྒྱལ་པོ། །
རྣམ་རྟོག་འཕྲོ་འདུ་བཟང་ངན། །
རིག་པའི་རྒྱན་དུ་ཤར་འདུག །

༥༦ དུག་ལྔའི་རྟོག་པ་ཅི་ཤར། །
ངོ་ཤེས་རྒྱལ་བ་རིགས་ལྔ། །
ཁོ་ཐག་ནང་ནས་ཆོད་ན། །
གནས་ལུགས་དོན་གྱི་ཡེ་ཤེས། །

༥༧ ཕུང་ཁམས་སྐྱེ་མཆེད་རྟེན་འབྲེལ། །
གཟུགས་སྒྲ་དྲི་རོ་རེག་བྱ། །
སྣང་སྟོང་ཟུང་འཇུག་གོ་ན། །
དོན་དམ་དབུ་མ་ཆེན་པོ། །

༥༨ བདེ་ཆེན་སེམས་ཀྱི་རོལ་བ། །
སྟོང་ཉིད་ངེས་ཤེས་སྒྲོན་མེ། །
གསལ་སྟོང་ཟུང་འཇུག་མྱོང་ན། །
ལྷན་སྐྱེས་ཕྱག་རྒྱ་ཆེན་པོ། །

༥༩ གང་ཤར་ཚོགས་དྲུག་རོལ་བ། །
རིག་རྩལ་སེམས་ཀྱི་དེ་ཉིད། །
རིག་སྟོང་ཟུང་འཇུག་རྟོགས་ན། །
རང་བཞིན་རྫོགས་པ་ཆེན་པོ། །

༦༠ མི་ལུས་ཡིད་བཞིན་ནོར་བུ། །
རྩ་ཐིག་རླུང་གི་དཀྱིལ་འཁོར། །
གསང་ཆེན་གནད་ལ་སྣུན་དང་། །
སྨིན་གྲོལ་ཐོབ་པར་ཡོད་འདུག །

༦༡ རང་སྣང་དགྲ་རུ་མ་བཟུང་། །
རང་ངོར་རང་གིས་ལྟོས་དང་། །
རང་སེམས་སངས་རྒྱས་ཐོབ་ཐབས། །
གཞན་དུ་རྩལ་དགོས་མི་འདུག །

༦༢ རྨི་ལམ་ནང་གི་མཐོང་སྣང་། །
སྙིང་གྲོགས་དམ་པས་བསྐུལ་མ། །
ཅི་ཤར་སེམས་ཀྱི་རི་མོ། །
མི་བརྗེད་དྲན་ཐོ་བཀོད་ཡོད། །

༦༣ དགེ་རྩ་དགོས་འདོད་ཀུན་འབྱུང། །
ཚོགས་གཉིས་རྒྱན་ཏུ་ཕུལ་ན། །
སྐུ་གཉིས་ཉི་ཟླའི་དཀྱིལ་འཁོར། །
ནམ་ཡང་ནུབ་མེད་སྨོན་ནོ། །

༦༤ རབ་རྒྱན་ལྕགས་ཕོ་སྟག་ལོའི། །
སྣྲོན་ཟླའི་མཁའ་འགྲོ་དུས་ལ། །
ལྷག་ལྷའི་ཆོས་ཚོགས་ཁང་ནས། །
དཔལ་དགྱེས་རྡོ་རྗེས་ཕུལ་ལོ། །
ཞེས་པ་འདི་ནི་རྨི་ལམ་ཚོར་སྣང་ཞིག་གིས་བསྐུལ་མས་ཐོལ་བྱུང་དུ་བྲིས་ཀྱང་ཡང་སྐྱར་བལྟས་ཀྱང་ཕྱི་ནང་གསང་གསུམ་ལ་གོ་རྒྱུ་ཆེན་པོ་དག་འདུག་སྙམ་ནས་རྒྱ་དང་དབྱིན་ཇིའི་སྐད་ཡིག་ཏུ་བསྒྱུར་བ་བྱས་པ་ཡིན། གཟིགས་དང་གྲོགས་པོ་ཚོ། །

སེམས་ཀྱི་སྐྱིབས་ཁུགས་སུ་འདར་བའི་རང་བྱུང་གི་གཤིས་ལ།།
དུས་གསུམ་གང་དུ་འང་མི་འགྱུར་ཆོས་ཉིད་ཀྱི་རྣམ་ཤེས།།
རྒྱབ་མདུན་གཏད་སོ་ཡི་བྲལ་བ་སེམས་ནང་གི་འཆར་གཞི།།
གཅིག་དུ་སྤུངས་པ་རུ་འབོད་པ་འགྲོ་བ་ཡི་ཚེ་སྲོག།

འདས་ཀྱང་སྲུང་བྱ་ཡི་སྟོང་བའི་འཇའ་གཟུག་ཀྱི་གནམ་འོག།
བྲིས་ཀྱང་འབྲི་སྨྱུག་གི་གཟད་པོའི་རྒྱུ་ཆ་ལས་གྲུབ་པའི།།
བརྩད་ཀྱང་ཚར་ཐབས་ཤིག་མེད་པ་ཞེ་སྡང་གི་འཐབ་ར།།
དེ་ཉིད་སྤྱི་གཙུག་དུ་བཀུར་མཁན་རྒྱལ་གཅེས་སུ་གྲུབ་འདུག།

གཟུགས་བསྡུས་འཛིན་མེད་ཀྱི་དགའ་སྡུག་འཕྲུལ་ཤེས་ཀྱི་རྟ་ལ།།
ཉེས་མེད་ལྕགས་ནག་གི་ཡང་ཡང་བརྒལ་བ་ལ་གཞུས་དུས།།
དྲིན་ལ་དྲིན་ཤེས་ཀྱི་ན་བུན་རྒྱང་རིང་གི་གླུ་སྐད།།
རྣ་བའི་བུ་རམ་དུ་ངར་ཞོར་སྐྱིད་སྣང་ལ་བསྲེས་འདུག།

རྒྱུས་མེད་དུར་ཐང་གི་ཕྱོགས་ནས་ཨག་སྐད་ཅིག་བརྒྱབ་ཀྱང་།།
ཉེ་ལ་སྙིང་སྡུག་གི་ཞལ་རས་འཛུམ་མདངས་དེ་མ་བཤིག།
དུངས་བ་བཀའ་དྲིན་གྱི་ཡབ་མེས་དམ་པ་ཡི་རྗེས་ཀྱང་།།
ཆལ་མོའི་གཡོ་ལས་ཀྱི་གཞུག་དུ་སྤྲུད་སྨན་གྱི་བཟི་འདུག།

ཨེས་སུ་རལ་རྒྱལ་ཁབ་ཀྱི་ལྷོ་ཕྱོགས་ཨེས་ལ་ཀྲི་ལ་ནས་༣༠།༨།༡༠མཚན་མོར། དབུགས་སྔ་གསོ་ཆེད་དུ་བྲིས་པ་ལས། གཞན་ལ་ངོམ་སོ་བྱེད་ཆེད་དུ་འབྲི་དོན་མེད་ལ། འབྲི་ཡང་འདོད་ཀྱི་མི་འདུག བྲིས་ཀྱང་ཕན་ཐོག་ཡོད་པ་ཞིག་ངས་ནམ་ཡང་འཁྱོང་ཁག་པོ་རེད། ཁག་ས་དེ་ནས་ངས་དུས་རྒྱུན་དུ་རོ་ལངས་ཤིག་བརྒྱབ་དེ་བསྡད་ཡོད།

ང་ཚོས་དེང་སང་དྲ་ངོས་མི་ཉུང་བ་ཞིག་ན། སྐད་ཤུགས་ཆེན་པོའི་སྒོ་ནས་དང་སྤྱར་ཡིག་འདྲ་མིན། གཏམ་བཤད་འདྲ་མིན། བརྙན་འཕྲིན་འདྲ་མིན། གསུང་བཤད་འདྲ་མིན། གླེང་ཕྱོགས་འདྲ་མིན། འདོད་མོས་ཡོད་མེད་ལ་མ་བལྟས་པར། ཉིས་སྟོང་བཅུ་གཅིག་ནི་སླེབས་དེ་འོང་བཞིན་པའི་སྐབས་ཏག་ཏག་འདི་ལ་དགའ་འོས་པའི་དོན་དག་ཆེན་པོ་ཞིག་ཡོད་པ་དེ་ནི་བོད་མི་བྱེས་པ་ཚང་ལ་བཀའ་བློན་ཁྲི་བ་བླངས་མཁན་མེད་པའི་དཀའ་ངལ་དེ་ལས་བརྒལ་ནས། ཉིན་རེ་ཡི་རྗེས་སུ་མི་རེ་འབྱོར་ནས་ང་བཀའ་བློན་ཁྲི་བར་བླང་གི་ཡིན། འདི་ངའི་དམ་བཅའ་ཡིན། འདི་ངའི་དམིགས་ཡུལ་ཡིན། འདི་ངའི་བྱེད་འདོད་ཀྱི་འཆར་གཞི་ཡིན། བོད་མི་དམངས་ཀྱིས་ང་རང་འདེམས་པ་ཡིན་ན། བོད་མི་མང་གིས་ང་རང་གར་སྟེགས་དེར་བསྐྱལ་སོང་བའི་ཉིན་མ་དེར་ཟེར་བའི་སྐད་ཆ་དེ་གོ་དུས་དངོས་ནས་དགའ་ནས་གཉིད་ཆོག་ཆོག་ལ་ཞིག་གི་དུས་ཚོད་ཅིག་ལ་བསྐྱལ་འདུག་སྙམ་པའི་ཚོར་སྣང་ཡང་སྟེར།

བསམ་བློ་ཞིབ་མོ་ཞིག་བཏང་དུས་སུ། མི་འདོད་ཀྱང་ཚོར་བ་སྐྱུར་མོ་ཞིག་དང་འགྲོག་ནས་འོང་བའི་སྡུག་བསྔལ་ཞིག་དང་སྐྱོ་སྣང་ཞིག་འདྲུད་དེ་འོང་། དེ་ནི་དངོས་ནས་བོད་མི་རིགས་ཀྱི་བདེ་དོན་ཆེད་དུ་རང་གི་ཚེ་སྲོག་གི་དམ་འབུལ་བྱེད་པའི་མི་བུ་ཤེས་འཇོན་ལྷག་བསམ་གྱི་ཕྱུགས་པའི་བཀའ་བློན་ཁྲི་བ་ཞིག གངས་ཅན་བོད་མིའི་གཞིས་བྱེས་ཀྱི་སྐྱིད་སྡུག་ཆེད་དུ་ཡོང་གི་ཡོད་མེད་དེ་རེད་ལ། དེ་ནི་དངོས་ནས་བསམ་གཞིགས་མི་བྱེད་ཐབས་མེད་ཀྱི་གནས་ཤིག་ཀྱང་ཆགས་ཡོད། ངས་ཉིན་ལྟར་དྲ་ངོས་མི་ཉུང་བ་ཞིག་ནས་བཀའ་བློན་ཁྲི་བའི་རྐུབ་སྟེགས་དུ་ཡོང་འདོད་ཡོད་མཁན་གྱི་བོད་མི་ཤེས་ཡོན་ཅན་དུ་འབོད་པའི་གྲངས་དང་མཁས་དབང་དུ་བརྩི་བཞིན་པའི་བོད་མི་མི་ཉུང་བ་ཞིག་གི་ངོ་གདོང་དང་ལོ་རྒྱུས་དག་དང་། ལོ་རྒྱུས་དེ་དག་གི་རྒྱབ་ལྗོངས་ན་ཤ་གཟད་རུས་ཐུག་གི་མཆན་པུ་འདེབས་མཁན་གྱི་དྲ་ཐོག་གི་སྤུན་ཟླ་དང་། སྲང་བར་གྱི་ཅ་ཅོ་འདོན་མཁན་གྱི་མི་དམངས་དཀྱིས་མ་བཅས་ལ་རྣ་བ་ཞིབ་དུ་གཏད་དུས་སུ། ད་དུང་ཡང་། ང་རང་ལ་རང་བཞིན་གྱིས་སྐྱོ་སྣང་ཞིག་འོང་གི་འདུག

སྐྱོ་སྣང་དེ་ནི་གོང་གི་དགའ་སྣང་དེ་དང་བསྡུར་ནས་བཤད་དུས། དངོས་ནས་སྐྱོ་སྣང་དེ་ཤུགས་ཆེན་པོ་འདུག་ལ། སྐྱོ་སྣང་དེ་ཡོང་དོན་ཡང་གཏན་ནས་རྒྱུད་རིམ་མེད་པ་ཞིག་མ་རེད། དངོས་ནས་བོད་མི་མང་གི་ཆེད་དུ་ལས་དོན་ཞིག་བྱེད་དགོས་པ་ཡིན་ན། ཁོང་ཚོ་ལ་སྔ་ནས་ཐོབ་མྱོང་བའི་རྐུབ་སྟེགས་དེ་དག་ལས་ཁོང་ཚོས་བྱ་བ་དེ་དག་མགོ་ཞིག་བཙུགས་ན་ཅིས་མ་ཆོག་པ་རེད། ངས་འདི་ལྟར་བསམ་བློ་ཞིབ་དུ་བཏང་དུས་སུ། ངས་ད་དུང་སེམས་ལ་སྐྱོ་སྣང་འོང་གི་འདུག དངོས་ནས་ཁོང་ཚོ་མིང་དང་རྐུབ་སྟེགས་ལས་ཀྱང་རྩ་ཆེ་བའི་གངས་ཅན་གཞིས་ལུས་གཉིས་ཀྱི་སྐྱིད་སྡུག་བསམ་ཕོད་པ་ནས་བཤད་ཕོད་པ། བཤད་ཕོད་པ་ནས་སྒྲུབ་ཕོད་པ། སྒྲུབ་ཕོད་པ་ནས་རང་གི་ཚེ་སྲོག་ཚུན་ཆད་བདེན་དཔུང་དུ་བཞག་ནས་བོད་དོན་སྒྲུབ་མཁན་ཡིན་མིན་དེ་རེད།

སྤུན་ཟླ་ཚོ། འུ་ཅག་གི་རྒྱབ་རི་བརྟན་པོ་ཞིག་ཡོད་པ་སྲིད་ན་དཀོན་པའི་དེང་དུས་སུ། འཛམ་གླིང་གི་ས་གནས་ཁུགས་སོ་རེ་རེ་ན་མིང་དུ་གྲགས་པའི་རྒྱལ་བ་རིན་པོ་ཆེ་འདི་བ་ཚང་ཡིན། དེ་ཉིད་བཞུགས་པའི་དུས་དེ་རིང་ནི། ཁོང་ཚང་གི་དགུང་ལོ་ནི་དོན་ལྔ་བཞེས་ཡོད་ལ། ད་དུང་མི་ལོ་ག་ཚོད་ཅིག་ལ་འུ་ཅག་ལས་ངན་གངས་ཅན་གཞིས་བྱེས་གཉིས་ཀྱི་སྤྱི་མགོན་དུ་བཞུགས་ཐུབ་མིན་མི་ཤེས་ཀྱང་། སྐབས་འདིར་ངེད་ཅག་ལ་ཅིས་ཀྱང་མེད་དུ་མི་རུང་བ་ནི། བོད་མི་དམངས་གཞིས་བྱེས་གཉིས་ཀྱི་སྐྱིད་སྡུག་ལག་ལེན་དུ་འདེབས་མཁན་ཞིག་ཡོང་རྒྱུ་དེ་ཡིན། དེ་ལྟར་ཡོང་བ་ཡིན་ན། ཁོང་ཚང་གི་ཐུགས་བསམ་བདེ་ངེས་ཡིན་ལ། བོད་མི་དམངས་གཞིས་བྱེས་གཉིས་ཀྱི་འབྲེལ་ཐག་གི་གསེར་ཟམ་ལ་འོད་སྟོང་འཕྲོས་དེ། རྒྱ་ནག་པོའི་སྙིང་ལ་ལྕགས་འཛེར་ཞིག་བརྡབས་ཐུབ་པ་ཡིན། དེ་མིན་ན། བཀའ་བློན་ཁྲི་བ་ནི་མིང་དང་སྙན་གྲགས། རྐུབ་སྟེགས་ཤིག་གི་དུས་ཡུན་ཚང་བརྩིས་བྱེད་མཁན་དུ་གྱུར་ན། ང་ལྟ་བུའི་བོད་མི་དཀྱིས་མ་གྲངས་ལས་འདས་པ་ཞིག་གི་མིག་ཆུ་ཁྲག་དུ་གྱུར་ནས་ཤི་སྲིད་པ་རེད།

དང་པོ།
བཙན་བྱོལ་གྱི་མང་གཙོ་འདི་ལ་འགྱུར་བ་སྣ་ཚོགས་ཤིག་བྱུང་ཡོད། ད་ལྟ་ཚུན་གྱི་འགྱུར་བ་དག་ནི། ཡིག་ཆའི་ཐོག་གི་འགྱུར་བ་དང་གྲངས་ཀའི་འགྱུར་བ་རེད། ཐོག་མའི་ཆར།
ཁྲིམས་བཟོ་ལྷན་ཚོགས་དང་འཛིན་སྐྱོང་བཀའ་ཤག་བྱུང་། དེའི་རྗེས་སུ་ཁྲིམས་ཞིབ་ལྷན་ཁང་བྱུང་། རིམ་བཞིན་ཁྲིམས་བཟོ་ལྷན་ཚོགས་ཀྱི་འཐུས་མིའི་གྲངས་ཀ་ཡང་འཕེལ་འགོ་ཚུགས།
འོན་ཀྱང་། གྲངས་ཁ་འཕེལ་བ་དང་གཞི་རྐང་བཙུགས་པ་ནང་བཞིན། འགྱུར་བ་རླབས་ཆེན་དེ་འདྲ་བྱུང་མེད། འགྱུར་བ་ཆེན་པོ་ཞིག་མ་བྱུང་བའི་རྒྱུ་མཚན་གཅིག་ནི། བཙན་བྱོལ་གྱི་མང་གཙོ་འདི་། བཅུ་ཕྲག་བཞིའི་རིང་ལ་སྒང་ནས་མར་འགྱུར་བ་བཏང་བསྡད་པ་ཞིག་རེད། འོག་ནས་ཡར་ལ་འགྱུར་བ་བཏང་བ་ཧ་ཅང་ཉུང་ཉུང་རེད། གང་ལྟར།
ཕྱི་ལོ་༢༠༠༠ཚུན་ཆད་ནས་འགྱུར་བ་ཆེན་པོ་ཞིག་འགོ་བཙུགས་ཡོད། དེ་ནི་བཀའ་བློན་ཁྲི་བ་མི་མང་གིས་ཐད་ཀར་འོས་འདེམས་བྱེད་འགོ་བྱུང་བ་དེ་རེད། དེ་འགྱུར་བ་རླབས་ཆེན་གཅིག་ཏུ་བགྲངས་ཆོག འོན་ཀྱང་། འགྱུར་བ་དེ་ལ་མང་ཚོགས་ཀྱིས་ལག་ལེན་རླབས་ཆེན་ཞིག་བྱུང་མེད། འོས་འཕེན་གྱི་ཐོབ་ཐང་ཡོད་མཁན་བོད་མི་སྤྱིའི་གྲངས་འབོར་གྱི་བརྒྱ་ཆ་༣༠ལྷག་གིས་མ་གཏོགས་འོས་འཕེན་གྱི་ཐོབ་ཐང་བླངས་མེད།

གཉིས་པ།
ད་ལོ་ནས་བཙན་བྱོལ་གྱི་མང་གཙོ་ལ་སྲོག་དབང་གསར་བ་ཞིག་ཞུགས་བཞིན་ཡོད། དེ་ནི་ང་བཀའ་བློན་ཁྲི་བའི་འོས་གཞིར་ལངས་གི་ཡིན་ཟེར་མཁན་འབྱུང་བཞིན་པ་འདི་རེད། འདི་ནི་བཙན་བྱོལ་བོད་མི་རྣམས་ཀྱིས་མང་གཙོའི་ཁེ་དབང་དངོས་སུ་བེད་སྤྱོད་གཏོང་འགོ་ཚུགས་པའི་རྟགས་མཚན་གསལ་ཤོས་ཤིག་རེད། བཙན་བྱོལ་གྱི་མང་གཙོའི་ནང་གི་འགྱུར་བ་ཆེན་པོ་ཞིག་ཀྱང་རེད། བཀའ་བློན་ཁྲི་བ་དེ་མི་མང་གིས་ཐད་ཀར་འདེམས། བཀའ་བློན་ཁྲི་བ་དེས་ཀྱང་འོས་བདམས་མ་བྱུང་སྔོན་ནས་ང་བཀའ་ཁྲིའི་འོས་གཞིར་ལངས་གི་ཡིན་ཞེས་མི་མང་གི་སྔོན་ལ་ཐོན། བྱེད་སྟངས་འདི་གཉིས་ཀ་མང་གཙོའི་སྤྱི་ཚོགས་ཁྲོད་ཀྱི་མདུན་བསྐྱོད་ཀྱི་གོམ་ཞེང་ཆེན་པོ་གཉིས་རེད། འོན་ཀྱང་། བཀའ་ཁྲིའི་འོས་གཞིར་ལངས་མཁན་དེས་འགྱུར་བ་ཞིག་གཏོང་ཐུབ་གི་རེད་དམ། འདི་ལ་རྩིས་རྒྱག་དགོས་ཀྱི་འདུག རྩིས་ཞིབ་ཏུ་རྒྱག་དགོས་ཀྱི་འདུག
བཀའ་བློན་ཁྲི་བས། བཀའ་ཤག་ལྷན་རྒྱས་སྐབས་འགོ་འདོམས་བྱེད་རྒྱུ་དང་། ཕྱག་རོགས་བཀའ་བློན་སོ་སོར་འགན་དབང་དང་ལས་ཁུངས་ཆ་བགོས་བྱེད་པ། རྒྱུ་མཚན་ལྡན་པའི་སྒོ་ནས་བཀའ་བློན་བྱེ་བྲག་པ་གང་རུང་དགོངས་ཞུ་བྱ་དགོས་བའི་བསམ་འཆར་གནང་ཆོག་པ་བཅས་རེད། གཞན། གཞུང་གི་ལས་དོན་གལ་ཆེའི་རིགས་ཚང་མའི་ཐག་གཅོད་ནི་བཀའ་ཤག་ལྷན་རྒྱས་ནས་གྲོས་བསྡུར་དང་ཐག་གཅོད་བྱེད་དགོས་ཀྱི་ཡོད། བཙན་བྱོལ་བོད་མིའི་བཅའ་ཁྲིམས་སུ་ཡང་། ‘བཀའ་ཤག་གི་འགན་ཁུར་ནི་བཀའ་བློན་ཚང་མ་མཉམ་འདུས་ཀྱི་འགན་ཁུར་ཡན་པ་དང་། བཀའ་ཤག་གིས་རྒྱུན་དུ་སྤྱི་འཐུས་ལྷན་ཚོགས་ལ་འགན་ཁུར་བའི་ཐོག་ནས་ལས་དོན་སྙན་ཞུ་དང་། དྲི་བར་ལན་འདེབས་བྱས་དགོས་’ཞེས་གསལ་འདུག དེས་ན། བཀའ་བློན་ཁྲི་བ་དེ་འཇོན་པོ་རྒོད་པོ་ཇི་འདྲ་ཞིག་ཡིན་རུང་། སྤྱི་འཐུས་མང་མོས་ཀྱི་རྒྱབ་སྐྱོར་མེད་ན། བཀའ་ཁྲིའི་འཆར་སྣང་དང་བསམ་ཚུལ་ཁག་སྒྲོགས་ཙེའི་སྒང་ནས་ལྷག་རྒྱུ་མ་གཏོགས་གཞན་མེད། འདི་དག་ལ་བསམ་ན། འབྱུང་འགྱུར་གྱི་བཀའ་བློན་ཁྲི་བ་དེས་འགྱུར་བ་ཞིག་གཏོང་ཐུབ་རེ་འདུག་གམ།

གསུམ་པ།
བལྟ་སྟངས་གཞན་ཞིག་ནས་བལྟས་ན། ད་ལྟའི་བཙན་བྱོལ་གཞུང་གི་ལས་ཀ་ནི། བོད་དོན་བདེན་མཐའ་སེལ་ཐབས་དང་བཙན་བྱོལ་བོད་མིའི་བསམ་སྤྱོད་ཀྱི་ཁེ་ཕན་ལ་ལྟ་སྐྱོང་བྱ་རྒྱུ་གཉིས་རེད།
འབྱུང་འགྱུར་གྱི་བཀའ་བློན་ཁྲི་བ་དེས། ལས་འགན་འདི་གཉིས་ལ་ཡར་རྒྱས་ཀྱི་འགྱུར་བ་ཞིག་གཏོང་ཐུབ་རེ་ཡོད་དམ། ད་ལྟའི་ཆར། བོད་དོན་བདེན་མཐའ་སེལ་ཐབས་ཀྱི་ལས་ཀ་དེ་བོད་རྒྱ་འབྲེལ་མོལ་ཟེར་བ་དེའི་སྒང་ལ་གཡུགས་ནས་ཡོད། བོད་རྒྱ་འབྲེལ་མོལ་དེ་ཡང་བོད་རིགས་ཡོངས་ལ་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་ཟེར་བ་ཞིག་གི་ཟུར་ན་ཡོད། ད་ལྟའི་བཀའ་ཤག་གིས་ཡིག་ཆ་དེ་ལ་འགྲེལ་བཤད་ཀྱི་ལྷན་པ་ཞིག་ཀྱང་བརྒྱབ་ཡོད། བོད་དོན་ལ་བཟང་ཕྱོགས་ནས་འགྱུར་བ་ཞིག་ཡོང་མིན་ལ་མ་བལྟས་བར། ཡིག་ཆ་དེ་ཆུང་དུ་གཏོང་རྒྱུ་མེད་ལ་ཆེ་རུ་གཏོང་ཐབས་ཀྱང་མེད། བཙན་བྱོལ་བོད་མིའི་བསམ་སྤྱོད་ཀྱི་ཁེ་ཕན་གྱི་ཁོངས་སུ། གཙོ་ཆེ་བ་ཤེས་ཡོན་དང་དཔལ་འབྱོར། འཕྲོད་བསྟེན། གཞིས་ཆགས་སྲ་བརྟན་བཅས་ཚུད་ཡོད། ད་ལྟའི་བཀའ་ཤག་འདིས། ཤེས་ཡོན་གྱི་སྲིད་ཇུས་གསར་བ་ཞིག་གཏན་འབེབས་བྱས་ཚར་ཡོད། གཏན་འབེབས་གང་བྱས་བ་དེ་ལ་ལག་ལེན་གྱི་འགོ་ཡང་བཙུགས་ནས་ཡོད།
དཔལ་འབྱོར་ཡང་སྒེར་བདག་ཏུ་བསྒྱུར་ཚར་ཡོད། སྒེར་བདག་ཏུ་བསྒྱུར་བ་ཙམ་མ་ཡིན་པར་ད་ལྟའི་གཞུང་འདིར་དཔལ་འབྱོར་གྱི་བུ་ལོན་མེད་པ་ཞིག་བཟོས་ཡོད། ཆེ་ས་ནས་གཏན་འབེབས་བྱས་ཚར་བ་འདི་དག་ལ། བསྐྱར་དུ་འགྱུར་བ་ཆེན་པོ་ཞིག་ཡོང་རེ་མེད་པ་མ་ཟད་ཡོང་སའི་ལམ་དེ་ཡང་ཧ་ཅང་དོག་དོག་ཅིག་ཡིན། དེས་ན། འབྱུང་འགྱུར་གྱི་བཀའ་བློན་ཁྲི་བ་དེས་འགྱུར་བ་ཞིག་གཏོང་ཐུབ་རེ་ཡོད་དམ།

ཉེ་ཆར་མདོ་སྨད་ཐེ་བོ་སྨད་རྒྱུད་དམ་དེང་སང་འབྲུག་ཆུ་རྫོང་ཞེས་རྒྱ་ནག་དམར་པོའི་གཞུང་གིས་ས་ཆ་བཅད་བགོས་བྱས་པའི་ས་ཁུལ་འབྲུག་ཆུ་རྫོང་ནང་། རི་ཉིལ་དང་ཆུ་ལོག་འདྲེས་མས་གནོད་འཚེའི་འོག་འདས་གྲོངས་སུ་སོང་བ་རྣམས་ཀྱི་ཆེད་དུ་མཆོད་འབུལ་གཟབ་རྒྱས་ཤིག ༧ སྐྱབས་མགོན་ཀིརྟི་རིན་པོ་ཆེ་བཀའ་དྲིན་འོག་ཐེ་བོ་སྟོད་སྨད་བར་གསུམ་གྱི་བྱེས་འབྱོར་ཐེ་བོ་མི་མང་རྒྱ་བལ་ཁུལ་དང་ཕྱི་རྒྱལ་ཁག་ཏུ་གནས་སྡོད་ཐུན་མོང་གིས་གོ་སྒྲིག་བྱས་པའི་བདུན་ཚིགས་གཉིས་པའི་མཆོད་འབུལ། ཕྱི་ཟླ་ ༨ པའི་ཚེས་ ༢༡ གཟའ་སྤེན་པའི་སྔ་དྲོརཆུ་ཚོད་བརྒྱད་པའི་ཐོག་ཐེག་ཆེན་ཆོས་གླིང་གཙུག་ལག་ཁང་དུ་ ༧ སྒྲུབ་བརྒྱུད་བསྟན་པའི་མངའ་བདག་དཔལ་༧རྒྱལ་དབང་ཀརྨ་པ་མཆོག་ཚོགས་མགོན་དུ་དབུ་བཞུགས་ཐོག བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་དང་། བཀའ་བློན་ཕྱག་རོགས་རྣམ་པ། གཞན་སྤྱི་འཐུས་ཁག་ཅིག་དང་། བཀའ་ཟུར་ཨ་ལགས་འཇིགས་མེད་རིན་པོ་ཆེ། དཔལ་ལྡན་རྒྱུད་སྟོད་གྲྭ་ཚང་གི་མཁན་རིན་པོ་ཆེ་དང་། རྣམ་རྒྱལ་གྲྭ་ཚང་གི་མཁན་རིན་པོ་ཆེ། ཀིརྟིའི་བྱེས་པ་གྲྭ་ཚང་གི་མཁན་རིན་པོ་ཆེ་བཅས་མཁན་པོ་རྣམ་པ་གསུམ། དེ་བཞིན་བཞུགས་སྒར་ཁུལ་གྱི་དགོན་སྡེ་ཁག་གི་གྲྭ་བཙུན་སྔགས་གསུམ། བོད་གཞུང་གི་གཞུང་ཞབས་ལྷན་རྒྱས། མདོ་སྨད་དབུས་རྒྱུན་ལས། བོད་གཞུང་སྨན་རྩིས་ཁང་། བོད་གཞུང་དཔེ་མཛོད་ཁང་། བོད་གཞུང་བདེ་ལེགས་སྨན་ཁང་། བོད་གཞུང་ཟློས་གར། བོད་ཀྱི་གཞོན་ནུ་ལྷན་ཚོགས། བོད་ཀྱི་དབུ་མེད་ལྷན་ཚོགས། དགུ་བཅུ་གསུམ་ཚོགས་པ། བོད་རྒྱལ་ཡངས་མང་གཙོ་ཚོགས་པ། ངྷ་སྟེང་བོད་ཁྱིམ་གྱི་སློབ་ཕྲུག ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། བོད་ཀྱི་རྩོམ་པ་པོའི་མཐུན་ཚོགས་སོགས་ཚོགས་སྡེ་ཁག་དང་། བོད་གཞུང་ཕྱི་དྲིལ་དྲ་གནས་དང་། བོད་ཀྱི་དུས་བབས། བོད་མིའི་རང་དབང་། ཨེ་ཤ་ཡ་རང་དབང་རླུང་འཕྲིན་ཁང་། བོད་ཀྱི་བང་ཆེན། ནོར་ཝེ་བོད་ཀྱི་རླུང་འཕྲིན་ཁང་བཅས་གསར་ཁང་ཁག་གི་གསར་འགོད་པ། རྡ་སའི་མི་མང་བཅས་མཉམ་ཞུགས་ཀྱིས་བདུན་ཚིགས་གཉིས་པའི་མཆོད་འབུལ་གཟབ་རྒྱས་ངང་ཚོགས་འདུག